Свет
Тројцата најбогати луѓе во светот нема да платат данок оваа година

По преселбата на Илон Маск во Тексас, сега сите тројца најбогати луѓе во светот живеат во американски држави каде што не наплаќаат данок на доход.
На 8 декември беше објавено дека Маск го напуштил својот дом во Калифорнија за да замине за Тексас, каде што се гради нова фабрика на „Тесла“.
Најбогатиот човек во светот Џеф Безос, чие богатство е со вредност од 183 милијарди долари, живее во државата Вашингтон. Креаторот на „Мајкрософт“, Бил Гејтс, кој е третиот на листата на милијардери на „Блумберг“, исто така живее во Вашингтон.
Тексас и Вашингтон се две од девет американски држави што не наплаќаат данок на доход. Другите седум се Алјаска, Невада, Њу Хемпшир, Јужна Дакота, Тенеси и Вајоминг.
Инаку, за Маск оваа година беше плодна. Неговото богатство е во пораст, како што растат акциите на „Тесла“. Пред два дена акциите на компанијата се зголемиле 6 проценти постигнувајќи ново највисоко ниво од 695 долари.
Во изминатите 12 месеци на својата нето-вредност додаде над 127 милијарди долари. Според „Форбс“, само неговата ракетна компанија „Спејс икс“ сега се проценува на 46 милијарди долари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Американска телевизија објави мапа на Украина без Крим

Американскиот телевизиски канал Си-би-ес прикажа мапа на Украина без окупираниот Крим. Други територии под руска окупација беа прикажани како дел од Украина на мапата.
Мапата се појави во етерот за време на емисијата „The Late Show“ со Стивен Колберт на 9 септември, но привлече внимание дури подоцна.
Во сегмент по повод 10-годишнината од водењето на емисијата, познатиот американски водител Стивен Колберт се осврна на настаните што ги обликуваа животите на Американците од 2015 година. Еден дел од програмата се фокусираше на Украина, истакнувајќи го херојството на Украинците во отпорот кон руската агресија.
Видеото за тоа доби над 230.000 прегледи на Јутјуб за една недела и сличен број коментари. Некои во коментарите ја истакнаа проблематичната мапа што го прикажува Крим како руски.
Ова не е прв пат западен медиум да објави мапа што го прикажува Крим како дел од Русија. На пример, британскиот „Тајмс“ се извини во 2018 година за објавување мапа што го прикажува Крим како руска територија.
фото: принтскрин
Свет
Катар: Нетанјаху нема да помине неказнето

Катар изјави дека кршењето на меѓународното право од страна на израелскиот премиер Бенјамин Нетанјаху „нема да остане неказнето“, објави Анадолија.
Нетанјаху вчера изјави дека израелскиот напад од минатата недела во кој беа убиени пет членови на Хамас во Доха бил „порака“, тврдејќи дека нападот не е неуспешен.
„Навикнати сме израелскиот премиер да се обидува да го одвлече вниманието и да ги оправда своите неуспеси по секој неуспех што го претрпува поради неговите неодговорни политики“, изјави портпаролот на Министерството за надворешни работи на Катар, Маџед ал-Ансари, на прес-конференција во Доха.
„Исто така, сакаме да му испратиме порака – кршењето на меѓународното право нема да остане неказнето“, рече тој.
Во врска со напорите на Катар за посредништво за постигнување договор за прекин на огнот во Газа, Ансари рече дека „тоа не изгледа реално бидејќи израелскиот премиер сака да ги убие сите што преговараат со него и да ја бомбардира земјата-посредник“.
„Катар во моментов е целосно фокусиран на одбраната на својот национален суверенитет, одговарајќи на подмолниот израелски напад врз него, преземајќи ги сите потребни мерки за да се осигури дека тоа нема да се случи повторно и повикувајќи ги одговорните на одговорност“, рече тој, додавајќи:
„Сите други политички размислувања сега се секундарни во светлината на ситуацијата со која се соочуваме денес.“
Катар, заедно со Египет и САД, посредува во напорите за завршување на израелската војна во Појасот Газа, во која од октомври 2023 година загинаа речиси 65.000 Палестинци.
фото: принтскрин
Европа
Медведев: Зоната забранета за летови над Украина би значело војна меѓу НАТО и Русија

Заменик-шефот на рускиот Совет за безбедност, Дмитриј Медведев, предупреди дека воведувањето зона на забрането летање над Украина и соборувањето на руски беспилотни летала би значело војна со земјите од НАТО, објави Анадолија.
Медведев, кој беше руски претседател од 2008 до 2012 година, на Телеграм изјави дека „ја смета европската иницијатива ‘Источна гарда’ за забавна“.
„Но, сериозно, спроведувањето на провокативната идеја на Киев и другите будали за создавање зона на забрането летање над Украина и можноста земјите од НАТО да ги соборат нашите беспилотни летала би значело само едно – војна меѓу НАТО и Русија. Да ги наречеме работите со вистинското име“, рече тој.
Генералниот секретар на НАТО, Марк Руте, во саботата ја објави операцијата „Источна гарда“, која вклучува распоредување опрема на границите со Белорусија, Русија и Украина.
Медведев ја опиша секоја употреба на замрзнатите руски средства, вклучително и во форма на „заем за Украина“, како „кражба“, предупредувајќи дека доколку тоа се случи, Русија ќе ги гони државите и функционерите на ЕУ „до крајот на времето“ и „со сите можни средства“.
„Без да се откаже од побарувањата против нив поради истекот на рокот за застарување или стекнување имот, и без рок за застарување за гонење за меѓународни злосторства. Во сите можни меѓународни и национални судови. А во некои случаи, дури и надвор од судот“, рече тој.
Одговарајќи на предлогот на австриската министерка за надворешни работи Беате Мајнл-Рајзингер за одржување разговори меѓу Русија и Украина врз основа на нејзината неутралност, Медведев посочи на неконзистентноста на нејзините изјави со оние што ги даде два месеци претходно, кога се залагаше за влез во НАТО.
„Беате се отрезни и е многу исплашена“, рече тој.
фото: принтскрин