Русија засега не може да се изјасни за можната покана до САД за мировните преговори за Сирија кои треба да се одржат во казахстанската престолнина Астана меѓу делегации на сириската влада и опозициските групации под покровителство на Москва и Анкара, изјави во петокот портпаролот на Кремљ, Дмитриј Песков.

„Не можам ништо да кажам. Секако дека сме наклонети на што поголем број делегации од сите страни вклучени во сирискиот случај“, изјави за новинарите портпаролот на рускиот претседател Дмитриј Песков, додавајќи дека засега не може поконкретно да одговори.

На прашањето за можното учество на САД на преговорите во Астана, портпаролката на руското министерство за надворешни работи Марија Захарова изјави дека сé уште се водат разговори за форматот на преговорите.

Подоцна руското министерство за надворешни работи во соопштение прецизираше дека во петокот одржало консултации со руската, иранската и турската делегација за одржувањето на преговорите во Астана.

Претходно во четвртокот вечерта турскиот министер за надворешни работи Мевлут Чавушоглу оцени дека САД би морало да бидат поканети на преговорите на 23-ти јануари во Астана, и додаде дека Анкара и Москва се согласни околу ова прашање.

Покровители на преговорите за политичката транзиција и иднината на Сирија се Русија и Турција, на коишто им се приклучи Иран, и трите земји ги најавија кон крајот на декември пред на 30-ти декември да започне прекинот на огнот меѓу завојуваните страни кој треба да биде вовед во средбата во Астана.

Рускиот министер за надворешни работи Сергеј Лавров, во присуство на претседателот Владимир Путин, тогаш изјави дека Москва е подготвена да ги прошири мировните преговори на Египет и на другите арапски земји, како и да гарантира учество и на Обединетите нации.

Средбата во Астана треба всушност да создаде предуслови за мировните преговори кои се водат во Женева под покровителство на ОН, чиешто продолжување специјалниот претставник на ОН за Сирија, Стефан де Мистура, ги одреди за 8-ми февруари./крај/мф/сн