Свет
Трамп сакал да го ослободи Асанж, ако му кажел кој стои зад хакерскиот напад на Демократската партија

Американскиот претседател Доналд Трамп му понуди помилување на основачот на „Викиликс“, Џулијан Асанж, доколку открие кој стои зад хакирањето на електронската пошта на Демократскиот национален комитет пред претседателските избори во 2016 година, соопшти денеска судот во Лондон.
Адвокатката на Асанж, Џенифер Робинсон, рече дека присуствувала на состанок на кој републиканските претставници Дана Рорабакер и Чарлс Џонсон, соработник близок до кампањата на Трамп, ја дале понудата во 2017 година. Според неа, договорот му бил претставен на Асанж како решение што секој го добива и што ќе му овозможи да продолжи со својот живот, а за возврат Трамп ќе има и политички придобивки.
За време на предизборната кампања во 2016 година, „Викиликс“ објави низа електронски пораки од Националниот комитет на Демократската партија кои ѝ наштетија на тогашната кандидатка Хилари Клинтон.
Американските разузнавачки служби изразија уверување дека Русија, која сакаше да влијае на претседателските избори во САД, е одговорна за упадот на хакерите.
„Предлогот даден од конгресменот Рорбахер беше Асанж да го идентификува изворот во замена за некакво помилување“, рече Робинсон.
Русија негираше каква било вмешаност во изборите во САД од почетокот на обвинувањата, а Трамп исто така негира дека имал тајна врска со Москва. Истрагата водена од специјалниот истражител Роберт Мулер не утврди тајна соработка на ниту еден член од кампањата на Трамп со Русија.
49-годишниот Асанж се бори против екстрадицијата во САД, каде што е обвинет за кршење на законите за шпионажа по 2010/11 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Лавров: Палестинското прашање и понатаму останува нерешено

Рускиот министер за надворешни работи Сергеј Лавров изјави дека мировниот план за Газа на Доналд Трамп не го решава целосно израелско-палестинскиот конфликт, пренесе RT.
Тој нагласи дека Русија го оценува планот како „најдобро што моментално е на преговарачката маса“, но додаде дека „палестинското прашање со тоа не е решено“.
Лавров порача дека конечно решение би било можно само со создавање на палестинска држава во границите од 1967 година, во согласност со резолуциите на ОН, и повтори дека Москва останува посветена на решението со две држави.
Свет
Трамп: Не сум сигурен дека ќе влезам во рајот, но на многумина им го разубавив животот

Американскиот претседател Доналд Трамп изјави дека не е сигурен дека ќе може да влезе во рајот, но додаде дека на многумина им го направил животот подобар.
Изјавата ја даде во претседателскиот авион Air Force One. За време на летот, еден од новинарите што го придружуваа 79-годишниот претседател го праша за неговите претходни коментари кои ги дал во контекст на преговорите за мировниот договор во војната меѓу Русија и Украина.
Трамп уште во август, во емисијата „Fox and Friends“, изјави: „Ако можам да спасам 7.000 луѓе неделно, мислам дека тоа е прилично добро – сакам да се обидам да влезам во рајот, ако е можно. Слушам дека не ми оди добро. Навистина сум на дното на листата. Но ако успеам да влезам во рајот, ова ќе биде една од причините“
На прашањето дали неговите шанси се подобриле по договорот меѓу Израел и Хамас, Трамп сега одговори: „Малку се шегувам. Мислам дека ништо нема да ме одведе во рајот. Можеби не сум предодреден за тоа. Можеби сум во рајот токму сега, додека летаме со Air Force One,“ рече Трамп.
Тој повторно ја обвини администрацијата на Џо Бајден за неспособност и додаде дека војната во Украина никогаш немаше да се случи доколку изборите во 2020 година не биле наместени.
Свет
Египетскиот претседател до Израелците: Претворете го овој историски момент во нов почеток

Египетскиот претседател Абдел Фатах ал-Сиси ги повика Израелците моментот на потпишување на мировниот договор за Газа да го претворат во нов почеток за поправеден и помирен живот во регионот.
„Погледнете кон подобра иднина за нашите деца,“ рече Сиси по потпишувањето на договорот во Шарм ел-Шеик.
На самитот присуствуваа Доналд Трамп и бројни меѓународни претставници. Обраќајќи му се на Трамп, Сиси додаде: „Господине претседателе, нека војната во Газа биде последната војна на Блискиот Исток.“