Началникот на Генералштабот на француските вооружени сили, генерал на воздухопловните сили Фабиен Мандон, денес изјави дека се во тек подготовките на припадниците на вооружените сили на таа земја за можна војна со Русија, за што зборуваше и во својот говор пред пратениците во францускиот парламент, кога предупреди дека армијата мора да биде подготвена за можен конфликт со Русија во рок од три или четири години.

Во интервју за „Квест Франс“, Мандон рече дека францускиот претседател Емануел Макрон го замолил да предложи опции за да се обезбеди континуирана заштита на францускиот народ и интересите на земјата, за што зборувал и во своето обраќање пред членовите на Комитетот за одбрана на францускиот парламент на 22 октомври.

„Ги споделив моите забелешки со народните претставници за да можеме да ги предвидиме (настаните) и да донесеме правилни одлуки. Ја гледам еволуцијата на Русија – во 2008 година ја нападна Грузија, во 2014 година го анектираше Крим, во 2022 година беше Украина. Русија ја смета Европа за слаба. Знам дека се реорганизира воено за да може да се вклучи во борбата против земјите од НАТО. Мора да се подготвиме за тоа“, рече Мандон.

Кога го прашале кои докази го довеле до таков заклучок, Мандон одговорил дека тоа е збир на различни индиции и разузнавачки информации.

„Оваа проценка ја делат и нашите блиски сојузници. Шефот на германската разузнавачка служба неодамна зборуваше за тоа, перцепцијата на Германија е иста како нашата, исто така и на Велика Британија. Претседателот на Здружениот штаб на вооружените сили на Соединетите Американски Држави е исто така исклучително загрижен за Русија и нејзините сè поблиски врски со различни сили – Иран, Кина и Северна Кореја. Севернокорејците се борат против Украина на нашиот континент. Русија веќе го глобализираше украинскиот конфликт“, истакна Мандон.

Тој рече дека француските сили, во подготовка за потенцијален конфликт со Русија, редовно учествуваат во вежби од голем обем во услови на многу сериозни битки со противник кој има голема моќ, како што е Русија, пренесуваат медиумите во регионот.

Мандон најави организирање на нова вежба следната година, наречена „Орион 2026“, во која ќе учествуваат вооружените сили на Франција и сојузничките земји.

Генералот изјави дека верува оти вклучувањето на целото француско општество е од суштинско значење за заштита од агресијата на друга земја.

„Шок од ваков вид бара многу повеќе од само вооружените сили, туку и поддршка од целата земја. Русија ги проучуваше нашите општества и знае дека нашата сила лежи во единството. Ако успее да нè фрагментира и подели, може да победи“, рече Мандон.

Како неколку примери за обиди за дестабилизација на француското општество, тој ги наведе лажните ковчези, кои беа поставени пред Ајфеловата кула во јуни, и свинските глави, кои беа поставени пред неколку џамии во Франција на почетокот на септември.

Фото: принтскрин

Ноќните поројни дождови на грчкиот остров Лезбос ги поплавија куќите и другите објекти на западниот дел од егејскиот остров и ги принудија локалните власти да затворат неколку училишта за инспекции и поправки, објави „Екатимерини“.

Најтешко погодени беа областите Калони и Скала, а жителите ја опишаа количината вода што падна на островот како невидена.

Одлуката за затворање сите училишта во западен Лезбос беше донесена како превентивна мерка поради интензивните и продолжени поројни дождови, кои зафатија значителен дел од островот предизвикувајќи прекини во сообраќајот и зголемувајќи го ризикот од патување за учениците и наставниците, наведоа локалните власти во соопштението.

Тие исто така им советуваа на жителите да се воздржат од непотребни патувања додека не се изврши целосна процена на штетите на патот.

Фото: принтскрин

Израелскиот Кнесет во прво читање усвои закон со кој се воведува смртна казна за палестинските затвореници осудени за убиство на израелски граѓани. Законот го предложи пратеникот на Кнесетот, Лимор Сон Хар Мелех, а предлогот сега оди на разгледување во комисиите пред второто и третото читање.

Предлогот доби значително мнозинство гласови – 39 пратеници гласаа за него, а 16 гласаа против.

По гласањето, крајнодесничарскиот министер Итамар Бен Гвир го прослави резултатот делејќи слатки изразувајќи задоволство од одлуката за која рече дека носи правда за израелските жртви.

Според нацрт-законот, секое лице што ќе убие израелски граѓанин од расна или национална омраза или со намера да им наштети на државата Израел и на еврејскиот народ ќе биде осудено на смрт како единствена пропишана казна.

Законот исто така ја менува постојната законска рамка дозволувајќи им на воените судови да изрекуваат смртна казна со мнозинство гласови од судиите наместо едногласно, како што беше случај досега. Покрај тоа, кога пресудата ќе стане конечна, таа не може да се измени или поништи.

Предлогот предизвика силни реакции во Израел и во меѓународната заедница со предупредувања дека усвојувањето на законот може дополнително да ги влоши израелско-палестинските тензии и да претставува сериозно отстапување од претходната израелска правна пракса, која исклучително ретко ја применува смртната казна.

Фото: принтсркин