Пожарите во Амазонија ги предизвикале сточари и дрвосечачи, кои, охрабрени од политиката на бразилскиот претседател Жаир Болсонаро, сакаат да ја обработуваат земјата на која сега има дрвја, тврдат организации за животна средина и истражувачи.

Директорот на програмата „Амазон вол“, Кристијан Пуире верува дека најголем дел од пожарите кои беснеат во амазонската прашума и се видливи од вселената, биле предизвикани од човечки фактор, истакнувајќи дека дури и за време на сушните периоди, во Амазонија, каде има голема влажност, пожарите не се случуваат така лесно.

Тој додава дека земјоделците и сточарите одамна користат пожари како начин за расчистување на теренот.

Пуире истакна дека, во однос на претходните години, нивото на уништување оваа година е навистина високо.

„Амазон е неверојатно важен за нашата иднина, за нашата способност да ги запреме најлошите последици од климатските промени. Ова не е претерување. Ние одиме кон неописливо уништување, не само на Амазонија, туку и на целата наша планета“, предупредува тој.

Дождовната шума во Амазонија произведува околу 20 проценти од светскиот кислород, па затоа често ја нарекуваат и „белите дробови на планетата“.

Бразилската вселенска агенција соопшти дека бројот на пожари во Амазонија е зголемен 83 проценти во однос на минатата година како резултат на сечењето на шумите.

Миграцијата во Велика Британија до крајот на март годинава била најниска од 2013 година, а голем дел од овој пад се должи на намелениот број на мигранти кои пристигнале од земји членки на ЕУ по референдумот за брегзит во 2016 година, покажува официјална статистика.

Растот на миграцијата беше една од главните грижи на оние кои на референдумот одлучија за излезат од ЕУ, но од тогаш, таа загриженост опадна. Покрај тоа, владата на премиерот Борис Џонсон планира да воведе ограничувања на миграцијата од ЕУ, откако Британците ќе го напуштаат сојузот на 31 октомври.

За 12 месеци до март, во Велика Британија се доселиле околу 612.000 луѓе, а се иселиле 385.000, со што миграцискиот биланс изнесува 227.000, најмалку од декември 2013 година, соопшти Националната канцеларија за статистика во земјата.

Овие податоци се базираат на нови експериментални методи со кои би требало да се заобиколат претходните недостатоци што довеле до намалување на реалниот број на долгорочни мигранти од ЕУ и преценување на бројот на студенти што се од земји кои не се членки на ЕУ, а останале во Велика Британија по дипломирањето.

Индонезија ќе изгради нов главен град во провинцијата Источен Калимантан на островот Борнео, изјави министерот за просторно планирање на земјата, Софијан Џалил.

Претседателот Џоко Видодо минатата недела и официјално му предложи на парламентот преместување на главниот град од Џакарта, кој е премногу загаден и пренаселен со околу 10 милиони луѓе, во Калимантан, пренесе агенцијата АП.

Индонезиската страна на Борнео има пет провинции, познати по тропските шуми, орангутаните и резервите на јаглен.

„Да, локацијата ќе биде во Источен Калимантан, но уште не знаеме каде точно“, потврди Џалил.

Конечна одлука сè уште не е донесена, но за подобра поврзаност во архипелагот, главниот град би требало да биде на брегот.

Преселбата на административниот центар би чинела околу 33 милијарди долари, вклучувајќи ги и новите канцеларии за владата, како и домовите за околу 1,5 милиони државни службеници, чие населување  се очекува да се случи во 2024 година.