Маж кој купувал во супермаркет во американската држава Џорџија застрелал и убил касиерка која го услужувала поради расправија за маска за лице, потоа го ранил и заменик-шерифот кој работел во таа продавница надвор од службата, објавија локалните власти.

Виктор Ли Такер (30) пукал во касиерката на супермаркетот со пиштол, а потоа пукал и во заменик-шерифот кој бил надвор од должноста. Во пукотниците и двајцата биле повредени, се вели во соопштението на полицијата во Џорџија, пренесува Ројтерс.

Такер и ранетиот заменик се во стабилна состојба, а касиерката која била погодена од куршум им подлегнала на повредите на самото место.

Не се дадени детали за спорот меѓу Такер и касиерката, а полицијата изјави дека го уапсила ранетиот напаѓач додека тој се обидувал да се провлече низ влезната врата на супермаркетот.

Генералниот директор на Светската здравствена организација (СЗО) Тедрос Аданом Гебреизус рече дека има пад на новозаразени со коронавирус во последните седум недели.

Ова е најдолг период на опаѓање на неделно ниво од почетокот на пандемијата.

Гебреизус во Женева изјави дека нивната цел е да се вакцинира најмалку 70 проценти од светската популација до самитот Г7 што ќе се одржи во Германија во 2022 година.

„Потребни ни се 11 милијарди дози вакцини за да ја постигнеме оваа цел“, рече лидерот на СЗО.

Проценувајќи ја моменталната состојба кога станува збор за пандемијата, Гебреизус рече дека бројот на новозаболени е намален во последните седум недели.

„Иако бројот на новозаразени на неделно ниво е најмал од февруари, бројот на смртни случаи не опаѓа толку брзо. Бројот на смртни случаи пријавени минатата недела беше сличен на претходниот. Повеќе од 10.000 луѓе умираат секој ден, рече Гебреизус.

Тој напомена дека падот на бројот на заразени лица е само маска наспроти алармантното зголемување на смртните случаи во многу земји. Според него „ненадејното зголемување во Африка е особено загрижувачко затоа што ова е регион со мал пристап до вакцини“.

Американскиот претседател Џозеф Бајден вчера во Брисел вети дека ќе му каже на својот руски колега Владимир Путин каде е „црвената линија“, пренесе агенцијата Франс прес.

„ Не бараме конфликт со Русија, но ќе одговориме доколку Русија продолжи со своите активности“, изјави Бајден пред новинарите по самитот на лидерите на НАТО.

Бајден, кој ќе се сретне со Путин во Женева во четврток, го опиша рускиот претседател како интелигентен, цврст и „достоен противник“.

„ Сепак, тој (Путин) мора да разбере дека ќе биде трагедија ако умре опозицискиот лидер Алексеј Навални, кој е во затвор во Русија“, предупреди Бајден.

Американскиот претседател го осуди „агресивното однесување“ на Русија и инсистираше на поддршка на територијалниот интегритет и суверенитет на Украина. Русија го анексираше украинскиот полуостров Крим во 2014 година и ги поддржува проруските бунтовници во источна Украина.

Според агенцијата АП, Бајден изразил надеж дека рускиот претседател ќе покаже интерес за „промена на перцепцијата што светот ја има за него“.