Долниот дом на чешкиот парламент усвои документ со кој се повикува владата да побара обештетување од Русија за експлозијата од 2014 година, во складиштето за муниција во чешкото село Врбетице, објави денеска чешкиот весник „Днес“.

Пратениците исто така ја повикуваат владата да го намали бројот на руски дипломати во Чешка и ја поддржаа одлуката на владата да протера 18 вработени од руската амбасада, кои ја напуштија Прага во понеделникот, пренесува руската новинска агенција ТАСС.

Долниот дом на чешкиот парламент исто така ги повика министрите да се спротивстават на акциите што му штетат на суверенитетот на Чешката Република.

Според документот, на руските компании не смее да им се дозволи да учествуваат во стратешки важни инфраструктурни проекти на територијата на Чешка, како што е изградбата на нуклеарни централи.

Претходно, чешкиот премиер Андреј Бабиш изјави дека Министерството за финансии подготвува тужба за отштета против оние кои стојат зад експлозијата во складиштето за муниција во селото Врбетице.

„Нанесена е огромна штета. Министерството за финансии подготвува тужба со барање за обештетување“, најави Бабиш.

Бабиш во саботата вечерта (17 април) соопшти дека руската воена тајна служба ГРУ била одговорна за двете големи експлозии во магацинот со оружје во јужна Чешка, при што загинаа две лица.

Во чешката јавност се погласни се обвинувањата за „руски државен тероризам“ и земјата е исправена пред промена на својата досегашна надворешна политика кон Русија.

Луѓето ширум САД славеа во вторникот откако поранешниот полицаец Дерек Шовин, обвинет за убиството на Афроамериканецот Џорџ Флојд, беше прогласен за виновен по сите три точки – убиство од втор степен, убиство од трет степен и убиство од втор степен од небрежност.

Стотици луѓе се собраа во вторникот пред судницата во Минеаполис каде што трпеливо чекаа да дојде пресудата, која пристигна по десетчасовно дебатирање.

Нивните навивања и извици можеа да се слушнат во судницата откако Шовин беше прогласен за виновен. Снимките од местото на настанот покажуваат дека насобраните главно молчеле, сè додека некој не извикал: „Тој е виновен! Тој е виновен!“

Тие почнале да скокаат од радост, а имало и солзи. Еден од нив ги замолкнал и извикал: „Дерек Шовин е прогласен за виновен!“

Прославата продолжила со огномет до доцна во ноќта на плоштадот Џорџ Флојд, спомен-местото на раскрсницата од Источната 38. улица и авенијата Чикаго во Минеаполис.

Преговарачитe на Советот на Европската унија и Европскиот парламент постигнаа договор за закон за климата според кој до 2030 година Унијата ќе ги намали емисиите на стакленички гасови за 55 проценти во споредба со 1990 година.

„Воодушевена сум што постигнавме договор за овој клучен елемент на Европскиот зелен план. Нашата политичка определба да станеме прв климатски неутрален континент до 2050 година сега е исто така законска обврска“, рече претседателката на Комисијата, Урсула фон дер Лајен.

Според договорот, целта е до 2030 година да се намалат стакленичките гасови за 55 проценти, во споредба со сегашните 40. Договорот ја потврди позицијата на Европскиот совет, кој во декември минатата година го поддржа предлогот на Комисијата за намалување од 55 проценти, додека првичната позиција на Европскиот парламент беше 60 проценти.

„Договорот исто така ја зајакнува нашата глобална позиција како лидер во справувањето со климатската криза. Кога светските лидери ќе се соберат на Денот на планетата Земја, ЕУ ќе излезе со оваа позитивна вест со која се надеваме дека ќе ги инспирираме нашите меѓународни партнери. Ова е добар ден за нашите луѓе и нашата планета“, рече извршниот потпретседател на Комисијата, Франс Тимерманс.

Во преговорите меѓу претставниците на земјите-членки и Европскиот парламент немаше напредок во последните неколку месеци, сè до последниот состанок, кој започна вчера рано попладне и заврши денеска во 5 часот наутро.

Законот допрва треба да биде официјално одобрен од Советот и Европскиот парламент.