Граѓаните на Летонија, Малта и Словачка денеска гласаат на изборите за Европскиот парламент, со што ќе им се придружат на граѓаните на Велика Британија, Холандија, Ирска и Чешка кои гласаа во изминатите два дена.

Словаците избираат 13, Летонците осум, а Малтежаните шест европратеници.

На изборите за ЕП од четвртокот до недела, 26 мај, ширум ЕУ на гласање може да излезат 418 милиони гласачи, а специфичен случај е Малта каде што на гласање може да излезат и тинејџери со наполнети 16 години.

По изборите, почнува нов политички циклус во Унијата кој подразбира и промена на челниците во клучните европски институции.

Аналитичарите прогнозираат дека десничарите ќе освојат значителен број места во Парламентот.

Американскиот претседател, Доналд Трамп, рече дека му е жал за британската премиерка Тереза Меј која вчера најави дека на 7 јуни ќе се повлече од функцијата. Трамп вели дека Меј е силна жена и дека работела напорно.

„Жалам за Тереза, многу ми се допаѓа, таа е добра жена, работи напорно. Таа е многу силна“, рече Трамп и најави дека ќе се сретне со Меј за две недели.

Во говорот, во кој на крајот се расплака, Меј рече дека длабоко жали што не успеала да ја изведе земјата од Европската Унија. Додаде дека таа работа му останува на нејзиниот наследник кој ќе мора да обезбеди консензус во Парламентот.

„Тоа е можно само ако двете страни сакаат компромис“, рече Меј.

Премиерката додаде дека е горда на напредокот што е остварен во последните три години.

Федералниот суд во Калифорнија ѝ нареди на администрацијата на американскиот претседател, Доналд Трамп, да престане да ги користи средствата од фондот на Министерството за одбрана за изградба на ѕидот на јужната граница со Мексико.

Судот смета дека американскиот Конгрес не ѝ дал специфична дозвола на администрацијата за да може парите да ги користи за изградба на ѕидот.

Со одлуката, администрацијата на Трамп нема да може да користи милијарда долари кои се издвоени од фондот на Министерството за одбрана.

„Позицијата во која Конгресот одбива барање на извршната власт, а тогаш таа наоѓа начин да ги потроши парите без одобрение на Конгресот, не е во согласност со основните принципи на поделба на власта кои датираат уште од најраните денови на нашата земја“, се наведува во одлуката на судот.

Одлуката се однесува на два дела од ѕидот, во Њу Мексико со должина од 74 километри и во Аризона со должина од осум километри.