Црногорската влада донесе нови мерки за спречување ширење на коронавирусот, кои ќе важат од денес до 20 август.

Влегувањето во внатрешноста на рестораните, како и ноќните клубови и дискотеки, е дозволено само со најмалку еден од следните четири докази: дека лицето е целосно вакцинирано или примило прва доза вакцина, да има негативен ПЦР-тест на Ковид-19, кој не е постар од 72 часа, доказ дека лицето го прележало Ковид-19, доказ за негативен брз тест за антиген, не постар од 48 часа.

Еден од овие услови мора да исполнуват сите вработени во угостителството, рече директорот на ИЈЗЦГ, Игор Галиќ.

Сопствениците на објектите се должни да назначат лице што ќе го контролира поседувањето докази за вакцинација или негативни тестови.

Малолетниците не се обврзани кон исполнување еден од горенаведените услови, освен кога влегуваат во дискотеки или ноќни клубови, велат властите.

Под истите услови дозволено е присуство на спортски настани на отворено и затворено. Масовните собири и фестивали што не може да се контролираат се одложени за 20 август.

Земјите од вишеградската група (Унгарија, Чешка, Словачка и Полска) го поздравија формирањето на иницијативата „Отворен Балкан“ (поранешен минишенген) од страна на Северна Македонија, Србија и Албанија.

„Веруваме дека таквата тесна соработка меѓу земјите од Западен Балкан придонесува за стабилноста и развојот на регионот“, се наведува во изјавата на претставниците на вишеградската група.

Како што е посочено, земјите од вишеградската група продолжуваат да го поддржуваат забрзувањето на процесот на проширување на ЕУ.

Изјавата ја потпишаа министрите за надворешни работи на вишеградската група, Петер Сијарто, од Унгарија, Јакуб Кулханек од Чешка, Иван Корчок од Словачка и Збигњев Рау од Полска.

На вчерашниот самит во Скопје, премиерите на Северна Македонија и Албанија, Зоран Заев и Еди Рама, и српскиот претседател, Александар Вучиќ, ја преименуваа регионалната иницијатива „Минишенген“ во „Отворен Балкан“ и потпишаа три договори што ќе ја олеснат трговијата во регионот и овозможуваат единствен пазар на труд, но и заемна помош во итни ситуации, потсетуваат медиумите во регионот.

Најмалку 19 лица се повредени при превртување патнички автобус на германскиот автопат А13 помеѓу Стааков и Фрајвалде во правец на Берлин, соопштија германските медиуми.

Според неофицијални информации, возачот сакал да сврти на паркингот, но удрил во заштитната ограда и излетал од патот по што автобусот се превртел.

Германските медиуми пишуваат дека автобусот е од Србија. Патувал од Белград преку Берлин до Стокхолм. Според „Билд“, повеќе од 70 спасувачки возила и шест хеликоптери се вклучени во спасувањето на повредените.

„Шест спасувачки хеликоптери, 30 спасувачки возила и 12 амбулантни возила се на должност. Покрај тоа, пристигна и противпожарна единица со 22 возила. Автопатот е затворен во двата правца“, пишуваат медиумите.

Според полицијата, двајцата возачи добиле сериозни повреди, како и еден патник. Сѐ уште не е познато колку патници имало во автобусот, но се знае дека тие се од Германија, Србија, Шведска и од Израел.