Светската здравствена организација побара непречен пристап до сирискиот град Дума за да ги провери извештаите од своите партнери дека 500 луѓе биле погодени од хемиски напад, објави Би-би-си.

Сириската влада негира дека стои зад каква било употреба на хемиско оружје.

САД се заканија со насилен одговор на извештаите за нападот, што, пак, Русија го нарече изговор за напад врз својот сојузник Сирија. Според извештаите на СЗО во нападот се убиени 70 лица.

Организацијата соопшти дека нејзините партнери известиле дека 500 луѓе претрпеле симптоми по изложеноста на токсични хемикалии, вклучувајќи тешкотии при дишењето, иритација на мукозните мембрани и нарушување на централниот нервен систем.

„Ние сите треба да бидеме навредени од овие ужасни извештаи и слики од Дума”, изјави Питер Салам од СЗО.

„СЗО бара непосреден непречен пристап до областа за да се погрижи за погодените, да се проценат влијанијата врз здравјето и да се обезбеди сеопфатен одговор на јавноста”, додаде Салам.
Сириските опозициски активисти, спасувачки работници и лекари велат дека нападот во Дума е изведен од сириските владини сили кои употребиле бомби со токсични хемикалии.