Европа
Турските власти денеска во Анкара ќе се сретнат со финска и со шведска делегација

Состанокот на турските претставници со делегациите на Финска и Шведска ќе се одржи денеска во Анкара, а една од темите на разговор е влезот на овие земји во НАТО и барањата што Турција ги постави пред нив.
Делегацијата ќе ја предводат портпаролот на претседателот, Ибрахим Калин, и заменик-министерот за надворешни работи, Седат Онал, а шведската и финската делегација ќе ја претставуваат државните секретари Оскар Стенстром и Јука Саловара.
„Средбата треба да се одржи во претседателската палата во 13 часот по локално време“, посочуваат од МНР.
„Доколку Шведска и Финска не покажат јасно дека ќе бидат солидарни со Турција за основните прашања, особено во борбата против тероризмот, нема да имаме позитивен пристап кон членството на овие земји во НАТО“, рече Ердоган за време на разговорите со Столтенберг.
Да потсетиме, Шведска и Финска минатата недела официјално поднесоа барање за почеток на процедурата за влез во НАТО.
Сепак, се огласи и турскиот претседател Реџеп Таип Ердоган, кој рече дека Турција не може да ја прифати нивната кандидатура сè додека земјите ги поддржуваат активностите на организациите поврзани со курдското движење ПКК.
Покрај осудата на движењето ПКК и неговите филијали, Турција ги повикува скандинавските земји да извршат поголем притисок врз поддржувачите на движењето во земјите.
Покрај барањето Шведска и Финска да ги осудат активностите на организациите поврзани со движењето ПКК, турските власти поставија и голем број други барања во врска со укинување на ограничувањата за извоз на оружје во Турција.
Исто така, последното барање што Турција го упати до Шведска и Финска е да понуди безбедносни гаранции за сето горенаведено, а не ветувања, пренесуваат медиумите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Џонсон не планира да поднесе оставка: Во тешки околности работата треба да продолжи

Британскиот премиер Борис Џонсон најави дека ќе се бори да остане на власт и покрај зголемените повици да се повлече.
Позицијата на Џонсон ја разнишаа низа оставки од колеги и министри кои сметаат дека тој не е добар премиер. На неделниот распит премиерот во Парламентот пристигна со борбен став.
По оставката на повеќе од 20 функционери, некои претставници сметаат дека Џонсон не може да ги пополни тие позиции во време кога се повикува владата да одговори на растот на трошоците за живот и да ја поддржи економијата, чиј раст забавува и е загрозен со рецесија. Неговата судбина би можела да биде решена најрано в среда кога таканаречениот комитет 1922 ќе се состане за да ги утврди правилата за гласање доверба. Портпаролот на Џонсон рече дека Џонсон верува оти ќе преживее такво гласање.
„Работата на премиерот во тешки околности е да продолжи да работи“, рече Џонсон. Претходно, тој се обиде да го покаже својот авторитет со брзо назначување на Надим Захави за министер за финансии, а кој е популарен политичар во Конзервативната партија заслужен за брзата набавка на вакцината против Ковид-19.
Но, настапот на Џонсон во Парламентот наиде на брутален одговор, пишува „Ројтерс“. Тешката позиција во која се наоѓа се покажа кога некои негови колеги од власта не успеаја да се воздржат од смеење додека лидерот на опозицијата му кажа дека е лидер на лесната бригада.
Џонсон беше прашан за неговата оставка од тројца членови на неговата партија.
Го нападна и поранешниот министер за здравство, Саџид Џавид, наведувајќи ги сите афери и гафови. „Во одреден момент треба да одлучиме дека е премногу. Тој момент е денес“, рече Џавид. Според анкетата на YouGov, 69 отсто од Британците се согласуваат со поранешниот министер.
Европа
Владата на Орбан нема да испраќа оружје за Украина

Унгарскиот шеф на дипломатијата, Петер Сијарто, во разговор за CNN ја брани одлуката на владата на Виктор Орбан да продолжи да купува руски енергенти, но и да не испраќа оружје во Украина.
Унгарскиот шеф на дипломатијата рече дека обидот за замена на руски енергенти со некои други „вклучува префрлање трошоци за унгарскиот народ“.
За одлуката да не ѝ праќаат оружје на Украина, Сијарто рече дека Унгарија „не сака да ризикува руски напад на 150.000 Унгарци кои живеат на западот на Украина“.
„За нас главна цел е да не се мешаме во оваа војна“, рече Сијарто.
Европа
Украинско обвинителство: Русите убиja најмалку 340 деца

Најмалку 340 деца се убиени во руските напади врз Украина, објавија од кабинетот на главната украинска обвинителка.
Од почетокот на војната на 24 февруари година досега се повредени 645 деца, се наведува во соопштението.
„Овие бројки не се конечни и Обвинителството работи на утврдување на точната бројка на самото место на случувањата. Поголемиот дел од овие бројки се однесуваат за регионот на Донбас, па следуваат регионот на Харков и Киев. Голем број жртви се потврдени во Чернихив, Миколаев и Запорожје“, се наведува во соопштението.