Генералниот секретар на НАТО, Марк Руте, изјави дека руските борбени авиони МиГ-31, кои неодамна влетаа во естонскиот воздушен простор, не биле проценети како непосредна закана.

Руте одржа прес-конференција по состанокот на Северноатлантскиот совет, свикан на барање на Естонија која се повика на член 4 од Вашингтонскиот договор. Таа побара консултации откако три руски авиони без одобрување го нарушија нејзиниот воздушен простор.

„Одлуките за можен ангажман, вклучително и отворање оган, се носат врз основа на достапни разузнавачки податоци и процена на ризикот,“ изјави Руте. Тој додаде дека авиони на НАТО веднаш ги пресретнале руските МиГ-ови и ги „отпратиле без ескалација“.

Во заедничка изјава, НАТО потврди дека сојузниците ќе ги користат сите потребни воени и невоени средства за одбрана и одвраќање на закани, додавајќи дека преданоста кон членот 5 останува непоколеблива.

Руте, одговарајќи на прашања на новинарите, рече дека е прерано да се каже дали Русија е поврзана со неодамнешната појава на дронови во Копенхаген, поради што кратко време беше затворена аеродромската зона.

Австралиецот Глен Гери Камерон (61), познат како ноќниот предатор, призна вина за серија сексуални напади врз жени во Сиднеј на почетокот од 90-тите.

Камерон беше уапсен минатата година на аеродромот во Сиднеј кога полицијата со нови ДНК-анализи ги поврза старите случаи. Тој се изјасни виновен за 13 од вкупно 36 дела, меѓу кои – 11 обвинувања за тешки сексуални напади со закана со оружје.

Жртвите, осум жени на возраст од 17 до 45 години, најчесто биле мамени со лажни понуди за работа и нападнати во близина на железнички станици и паркови. Пресудата се очекува следниот месец.

Фото: судски цртач/суд во Сиднеј

Полска пријави појава на високопатоген птичји грип H5N1 на две живинарски фарми, објави вчера Светската организација за здравје на животните (WOAH).

Вирусот е откриен на фарма за гуски и на фарма за мисирки во градот Суш и уби приближно 4.000 птици, објави WOAH повикувајќи се на извештај од полските власти.

Во мај Варшава го потисна вирусот H5N1, според WOAH.

Во меѓувреме, вирусот повторно почна да се шири во Европа и од крајот на август Норвешка, Германија, Португалија и Бугарија пријавија појава на птичји грип. Во средината на јули болеста се појави и на фарма за мисирки во Шпанија.

Птичјиот грип обично се шири меѓу живината во Европа на почетокот на есента, забележува „Ројтерс“.

Варшава минатата недела изјави дека се надева дека ќе ги продолжи испораките во Кина во рок од еден месец по потпишувањето на договорот со Пекинг. Извозот беше суспендиран поради ширењето на птичјиот грип во 2023 година.

Вредноста на извозот на полска живина во Кина се проценува на две милијарди злоти (470,69 милиони евра).