Свет
Тимот на Трамп не гледа докази за влијание на Русија врз американските избори
САД немаат докази за вмешаност на Русија во обидите за влијание на американските претседателски избори и американските разузнавачки служби во моментов не можат да му достават уверливи докази на новоизбраниот претседател Доналд Трамп за ваквите обвинувања, изјави во понеделниот во интервјуто за телевизијата Fox News, претставникот на преодниот тим на Трамп, Шон Спејсер кој е номиниран за портпарол на Белaта куќа.
Според Спејсер, медиумите ја подгреваат опцијата, според којашто Русија влијаела врз американските претседателски избори на 8-ми ноември во полза на републиканскиот кандидат Доналд Трамп и други републиканци, што е и ставот на администрацијата на американскиот претседател на заминување Барак Обама, Вториот минатиот четврток нареди протерување на 35 руски дипломати и низа санкции за руски поединци, компании и двете разузнавачки служби, поради наводните кибернетички напади врз политички институции во САД,
„Меѓутоа, нема никакви докази дека тие (Русите) навистина влијаеле врз изборите“, вели Спејсер. Според него „дали биле или не биле хакирани компјутерските системи е сосема поинаква приказна“, која не е поврзана со тоа дали Русија учествувала во тоа, истакнува Спејсер кој ги осудува кибернетичките напади од која страна и да доаѓаат.
Во неделата Трамп изјави дека очекува во текот на седмицава да ги добие информациите за кибернетичките напади од американската разузнавачка заедница, за да ја оцени соодветноста на санкциите преземени од американската администрација на заминување. Спејсер зборуваше дека се сомнева во пропорционалноста на новите антируски санкции.
Тој истакна дека Трамп „секојдневно е брифиран и информиран, како од членовите на неговиот тим за национална безбедност, така и од други членови на американската разузнавачка заедница“, но во овој момент „се чини дека разузнавањето нема убедливи докази“ за руско учество во кибернетичките напади врз политичките структури во САД.
Спејсер, исто така, тврди дека минатата седмица објавениот извештај на американското Федерално биро за истраги (FBI) и на министерството за татковинска безбедност, за наводната вмешаност на руски хакери во кибернетичките напади, не личи на убедлив документ туку повеќе на „практичен водич за Националниот комитет на Демократската партија како може да се подобри неговата информатичка безбедност“.
Според овој соработник на Трамп, избраниот претседател и неговиот тим „очекуваат конечен извештај“ од американските власти, во кој или ќе бидат наведени конкретни докази за вмешаноста на Русија во хакерските напади, или експлицитно ќе укажуваат дека разузнавањето „само во општи линии претпоставува“ дека во информатичките упади учество можела да има Москва.
Претходно во интервју за телевизиската мрежа ABC News Спејсер ја проблематизираше оправданоста и пропорционалноста на мерките коишто ги презема администрацијата на Барак Обама како одговор на наводните руски хакерски напади.
„Едно од прашањата што си ги поставуваме е: зошто е неопходна реакција од тие размери?“, рече Спејсер. „Тоа го поставува прашањето дали тоа е политичка одмазда, а не дипломатски одговор“, додаде.
Сепјсер, исто така, потврди дека оваа седмица претставниците на американската разузнавачка заедница ќе имаат специјален брифинг со Трамп, посветен исклучиво на ситуацијата со кибернетичките настани. Според него, избраниот претседател на САД ќе оцени дали „одговорот на администрацијата на Обама е сразмерен или не“.
„Знам многу за хакерите. Упадите се работа која е многу тешко да се открие, така што тоа би можело да биде кој и да е“, изјави во неделата за новинарите Доналд Трамп во врска со кибернетичкиот скандал за кој е обвинета Москва. Трамп потврди дека во текот на оваа седмица ќе се сретне со претставниците на американската разузнавачка заедница, кои ќе му ги претстават информациите врз основа на кои тие ја обвинија Русија за обидите за упади во компјутерските системи на политички институции на САД. Се очекува дека тоа ќе се случи во вторник или во среда./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Путин: Русија и Иран сакаат да воспостават мултиполарен светски поредок
Рускиот претседател Владимир Путин денеска изјави дека зајакнувањето на трговската и економската соработка е главен приоритет во односите со Иран, пренесува „Анадолија“.
За време на средбата со иранскиот претседател Масуд Пезешкијан на маргините на самитот на БРИКС во 2024 година во Казан, Путин рече дека меѓувладината комисија е задолжена за спроведување на различни проекти.
Путин, меѓу другите важни руско-ирански заеднички проекти, го спомена и развојот на иранската железничка инфраструктура како дел од промоцијата на големиот проект меѓународен транспортен коридор Север-Југ, како и изградбата на втората и третата електрана Бушер.
Рускиот претседател изрази оптимизам дека Договорот за слободна трговија меѓу Иран и Евроазиската економска унија ќе биде потпишан до крајот на оваа година.
„Генерално, би сакал да истакнам дека пристапите на Русија и Иран кон глобалната агенда се повеќе или помалку слични или идентични. Ние сме обединети во нашата желба да воспоставиме праведен мултиполарен светски поредок, да ги почитуваме меѓународните норми и да ја задржиме централната улога на Обединетите нации“, рече Путин.
Пезешкијан истакна дека тој лично го надгледувал спроведувањето на одредени договори бидејќи ги смета односите со Русија „стратешки“.
„Нашите односи се од стратешка природа – во интерес на нашите земји е да одиме напред заедно. Нашиот драг сосед Русија е голема земја“, рече Пезешкијан.
Иранскиот претседател повика на поголема соработка во рамките на БРИКС и другите формати и изрази надеж дека наскоро ќе биде потпишан новиот руско-ирански меѓудржавен договор.
На одвоена средба со неговиот венецуелски колега, Путин го повика Николас Мадуро да развие финансиски и банкарски врски меѓу двете земји врз основа на националните валути.
Рускиот претседател ја пофали Венецуела како „еден од долгорочните доверливи партнери на Русија во Латинска Америка и во светот како целина“, истакнувајќи дека стратешките партнерски односи меѓу нивните земји продолжуваат да се зајакнуваат.
„Заемно корисна соработка се развива во сите правци. Расте и обемот на билатералната трговија, а се реализираат бројни проекти во енергетскиот сектор, фармацевтската индустрија, транспортот, во областа на новите технологии“, нагласи Путин.
Мадуро рече дека неговата нација го следи патот БРИКС и бара рамнотежа во светот.
Тој го најави меѓувладиниот состанок на Русија и Венецуела за 7 ноември, нагласувајќи дека очекува разговорите да придонесат за постигнување „успех во сите области на соработка“.
Свет
Лукашенко за наводите за севернокорејски војници во Русија: „Toa е глупост“
Белорускиот претседател даде интервју за „Би-Би-Си“ на маргините на самитот на БРИКС, кој се одржува во Казан, Русија.
Тој одговори на тврдењата дека илјадници севернокорејски војници пристигнуваат во Русија за да и помогнат на руската армија во војната против Украина.
„Глупости“, одговори Лукашенко.
„Познавајќи го неговиот карактер, Путин никогаш не би се обидел да убеди друга земја да ја вклучи својата војска во руската специјална операција во Украина“, додава тој.
„Тоа би било чекор кон ескалација на конфликтот доколку вооружените сили на која било земја, па дури и на Белорусија, се најдат во конфликтот“, одговори Александар Лукашенко.
„Дури и да се приклучиме на војната, тоа би било пат кон ескалација. Зошто? Затоа што вие, англосаксонците, веднаш би рекле дека друга земја интервенирала на едната страна… и војниците на НАТО ќе бидат распоредени во Украина“, вели Лукашенко.
Новинарот го праша дали Владимир Путин некогаш побарал од Лукашенка да обезбеди белоруски војници за војната на Кремљ во Украина.
„Никогаш. Ниту тој, ниту поранешниот министер за одбрана Сергеј Шојгу, ниту сегашниот министер за одбрана Андреј Белоусов никогаш не го поставиле тоа прашање“, вели Лукашенко.
Сепак, Лукашенко потврди дека нема ништо против Русија да користи белоруска територија при инвазијата на Украина (инвазијата ја нарекува специјална операција), при повлекување или префрлање на руските сили.
Тој рече дека Путин никогаш нема да употреби тактичко нуклеарно оружје, особено не од територијата на Белорусија.
Свет
Се зголемува бројот на убиени и повредени во терористичкиот напад во Турција
Бројот на убиени во денешниот терористички напад во Анкара се искачи на пет лица, соопшти турскиот министер за внатрешни работи.
Уште 22 лица се повредени, а двајца се во критична состојба, изјави Али Јерликаја.
Повторувајќи го мислењето на неговиот колега член на владата Јасар Ѓулер, министерот Јерликаја рече дека сторителите зад денешниот напад најверојатно се членови на курдската милитантна терористичка група ПКК.
Сепак, се чека потврда бидејќи властите сакаат да ги идентификуваат напаѓачите.
Ниту една група не презеде одговорност за нападот.