Свет
Сирија има нова преодна влада

Сирискиот претседател Ахмед Ал Шара ја претстави новата преодна влада, клучен чекор во транзицијата од долгогодишното владеење на семејството Асад и во подобрувањето на врските на Сирија со западните земји, јави Ројтерс.
Новите власти во Сирија, предводени од исламистите, беа под притисок на Западот и арапските земји да формираат влада која подобро ќе ја одразува етничката и религиозната различност во земјата. Овој притисок дополнително се зголеми по убиствата на стотици алавити, заедницата од која доаѓа соборениот лидер Башар Ал Асад.
Мухамед Јоср Бернија беше назначен за министер за финансии, додека Кристијан Хинд Кабават ја презеде функцијата министер за социјални работи и труд. Владата го задржа Мурхаф Абу Касра како министер за одбрана и Асад Ал-Шибани како министер за надворешни работи, кој исто така ги имаше овие улоги во претходната привремена влада формирана по соборувањето на Асад во декември.
Новата уставна декларација ги гарантира правата на жените и слободата на изразување. Ал Шара беше назначен за привремен претседател во јануари и вети дека ќе формира инклузивна преодна влада која ќе работи на обновата на уништените јавни институции во Сирија и ќе управува со земјата до изборите, за кои рече дека може да потрае и до пет години. Новата влада нема да има премиер, а се очекува Ал Шара да преземе водечка улога во извршната власт.
Претходно овој месец, Сирија усвои уставна декларација што ќе послужи како основа за преодниот период под водство на Шаријатот. Декларацијата ја задржува централната улога на исламскиот закон, но ги гарантира правата на жените и слободата на изразување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Нов земјотрес го погоди Мјанмар со јачина од 5,3 степени според Рихтеровата скала

Земјотрес со јачина од 5,3 степени според Рихтеровата скала денеска го погоди јужниот брег на Мјанмар, соопшти Европско-медитеранскиот сеизмолошки институт.
Земјотресот се случил на оддалеченост од околу 142 километри од градот Јангон, а епицентарот на земјотресот бил на длабочина од десет километри.
Минатиот петок, земјотрес со јачина од 7,7 степени според Рихтеровата скала го погоди Мјанмар.
Загинаа повеќе од 3000 луѓе, повеќе од 4.520 беа повредени, а повеќе од 400 се водат како исчезнати, според владејачката воена хунта во земјата.
Свет
Русите го ракетираат родниот град на Зеленски: Украинците објавија вознемирувачки фотографии

Најмалку четири лица загинаа, а уште тројца тешко се повредени во руски ракетен напад денеска врз Криви Рих, град во јужна Украина, кој е и роден град на украинскиот претседател Володимир Зеленски.
Украинската служба за итна помош соопшти дека лекарите се борат за животите на ранетите, кои по нападот се пренесени во болница. Според локалните власти, една од жртвите загинала во сопствениот автомобил, кој бил погоден со проектил додека бил на пат.
Службите за итни случаи објавија фотографии од местото на нападот на кои се гледаат разурнувања и жртви. Фотографиите се вознемирувачки, на нив се гледаат мртви тела и тешко ранети цивили.
Нападот дојде додека во регионот продолжуваат секојдневните руски ракетни и беспилотни напади врз цивилни цели, инфраструктура и станбени области низ Украина. Самиот град Кривиј Рих веќе неколку пати беше цел на напади – последниот голем напад се случи во декември, кога беше погодена станбена зграда, а неколку цивили беа повредени.
Свет
Повеќе од 3.000 луѓе загинаа во земјотресот во Мјанмар, прогласен прекин на огнот во граѓанската војна

Владејачката хунта во Мјанмар прогласи привремен прекин на огнот во својата граѓанска војна во вторникот за да ги олесни хуманитарните напори по земјотресот со јачина од 7,7 степени според Рихтеровата скала, каде загинаа повеќе од 3.000 луѓе.
На државната телевизија МРТВ денеска беше објавено соопштение од високата воена команда во кое се наведува дека прекинот на огнот ќе трае до 22 април, а целта е да се изрази сочувство за луѓето погодени од земјотресот.
Претходно, едностран прекин на огнот беше прогласен од страна на вооружените групи на отпор кои се спротивставија на воената влада.
Овие групи мора да се воздржат од напад на државата или прегрупирање, во спротивно армијата ќе ги преземе „неопходните“ мерки, се вели во соопштението на армијата.
Претходно денеска спасувачите извлекоа живи тројца мажи од урнатините пет дена по земјотресот.
Земјотресот со епицентар во Мјанмар е силно почувствуван и во Тајланд, а причинета е голема материјална штета. Бројот на загинати денеска се искачи на 3.003, а повредени се над 4.500 лица, објави МРТВ. Сепак, се претпоставува дека бројките се многу поголеми.
Мјанмар веќе доживуваше хуманитарна криза поради граѓанската војна. Според податоците на Обединетите нации, повеќе од три милиони луѓе биле внатрешно раселени, а на повеќе од 20 милиони луѓе им била потребна помош дури и пред земјотресот.