Откако минатиот викенд Филип Завадлав во Сплит уби три лица со автоматска пушка, новинари од загрепскиот „Јутарњи лист“ истражувале дали е тешко да се набави автоматска пушка „калашников“ (АК-47) на црниот пазар.

По само 50 часа од почетокот на истражувањето, новинарите во својот автомобил веќе имале АК-47, односно неговата верзија од Крагуевац, една рамка полна со куршуми и продолжение на цевката за тромблон.

„Ете, купивме автоматска пушка на црниот пазар. Поинаку тоа не можевме да го сториме бидејќи употребата на ова оружје е забрането за граѓаните и легално не може да се купи“, рекол новинарот Марио Пушиќ.

Тој објаснил дека автоматот го купиле во центарот на Карловац и за него платиле 600 евра.

„Исто како нас, ова може да го направи секој. Меѓутоа ние веднаш го предадовме оружјето во полиција, а многумина можат да го искористат за лоши работи“, посочил новинарот на „Јутарњи лист“.

Најмалку осум лица загинаа во пожар во Чешка, кој денеска избувнал во дом за лица со инвалидитет.

Повредени се околу 30 луѓе, некои од нив посериозно, изјави портпаролот на одделот за итни случаи.

Многу жители на домот вдишале големи количини чад.

Пожарот избувнал утрово во дом за лица со инвалидитет во гратечето Вејпрти. Причината за пожарот сè уште не е откриена.

Градот се наоѓа во северозападниот дел на Чешка, во близина на германската граница.

На местото на настанот пристигнале седум амбулантни возила, меѓу кои и две од Германија. Пожарот веќе не се шири, но сè уште не е целосно под контрола.

Ова е втор најсмртоносен пожар во Чешка во последните неколку децении.

Во Берлин денеска се собираат клучните фактори во долгогодишната граѓанска војна во Либија, во обид да се ограничи странското воено мешање, да се консолидира примирјето и да се помогне во повторното започнување на политичкиот процес за иднината на оваа северноафриканска држава, објави АП.

Канцеларката Ангела Меркел ги покани лидерите на 12 земји, како и Обединетите нации, Европската унија, Африканската унија и Арапската лига, на самит во германската престолнина.

Повеќемесечните дипломатски напори на Германија да ги засили активностите за запирање на борбите во Либија се дел од иницијативата на генералниот секретар на ОН, Антонио Гутереш и неговиот пратеник во Либија, Гасан Саламе, пренесе агенцијата АП.

Меѓу оние кои се очекуваат во Берлин се и претседателите на Русија, Турција и Франција – Владимир Путин, Реџеп Таип Ердоган и Емануел Макрон, италијанскиот и британскиот премиер Џузепе Конте и Борис Џонсон, како и државниот секретар на САД, Мајк Помпео.

Поканети се и претставници на Обединетите Арапски Емирати, Египет, Алжир, Кина и Република Конго.

Исто така, германското Министерство за надворешни работи потврди дека на самитот ќе присуствува премиерот на меѓународно признатата либиска влада на националното единство, Фајез ал-Сараж и неговиот главен противник, командантoт на Народната армија, Калифа Хафтар.

Сепак, како што наведуваат светските агенции, не е јасно колку е веројатно да се оствари вистински напредок во земјата која по соборувањето и ликвидацијата на Моамер Гадафи во 2011 година, западна во хаос и конфликти.

Либија е поделена од ривалските администрации, секоја со поддршка од различни држави.

Силите на Хафтар, кои од април се во опсада на Трполи се поддржани од Египет, Русија и Обединетите Арапски Емирати, додека владата со седиште во главниот град се сврте кон Турција.