Американската војска денеска соопшти дека контингент од 8.500 војници е во целосна готвоност и е подготвен да биде распореден во Европа за многу кратко време, доколку НАТО побара активирање на силите за брза реакција.

Ова е уште една потврда за американската одлучност во однос на групирањето на руски вооружени сили долж границата со Украина, пишува „Ројтерс“.

Портпаролот на Пентагон, Џон Кирби, истакна дека сè уште не е донесена одлука дали војниците ќе бидат распоредени, истакнувајќи дека секое такво распоредување во источното крило на НАТО ќе биде дополнување на американските трупи кои веќе се на европско тло, со цел како што рече, да се смират загрижените сојузници.

Белата куќа информира дека САД ги финализираат своите воени планови за сите сценарија околу украинската криза.

Портпаролката на Белата куќа, Џен Псаки, за новинарите изјави дека САД никогаш не ја отфрлиле опцијата за обезбедување помош на земјите од источното крило пред да има каква било руска инвазија на Украина.

Русија негира воена активност и покрај фактот што повеќе од 100.000 војници се распоредени долж границата.

Американскиот претседател Бајден ќе разговара со европските сојузници за да формираат заедничка стратегија и одговор на руската закана, пишува Би-би-си.

САД размислуваат во источна Еворпа да преместат дел од своите трупи стационирани во западна Европа, во текот на следните недели, изјавил за „Ројтерс“ дипломат од НАТО.

„Ова се однесува на американските трупи што веќе се во Европа“, објаснил дипломатот, кој побарал да остане анонимен, потврдувајќи го извештајот на „Њујорк Тајмс“ во кој се вели дека американскиот претседател Џо Бајден размислува да испрати американски војници на територијата на балтичките и источно-европските сојузници.

НАТО денеска соопшти дека ги става силите во состојба на подготвеност и дека во источна Европа ќе обезбеди повеќе бродови и борбени авиони, што Русија го осуди како ескалација на тензиите околу Украина.

Дипломатот рекол дека потенцијалното преместување на армијата ќе биде постепено и дека пополнување на празнините на НАТО на источното крило може да се случи во наредните недели.

Војската во Буркина Фасо денеска го собори од власт претседателот Рох Каборе, го суспендира уставот, ги распушти владата и националното собрание и ги затвори границите на земјата.

Во соопштение, потпишано од потполковникот Пол-Анри Сандаого Дамиба, а прочитано на државната телевизија, се вели дека преземањето на власта било извршено без насилство и дека приведените се на безбедно место, пренесе „Ројтерс“.

Соопштението e издадено во име на засега непознато тело – Патриотско движење за зачувување и обнова или МПСР.

Како причина за извршениот воен удар се наведува колапсот на безбедносната ситуација во земјата и како што се вели, неспособноста на Каборе да ја обедини нацијата и ефикасно да одговори на предизвиците со кои се соочува.

Претходно, партијата на Каборе соопшти дека тој преживеал обид за атентат, без да изнесе конкретни детали.

Инаку, Каборе не се појавил во јавноста по пукањето во неколку касарни во главниот град Уагадугу и во близина на неговата резиденција откако војници побараа смена на воените началници и повеќе средства за борба против милитантните исламисти.

Владата тогаш негира дека армијата ја презела власта.

На твитер-налогот на претседателот на Буркина Фасо е објавен неговиот повик до сите што посегнале по оружје да го положат заради повисоките интереси на нацијата.

Пучот во Буркина Фасо го осуди и генералниот секретар на ОН, Антонио Гутереш.

Генералниот директор на Светската здравствена организација, Тедрос Гебрејсус, денеска изјави дека би било опасно да се мисли дека екстремно заразниот вид омикрон е последен што ќе се појави во светот и дека ова е крајот на пандемијата.

Сепак, Тедрос додаде дека е можно оваа година да заврши акутната фаза на пандемијата, каде што Ковид-19 претставува глобална здравствена закана, под услов стратегиите и помагалата како тестовите и вакцините да се користат правилно, објави „Ројтерс“.

Говорејќи на отворањето на состанокот на извршното тело, Тедрос истакна дека омикрон е откриен пред речиси 10 недели и дека оттогаш во светот се регистрирани 80 милиони случаи, повеќе отколку во 2020 година.

„Условите се идеални за појава на уште повеќе видови“, додаде директорот на СЗО.

Тедрос посочи дека човештвото може да стави крај на коронавирусот како глобална здравствена закана со исполнување повеќе цели, како што е намерата на СЗО за вакцинирање 70 отсто од населението во сите земји до средината на годината, особено оние што се изложени на најголем ризик од Ковид-19, како и со внимателно следење на вирусот и новите варијанти што се појавуваат.