Светската здравствена организација верува дека Олимписките игри ќе се одржат ова лето во Јапонија и дека многу одлуки за нивниот формат може да се донесат во последен момент поради непредвидливите ризици од пандемијата на коронавирус.

„Се надеваме дека Олимпијадата ќе се одржи“, рече директорот на програмата на СЗО за вонредни ситуации, Мајк Рајан, пренесува „Ројтерс“.

Тој истакна дека е охрабрувачки што процентот на позитивни случаи на Ковид-19 во Јапонија се стабилизира и дека властите презедоа многу систематски пристап во управувањето со овој ризик.

Тој верува дека Токио ќе донесе одлуки при организирање на Игрите, што истовремено ќе ги ограничат социјалните контакти што би го ширеле коронавирусот.

„Некои одлуки, како што е бројот на гледачи, може да се донесат само непосредно пред отворањето на Игрите врз основа на бројот на нови случаи на Ковид-19, а познато е дека Јапонија веќе објави дека на публиката од странство ќе ѝ биде забрането да присуствува и дека целиот настан ќе биде без публика“, додаде Рајан.

Јапонија денеска ја продолжи вонредната состојба во Токио и во неколку други префектури до крајот на мај за да се запре ненадејното зголемување на случаите на коронавирус, но премиерот Јошихиде Суга повтори дека сѐ уште е можно да се одржат Олимписките игри во текот на летото, како што беше планирано од 23 јули, по минатогодишното доцнење.

Грчката влада го претстави нацрт-планот за олеснување на ограничувањата наметнати од пандемијата на коронавирусот очекувајќи туристите да пристигнат во средината на мај.

Кафулињата на плажите може да се отворат веќе утре, велат службени лица, а пренесува државната телевизија.

Училиштата ќе бидат отворени в понеделник, музеите може да бидат отворени на 14 мај, кината на отворено на 21 мај, а театрите на отворено на 28 мај истиот месец, објавуваат агенциите.

Ресторани на отворено во Грција се отворија минатиот понеделник по шест месеци.

Шефот на грчката цивилна заштита, Никос Чардалијас, рече дека прават претпазливи, но неопходни потези за отворање на земјата.

Тој ги повика Грците да продолжат да ги почитуваат мерките на претпазливост.

Иако бројот на заразени лица во Грција опаѓа, можни се локални избувнувања на зараза поради отворањето на земјата, предупреди главниот штаб.

Ублажувањето на мерките е придружено со дополнителни регулативи – учениците во училиштата ќе мора да покажат негативен тест в понеделник и в четврток, што ќе им го дава бесплатно државата.

Полицискиот час, кој трае од 23 до 5 часот наутро, исто така останува во сила, велат надлежните.

Границите на Австралија се затворени една година поради пандемијата на коронавирусот и покрај фактот дека речиси и да нема нови случаи на заразени со Ковид-19, оваа земја не планира да го отвори влезот во земјата за странци до средината на 2022 година.

Министерот за трговија и туризам, Ден Тихан, изјави дека целосно отворање би можело да биде реално дури од средината, па дури и втората половина на 2022 година, пренесува „Блумберг“.

Австралија делумно ги отвори своите граници минатиот месец, но само за граѓаните на Нов Зеланд, каде што исто така нема ширење на коронавирусот.

Тихан изјави дека таков модел може да биде овозможен и со некои други земји.

Иако имаше претходно најави дека Австралија може да дозволи меѓународно патување во октомври оваа година, ваквите процени сега се променети поради појавата на нов вид коронавирус во Индија и доцнењето на вакцинацијата.

Австралија, поради ширењето на коронавирусот во Индија, дури донесе одлука да ги затвори границите за своите граѓани што се наоѓаат во таа земја, што предизвика осуда кај дел од јавноста, пишува британски „Гардијан“.