Сè уште не е време за опуштање, изјави Мајкл Рајан, раководител на програмата за итни операции на Светската здравствена организација.

„Навистина сум загрижен затоа што некои луѓе мислат дека најлошото е минато. Тоа не е точно”, рече тој на прес-конференција во Женева.

„Ако не бидеме внимателни, можни се трет и четврти бран“, предупреди тој.

СЗО ги повика сите да не ги гаснат надежите во напорите за борбата против епидемијата, додека коронавирусот продолжува да мачи многу земји.

Ова предупредување доаѓа во време кога програмата Ковакс, утврдена за поправедна дистрибуција на вакцини, оваа недела конечно овозможи почеток на кампања за вакцинација во земји кои сè уште немаа набавено вакцина.

Испратени се дваесетина милиони дози во дваесет земји. Следната недела, списокот ќе биде проширен на уште 31 земја.

„Ова е напредок што инспирира надеж, но бројот на дози споделени преку Ковакс сè уште е мал“, рече генералниот директор на СЗО, Тедрос Аданом Гебреизус.

Во Србија синоќа пристигнаа 500.000 вакцини од руската компанија „Синофарм“. Авионот со вакцини на аеродромот „Никола Тесла“ во Белград го пречека претседателот на Србија, Александар Вучиќ.

„Согласно протоколите вечерва дојдов сам на аеродромот ‘Никола Тесла’. Нашиот најголем авион А330 достави 500.000 вакцини на ‘Синофарм’. Дојдов уште еднаш да му покажам почит и благодарност на претседателот Шји Ѓинпинг и на кинескиот народ”, рече Вучиќ во видео обраќање на социјалните мрежи.

„Благодарен сум на Кина, горд на Србија!“, напиша претседателот на Србија.

Вучиќ ги повика граѓаните да се вакцинираат и со тоа да спасат животи.

„Вечерва имаме вкупно 2.620.000 вакцини и се договоривме за вкупно 13 милиони и 350.000 вакцини“, рече претседателот на Србија.

Од денес напладне во 12 часот до понеделник во 6 часот наутро во Србија ќе се применуваат нови мерки на Кризниот штаб според кои ќе бидат затворени сите угостителски објекти и сите продавници, освен продавниците за храна.

Од понеделник, 8 март, средношколците ќе се префрлат на часови преку Интернет.

За време на новиот режим ќе можат да работат само продавниците за храна, кои можат да работат до 21 часот, а на аптеките и бензинските пумпи работното време не им е ограничено.

Во ски – центрите овие мерки ќе важат од полноќ и ќе траат до понеделник, што значи дека угостителските објекти на овие места нема да работат во текот на целиот викенд.

Исклучок се хотелските кафулиња и ресторани, кои за време на викендот можат да послужат само гости кои имаат регистриран престој.

Кога станува збор за културните институции, само театрите ќе можат да работат до 21 часот, со почитување на сите епидемиолошки мерки, додека ќе може да се одржат и претходно закажани спортски настани, но без присуство на публика.

Доставата на храна ќе функционира 24 часа на ден. Исто така, по 12 часот, можат да работат приватни здравствени установи, лаборатории, ветеринарни клиники и стоматолошки ординации.

Од понеделник, 8 март, сè ќе работи според вообичаениот режим.

Од Владата соопштија дека вакцинацијата против Ковид-19 ќе се одвива без прекин според однапред утврден план, така што новите мерки на кој било начин не го загрозуваат процесот на имунизација.