Нов Зеланд денес објави крај на карантинот во најголемиот град Окланд, а властите сметаат дека изворот на зараза е ограничен.

Премиерката Џасинда Ардерн објави дека карантинот ќе биде укинат в недела, една недела по стапувањето во сила.

Мерката, која опфати околу 1,7 милион жители, беше донесена по еден случај на зараза од необјаснето потекло, но властите подоцна открија дека членовите на семејството на заразеното лице не ја почитувале изолацијата и продолжиле да се гледаат со пријатели, кои исто така биле позитивни.

Потеклото на овој случај сега е познато, а епидемијата е ограничена на 15 случаи, така што жителите на Окланд може повторно да излезат.

„Тој план е во согласност со нашата претпазлива стратегија“, изјави Арден пред новинарите.

Нов Зеланд, земја со пет милиони жители, има регистрирано само 26 смртни случаи од коронавирус.

Премиерката призна дека жителите на Окланд, кои биле во карантин од февруари, биле уморни, но ги замолила да ги следат правилата за спречување секое ширење на вирусот.

Иако карантинот во Окланд завршува в недела, бројот на лица на собирите ќе биде ограничен на 100, а носењето маски е задолжително во јавниот превоз. Во остатокот од земјата ограничувањата се минимални.

Ирак распореди илјадници дополнителни безбедносни сили за време на историската посета на папата Франциско.

Безбедноста е засилена по низата ракетни и самоубиствени бомбашки напади, кои предизвикаа страв кај ирачките власти.

Висок безбедносен службеник, кој бил запознаен со планот за посетата на папата, изјавил дека силите што ќе го чуваат поглаварот на Римокатоличката црква биле обучени да се соочат со најлошите можни сценарија, од улични пресметки до бомбардирања и ракетни напади, објави „Ројтерс“.

Претпоставени напади биле дел од обемните вежби по повод доаѓањето на папата во Ирак, кој ќе престојува таму од денеска до 8 март, што ќе биде прва посета на еден папа на таа земја.

Безбедносните ризици се големи по пристигнувањето на папата и се очекува тој  првпат да патува со блиндиран автомобил, мерка за која Ватикан се надева дека ќе има двоен ефект, обезбедувајќи го поглаварот на католичката црква и намалувајќи го метежот во кој полесно се шири заразата, објави АП.

На аеродромот папата Франциско беше пречекан од премиерот на Ирак, Мустафа ал-Кадими, по што следуваше официјална церемонија на пречек во претседателската палата и средба со претседателот Бахрам Салих.

На вториот ден од престојот папата во Наџаф ќе се сретне со големиот ајатолах Али ал-Систани во неговата куќа, а АП наведува дека секој детаљ од состанокот, од соблекувањето на чевлите до распоредот за седење, е специјално договорен и испланиран.

За време на своето историско патување во Ирак, папата ќе ја посети и црквата во Каракош, центарот на христијанството во Ирак. Оштетена и запалена за време на владеењето на Исламската држава, судбината на црквата ја отсликува трагедијата на нејзината христијанска заедница, која беше уништена од страна на екстремистите.

Франциско ќе се моли за жртвите од војната во Мосул, а потоа ќе одржи миса во градот Ербил.

За време на ова историско патување, папата ќе се сретне и со човек што го преживеал масакрот во багдадската црква, каде што милитантите убија 58 верници во 2010 година, а ќе одржи и миса во Халдејската катедрала во Багдад и молитва во античкиот град Ур, каде што се верува дека живеел Аврам во вториот милениум пр. н.е.

Иранската револуционерна гарда соопшти дека иранските власти го спречиле обидот за киднапирање патнички авион за време на летот претходната ноќ, без да наведат детали за инцидентот.

Обидот за киднапирање се случил во авионот „фокер 100“ на компанијата „Иран ер“ на лет од градот Ахваз на југозападот на земјата кон Машхад на северозапад, пренесува АП.

#Iran’s paramilitary Revolutionary Guard says authorities disrupted the attempted #hijacking of a passenger plane in flight the night before, though it offered few details on what happened.https://t.co/CioDHPbCqh

— Al Arabiya English (@AlArabiya_Eng) March 5, 2021

Во соопштението на гардата не се прецизира идентитетот на киднаперот, но се вели дека тој се обидел да го пренасочи летот кон јужниот брег на Персискиот Залив.

Поради инцидентот во кој никој не е повреден, авионот принудно слетал во Исфахан, во централниот дел на Иран.