Свет
Руте: Иницијативата „ѕид против беспилотни летала“ е навремена и неопходна

Генералниот секретар на НАТО, Марк Руте, денес изјави дека иницијативата „ѕид против беспилотни летала“ е навремена и неопходна, бидејќи милиони евра или долари не можат да се потрошат на ракети за соборување беспилотни летала што чинат само неколку илјади долари.
Руте, кој присуствуваше на состанокот на Колеџот на комесари на Европската Унија организиран од претседателката на Европската комисија, Урсула фон дер Лајен, во Брисел, рече дека од првиот ден кога ја презеде функцијата генерален секретар на НАТО, работи со ЕУ заедно како еден тим, се наведува во соопштението на НАТО.
„НАТО е силен во поставувањето стандарди и цели за капацитети, додека ЕУ има огромна моќ на внатрешниот пазар, како што рековте, обезбедувајќи развој на одбранбената индустриска база, обезбедувајќи средства и ресурси достапни за поддршка на Украина, а исто така и кога станува збор за иницијативата „ѕид против беспилотни летала“, што, според мене, е одлична идеја“, рече тој и додаде дека НАТО пред сè мора да го заштити своето небо.
„Во последните неколку недели видовме што се случи со беспилотните летала во Полска, со МИГ-31 во Естонија, но и што се случува сега во Данска. Во Данска сè уште проценуваме што стои зад тоа. Кога станува збор за Полска и Естонија, јасно е дека станува збор за Русите. Сè уште проценуваме дали е намерно или не, но дури и да не е намерно, тоа е неодговорно и неприфатливо“, рече Руте. „Значи, ни треба ѕид против беспилотните летала“, нагласи тој.
Кога станува збор за Украина, тој се согласи со Урсула фон дер Лајен дека таа земја е првата линија на одбрана. „Им помагаме на Украинците затоа што станува збор за нашите вредности, но и за нашата колективна безбедност. Затоа е клучно да издржат во битка, па затоа ние продолжуваме да ги поддржуваме“, нагласи Руте.
Како што наведе тој, сè што Европската комисија го прави сега преку SAFE и други иницијативи за да ја стави Украина во најдобра можна позиција е клучно, како во борбата, така и за евентуалните мировни преговори, за да можат потоа да бидат во најсилна можна позиција, се наведува во соопштението на НАТО.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Во тек е украински воздушен напад врз Русија

Украински и руски извори на социјалните мрежи попладнево известуваат за обемен напад со украински проектили и дронови врз руска територија.
Според воените блогери од двете земји, во рускиот воздушен простор навлегле голем број дронови од различни типови и големини, како и повеќе далекуметни проектили, меѓу кои британските Storm Shadow и украинските Neptun и Flamingo.
❗️Flight of the 🇺🇦Peklo missile-drone in the sky over the 🇷🇺Bryansk region a few minutes ago https://t.co/XOQtR7dZ8j pic.twitter.com/K4abtmXYmF
— 🪖MilitaryNewsUA🇺🇦 (@front_ukrainian) October 21, 2025
На социјалните мрежи се појави и фотографија од украинскиот дрон „Пакao“, снимен над Брјанската област во Русија. Овој тип дрон има дострел до 700 километри, лета со брзина од околу 0,55 Мах и носи боева глава од 50 килограми.
Украинскиот канал Dronbomber на Телеграм објави карта што прикажува насока на движење на дроновите и проектилите од Украина кон Русија. На неа, црвените стрелки ги означуваат борбените дронови, сините дронови на млазен погон, а зелените крстосувачките ракети, дел од кои се насочени кон московската област.
Свет
Украина ја продолжи воената состојба и мобилизацијата за уште 90 дена

Украинскиот парламент одобри продолжување на воената состојба и општата мобилизација за уште 90 дена, односно до почетокот на февруари, по предлог на претседателот Володимир Зеленски.
Одлуката е изгласана со двотретинско мнозинство. Воената состојба, воведена по руската инвазија во февруари 2022 година, редовно се продолжува.
Мажите на возраст од 22 до 60 години и натаму не смеат да ја напуштаат земјата, освен во одредени исклучоци, додека забраната за оние од 18 до 22 години беше укината во август.
Свет
Трамп: Земјите од Блискиот Исток ми понудија да го средат Хамас, реков – не уште

Американскиот претседател, Доналд Трамп, изјави дека неколку блискоисточни земји и држави од поширокиот регион му понудиле да испратат војска во Појасот Газа за, како што рече, да го средат Хамас, доколку организацијата го прекрши договорот постигнат со американската администрација.
„Многу од нашите сојузници на Блискиот Исток со ентузијазам ми порачаа дека би влегле во Газа со силни трупи и би го средиле Хамас ако продолжи да делува лошо. Јас им реков: ‘Не уште!’“, напиша Трамп на платформата „Тру соушал“.
Тој додаде дека сè уште постои надеж Хамас да го исполни договорот, но предупреди дека ако не, крајот на Хамас ќе биде брз, жесток и брутален.
Во објавата Трамп посебно ја спомена Индонезија и нејзиниот одличен лидер за поддршката кон Блискиот Исток и САД.
Изјавата доаѓа во време на кревко примирје во Газа, постигнато со посредство на Египет и Катар, додека Вашингтон преговара со регионалните партнери за стабилизирање на состојбата и можно политичко решение на конфликтот.