Свет
Трамп ги критикуваше „силно политизираните“ судови во САД

Американските судови се силно исполитизирани, но тие мора да постапуваат исправно, изјава во средата претседателот Доналд Трамп ден откако апелациониот суд почна да го разгледува неговиот извршен указ за привремена забрана за влез на американска територија на државјани од седум мнозински муслимански земји, со што ја зајакна својата критика врз американскиот правосуден систем.
Тричлениот судиски одбор на апелациониот суд во Сан Франциско во вторникот почна да ги разгледува аргументите за и против привремената блокада на извршната уредба на претседателот Доналд Трамп, која ја донесе судијата на федералниот суд во Сиетл, Џон Робарт, а која важи на целата територија на САД. Се очекува дека судот својата одлука ќе ја донесе подоцна во средата.
„Не сакам да го нарекувам судот пристрасен. Па нема да ги наречам пристрасни. И засега немаме никаква пресуда. Но судовите, се чини, многу се политизирани. А би било добро за нашиот правосуден систем доколку тие би можеле да ја прочитаат изјавата и да го сторат тоа што треба“, изјави Трамп во Вашингтон на собирот со стотиците полициски началници и шерифи на големите американски градови.
На 27-ми јануари претседателот Доналд Трмап го потпиша извршниот указ 13769 „За заштита на земјата од влез на странски терористи“, со кој во рок од 90 дена се суспендира издавање визи за државјаните на седум муслимански држави: Иран, Ирак, Јемен, Либија, Сирија, Сомалија и Судан. Указот, исто така, и им наложува на Стејт департментот и на Министерството за национална безбедност да го суспендираат распоредувањето на бегалците по сојузните држави на 120 дена, како и на неодреден рок се суспендира прифаќањето бегалци од Сирија.
Апелациониот суд мора да одлучи дали Трамп дејствувал во согласност со своите овластувања или неговиот чин претставува дискриминација на муслиманите, иако во неговиот указ никаде не се споменуваат зборовите муслиман или ислам, како што предочи претставникот на министерството за правда кое заедно со министерството за внатрешна безбедност ја поднесоа жалбата против одлуката на судијата Робарт. Жалбениот суд ќе проценува дали неговата забрана е насочена на луѓето поради нивната религија, додека жалителите тврдат дека се мерки за подетална проверка и одбрана од можно влегување во САД на лица кои претставуваат терористичка закана.
Трамп пред полициските функционери потсети дека „доколку претседателот смета дека влегувањето во нашата земја на некои странци или одредени категории странци им наштетува на интересите на американскиот народ“, тогаш тој има право „да определи период во кој прифаќањето на лица од други земји ќе биде запрено“. Трамп истакна дека тие овластувања ѝ се дадени на Белата куќа за да ја осигури безбедноста на земјата.
„Доколку тие судии сакаат, според моето мислење, да му помогнат на судот по прашањето на почитувањето на судот, ќе го сторат она што е потребно“, додаде американскиот претседател. Претходно во средата на својот Twitter профил напиша: „Доколку САД не го добијат овој случај, што очигледно би требало, никогаш нема да имаме безбедност и заштита којашто ја заслужуваме. Политика!“. /крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Директор на погребално претпријатие чувал 31 тело во распаѓање, а на семејставата на починатите им давал лажна пепел

Директорот на погребалното претпријатие во американската сојузна држава Индијана, Ренди Ланкфорд, се изјасни за виновен откако таму беа пронајдени 31 тело во распаѓање.
Обвинителите го обвинија Ланкфорд, сопственик на бизнис во Џеферсонвил, дека не извршил погребни церемонии за кои бил платен, објави Би-Би-Си.
Судијата посочи дека би можел да одлежи 12 години затвор и мора да плати 46.000 долари на 53 семејства кои биле оштетени.
Полицијата во Џеферсонвил почнала да го истражува погребниот дом во Ланкфорд минатата година по извештаите за непријатен мирис од зградата.
Телата, кои ги немало ниту во замрзнувачите, биле во различни фази на распаѓање, бидејќи некои од нив биле неколку месеци во погребалното претпријатие.
Исто така, пронајдени се останки на 17 кремирани луѓе.
Ланкфорд беше ставен во домашен притвор во очекување на пресудата.
Меѓу наводите се дека бројни семејства ја добиле, како што веруваат, пепелта на нивните најблиски, за да добијат повик од полицијата неколку месеци подоцна, кога сфатиле дека вистинската пепел била пронајдена во погребално претпријатие или дека нивните најблиски не биле ни кремирани.
Свет
Ужас на Карибите: Ајкула ја одгриза ногата на 22-годишна девојка додека нуркаше

Девојка (22) во САД била нападната од ајкула и и’ ја одгризала ногата додека нуркала на Карибите. Американката е пренесена во болница во тешка состојба, соопшти локалната полиција.
Нападот се случил во средата попладне на еден од островите пред одморалиштето „Блу хевн“, кога 22-годишната девојка нуркала со пријателка, пишува „Скај њуз“.
„Повредената девојка беше гостин на друго одморалиште и клиент на компанија за патување со брод со која не сме поврзани“, изјави портпаролката на одморалиштето Стефани Мек.
Полицијата соопшти дека вработен во одморалиштето во близина на Ливард Марина повикал полиција за нападот на ајкулата и побарал помош од 911.
Пријателот на девојката не е повреден. Се уште не е познато за каква ајкула станува збор, пишува „Скај њуз“.
Регион
Ердоган ги повика граѓаните утре да гласаат, Киличдародглу порача: „Да ја извлечеме Турција од темната јама“

Претседателот на Турција, Реџеп Таип Ердоган, денеска ги повика граѓаните на таа земја утре да гласаат во вториот круг од претседателските избори. Неговиот ривал, кандидатот на опозицијата Кемал Киличдародглу, пак, му порача на народот да гласа за да ја извлечат земјата од „темната јама на дводецениското владеење на Ердоган“.
Како што јави Ројтерс, Ердоган и Киличдароглу планираат да привлечат околу осум милиони гласачи кои не излегоа на гласање во првиот круг од изборите.
Првиот круг од претседателските избори се одржа на 14 мај, а Ердоган освои повеќе од 49 отсто, додека Киличдароглу близу 45 отсто.
За победа беа потребни 50 отсто плус еден глас.
Обраќајќи им се на поддржувачите во Истанбул за време на последниот предизборен митинг пред вториот круг, Ердоган апелираше на голем одѕив.
„Ќе одиме ли утре на гласање? Ќе излеземе рано сабајле да гласаме за некого? Секој што гласал во првиот круг нека гласа и во вториот“ рече Ердоган, додека публиката воодушевено извикуваше „да“ – додава Ројтерс.
Киличдароглу, кој е поддржан од шест опозициски партии, рече дека секој што ја сака Турција „мора да гласа“.
„Ако навистина сакате, сите заедно ќе излеземе од оваа темна јама. Ги повикувам луѓето да гласаат, без разлика на ставовите или начинот на живот. Ова е последна шанса. Секој што ја сака земјата треба да излезе на избори“, порача Киличдароглу на Твитер.
Третопласираниот Синан Оган, кој освои 5,2 отсто од гласовите во првиот круг, го поддржа Ердоган.
Избирачките места се отвораат утре во 08:00 часот, а се затвораат во 17:00 часот по локално време.
Право на глас имаат над 60 милиони гласачи, а неофицијални резултати се очекуваат веќе во недела доцна навечер.