Свет
Руте: Нашата цел не е да провоцираме, туку да се браниме

Генералниот секретар на НАТО, Марк Руте, денес, во Прага, изјави дека западните сојузници мора бргу да се вооружат за да ги спречат хегемонските амбиции на Русија, која ќе остане закана дури и по војната во Украина, и да постигнат мир преку сила.
„Јасно е дека нашите сегашни капацитети не се доволни. Соочени сме со сериозни закани. Русија и Кина произведуваат оружје со невидена брзина. Ова не е демонстрација на паради, туку вистинска сила. Денес, Русија издвојува 40 проценти од својот буџет за вооружување. Само оваа година илјадници тенкови и стотици ракети ‘Искандер’. Наша задача е да ја подготвиме Европа“, рече Руте на самитот за одбрана во Прага.
Првиот човек на НАТО изјави дека западните сојузници подготвиле планови, меѓу другото, како да ги зголемат капацитетите во противракетната одбрана петкратно, а исто така и производството на артилериска муниција.
„Добрата вест е дека веќе имаме значителни средства, а нови доаѓаат. Посилна одбрана на Европа. Набргу ќе достигнеме производство од два милиона артилериски гранати годишно и ќе почнеме да ја намалуваме огромната предност на Русија“, рече Руте.
Генералниот секретар ја спомена Украина како пример за репутација бидејќи успеа да произведе 4,5 милиони дронови годишно за кратко време и членките на НАТО треба да воспостават интензивна соработка со неа во оваа област.
„НАТО има јасен и амбициозен план. Секој партнер знае како да придонесе. Нашата цел не е да провоцираме, туку да се браниме. Зголемувањето на инвестициите во одбраната е одговор на неиспровоцираната агресија на Русија против Украина. Предизвиците нема да исчезнат. Нашата најголема предност останува единството. Европа и САД заедно“, рече Руте.
По панелот на самитот за одбрана во Прага, генералниот секретар на НАТО ќе се сретне со чешкиот премиер, Петр Фијала.
Шведскиот министер за одбрана Пал Џонсон на самитот изјави дека руската инвазија на Украина ги разби илузиите дека мирот е основен услов во денешниот свет.
„Русија произведува повеќе тенкови, борбени возила, ракети и беспилотни летала од кога било досега. Стекнува искуство од фронтот и успева да извлече поуки од нив. Бргу се приспособува, а исто така ги подобрува и своите хибридни операции“, рече Џонсон.
Шефот на чешката дипломатија Јан Липавски, отворајќи го самитот за одбрана во Прага синоќа, ги предупреди и западните сојузници за аспектот на хибридна војна и рече дека од 2014 година и кризата што избувна пред анексијата на Крим тие се во необјавена хибридна војна што почна против нив и продолжува да ја води Русија.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Албанија продолжува со рекордни бројки на странски туристи

Албанија продолжува со рекордни бројки на странски туристи, која во периодот јануари – август ја посетиле околу девет милиони.
Албанскиот Институт за статистика објави податоци што потврдуваат дека влезот на странски државјани е за 5,2 отсто поголем ако се спореди со истиот период пред една година, кога беа регистрирани вкупно 8,5 милиони странски државјани.
Само во август бројот на странски државјани кои влегле на албанска територија е 2,3 милиони, што е зголемување од 9,9 отсто, во споредба со истиот месец минатата година.
Албанската економија имаше корист од странските туристи од 2,1 милијарди евра за само шест месеци, до кога ја посетиле 4,76 милиони странци. Овие бројки потврдуваат дека 2025 година ќе биде уште пооптимистичка во однос на туризмот во земјата, додека приходите се очекува да се зголемат за околу 7,7 отсто во споредба со лани.
Се очекува приливот на туристи да продолжи и есенва, со што ќе се продолжи туристичката сезона во земјата. Туроператорите известуваат дека резервациите се високи и за септември и за октомври.
Минатата година Албанија ја посетиле над 11,7 милиони туристи или 15,2 отсто повеќе од претходната година. Очекувањата за годинава се над 12 милиони туристи.
Свет
Жена убиена на свадба во центарот на Шибеник, ја погодила ракета

Жена е повредена кога пиротехничко средство – сигнална ракета – било испукано во близина на катедралата „Свети Јаков“ во Шибеник синоќа, и починала од повредите во болница, соопшти хрватската полиција.
Во соопштението од полициската управа Шибеник-Книн се додава дека е уапсен 52-годишен маж, пренесува Хина. Во тек е кривична истрага, соопшти полицијата.
Хрватските медиуми неофицијално известуваат дека несреќата се случила за време на свадбена прослава, кога осомничениот испукал ракета.
Свет
Повеќе од 40 повредени во масовниот руски напад врз Киев, меѓу оние кои починаа има и дете

Украина соопшти дека најмалку четири лица се убиени, а 13 други се ранети во главниот град Киев за време на голем руски напад врз земјата во текот на ноќта.
„Според ажурираните податоци, досега 13 лица се повредени (вклучувајќи едно дете) и четворица починаа (вклучувајќи едно дете) како резултат на нападот врз Киев“, изјави Тимур Ткаченко, началник на Воената администрација на градот Киев, на Телеграм.
Ткаченко додаде дека е предизвикана штета на неколку станбени и нестанбени згради во областите Дарницки, Свјатошински, Соломијански, Холосиевски и Днепровски, вклучувајќи го и кардиолошкиот институт. Гувернерот на регионот Киев, Микола Калашник, изјави дека најмалку 28 лица, меѓу кои и три деца, се повредени во регионот околу главниот град.
„Четири лица се хоспитализирани во регионалните болници, тројца возрасни и едно дете. Сите се хоспитализирани во умерено сериозна состојба“, додаде Калашник.
Украинските воздухопловни сили тврдат дека воздушната одбрана соборила 568 од 595 дронови, како и 43 од 48 различни видови ракети лансирани од Русија преку ноќ, а главна цел бил Киев.