Новиот вид на коронавирус, кој научниците го нарекоа „ѓаволски“, се чини дека е посмртоносен, полесно се шири и вакцините можеби не се доволно ефикасни против него, пишуваат светските агенции.

Научниците го означија овој вид, кој доаѓа од Калифорнија, како „ѓаволски“ по нивните алармантни откритија.

Новиот вид се вика Б.1.427 / Б.1.429 и првпат беше забележан во Калифорнија оваа зима.

Варијантата е пронајдена во Данска, Мексико и Тајван.

Научниците внимателно го проучувале и првите откритија предизвикале загриженост.

Во научните трудови е наведено дека лабораториските истражувања откриле дека варијантата е „барем 40 проценти поефикасна во инфицирање на човечки клетки“ во споредба со претходните соеви.

„Ѓаволот е веќе тука. Посакувам да беше поинаку. Но, науката е наука“, рече д-р Чарлс Чи, вирусолог од Универзитетот во Калифорнија, Сан Франциско.

Тој и неговиот тим откриле дека ризикот од смрт со овој сој на коронавирус е поголем.

Лабораториски студии исто така откриле дека антителата во крвта на луѓето кои претходно биле заразени со корона или биле вакцинирани не делувале толку добро за да го убијат калифорнискиот вид на вирусот корона.

Ова може да значи дека варијантата е потенцијално способна да избегне вакцини или да ја направи нивната ефикасност послаба, велат научниците.

Некои истражувачи кои не беа вклучени во новата студија изјавија дека варијантата во Калифорнија сепак не претставува толку голема опасност како другите варијанти на коронавирусите.

„Не е толку голема работа. Јас сум сè поубеден дека овој вид се пренесува повеќе од другите локално. Но, нема докази што сугерираат дека тој е на ист стадион како и видот Б.1.1.7 на Кент“, рече Вилијам Ханаџ, епидемиолог од Харвард.

Откриено е дека видот Кент, кој стана доминантен во Велика Британија, е до 70% побрзо пренослив и помеѓу 30 и 90% повеќе смртоносен од другите видови на коронавирус.

Кина негираше дека ги подложила американските дипломати на анални тестови за Ковид-19 откако Вашингтон објави дека некои членови на американскиот персонал морале да ја поминат таа постапка.

Вашингтон се пожали дека постапката е „недостојна“ и им порача на персоналот да го одбијат тестот доколку од нив биде побарано да го сторат тоа.

Портпаролот на кинеското Министерство за надворешни работи изјави дека „Кина никогаш не побарала од американски дипломати во таа земја да поминат низ процедурата за земање брисеви од анусот“.

Американскиот Стејт департмент соопшти дека Вашингтон е „посветен на гарантирање на безбедноста на американските дипломати и нивните семејства и зачувување на нивното достоинство во согласност со Виенската конвенција за дипломатски односи и другите релевантни членови на дипломатското право“.

Американскиот весник „Вашингтон пост“ минатата недела напиша дека одредени членови на дипломатскиот персонал пријавиле во Стејт департментот дека биле подложени на ваков вид тестови. Оваа постапка се изведува во Кина затоа што, според некои извештаи, таа е многу попрецизна од брис од нос или уста.

Измамници понудиле 400 милиони дози вакцини за коронавирус на земјите од ЕУ во вредност од околу три милијарди евра, пренесува агенцијата „Ројтерс“, повикувајќи се на два анонимни извори.

Според „Ројтерс“, еден од нив рекол дека „трговците“ им нуделе вакцини на „Астразенека“ на владите на ЕУ и ја споредил ситуацијата со слична таква на почетокот на пандемијата, кога лажните трговци го искористиле недостигот на маски и друга заштитна опрема.

Еден од официјалните лица за „Ројтерс“ изјавил дека станува збор за голема количина дози на вакцини и дека никој не знае што всушност има во нив, солена вода или нешто друго.

„Во најдобар случај, вакцината нема да дејствува, во најлош случај, тоа е многу сериозен проблем“, рекол анонимниот извор.

Второто анонимно лице кажало дека ЕК е многу загрижена за тие вакцини.

Европската Унија претходно предупреди дека бројот на измами со вакцини е во пораст, како и дека лажните дози кружат на пазарот.