Свет
Турција: Санкциите на ЕУ за турската поморска компанија се пристрасни

Турција денес ја критикува одлуката на Европската Унија за наметнувањето санкции врз турската поморска компанија обвинета за кршење на ембаргото за оружје за Либија воведено од ОН како доказ за двојни стандарди на ЕУ, пренесува РТ.
ЕУ претходно го замрзна имотот на „Аврасија шипинг“, чиј товарен брод „Циркин“ беше вклучен во поморскиот инцидент меѓу Франција и Турција и двете членки на НАТО во јуни. Брисел ја обвини компанијата дека го користела бродот за шверц на оружје во Либија. Анкара го негира тврдењето за трговија со оружје велејќи дека бродот носел хуманитарна помош.
„За нас нема вредност додавањето на нашата поморска компанија на списокот со санкции во контекст на Либија што произлезе од состанокот на Советот за надворешни работи на ЕУ. Многу жално што е донесена толку погрешна одлука кога се прават напори да се намалат тензиите во источен Медитеран. Операцијата ‘Ирини’ на ЕУ го поддржува либискиот воен лидер Калифа Хафтар и ја казнува владата за национално единство призната од ОН“, се вели во соопштението на турското Министерство за надворешни работи.
Воената операција, одобрена од министрите за надворешни работи на ЕУ на 31 март годинава, се спроведува од воздух, на море и со сателити за да се осигури дека сите земји ја почитуваат забраната за обезбедување оружје на страните вклучени во либискиот конфликт.
„Додека помошта што нашата земја ѝ ја дава на легитимната влада е опишана како кршење на ембаргото, игнорирањето на земјите и компаниите што му испраќаат оружје на пучистот Хафтар по копно и воздух, особено ОАЕ, е јасен показател за пристрасниот став на ЕУ“, велат од Министерството.
Во соопштението се вели дека ако ЕУ сака безбедност и стабилност во регионот, треба да се откаже од овој пристрасен став и да дејствува во консултација и соработка со Турција.
Сепак, ЕУ воведе санкции и за уште две други компании: казахстанската „Сигма ерлајнс“ и „Јорданс мед вејв шипинг“ и против двајца Либијци. Еден од нив е Махмуд ал-Верфали за кој ЕУ вели дека е командант во источна Либија, одговорен за убиството на 33 лица и едно масовно погубување. Вториот е Муса Дијаб кого официјалните претставници на ЕУ го обвинија за трговија со луѓе, силување и за убиство на бегалци.
Според либискиот премиер Фајез ал-Сараџ, иако операцијата има цел да го спроведе ембаргото на ОН за вооружување на завојуваните страни на Либија, главно се фокусира на поморските активности во Средоземното Море, а страната на Хафтар – непријател на легитимната либиска администрација – продолжува да прима оружје и муниција главно по воздух и копно, пренсува „Анадолија“.
Во Либија владее граѓанска војна од соборувањето на повеќедеценискиот лидер Моамер Гадафи во 2011 година. Во 2015 година беше формирана влада на национално единство според договорот предводен од ОН, но напорите за долгорочно политичко решение не успеаја поради воената офанзива од страна на силите лојални на пучистот Калифа Хафтар.
ОН ја признаваат владата предводена од премиерот Фајез ал-Сараџ како легитимен претставник на земјата што се бори против нападите на Хафтар. Дипломатските напори за постигнување решение за либискиот конфликт сè уште траат по низата победи на либиската Армија против милициите на Хафтар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
40 ранети во Израел, двајца критично

Вкупно 40 лица побарале медицинска помош по вечерашниот ирански ракетен напад врз Израел, соопштија локалните здравствени служби. Двајца од повредените се во критична состојба.
Најголем број пациенти се лекуваат во болницата Ичилов во Тел Авив – 18 лица.
Според лекарите, пријавените повреди вклучуваат рани од шрапнели, вдишување чад и состојба на шок.
Свет
Израелската војска: Иран истрела помалку од 100 балистички ракети, повеќето ги пресретнавме

Портпаролката на израелската војска, Ефи Дефрин, рече дека помалку од 100 балистички проектили биле истрелани од Иран кон Израел.
Дефрин рече дека „повеќето од ракетите биле пресретнати од воздушната одбрана или паднале пред да стигнат до израелска територија“.
„Регистрирани се ограничен број погодоци на згради, а дел од штетата е предизвикана од фрагменти од пресретнати проектили“, додаде тој.
Според израелските медицински служби, во нападот биле ранети 40 лица.
Свет
Нетанјаху: Ова е можност за иранскиот народ да се спротивстави на режимот

Израелскиот премиер Бенјамин Нетанјаху вечерва и порача на јавноста дека можат да ги напуштат засолништата, откако новиот бран ирански ракети прелета над израелска територија.
„Иранскиот режим никогаш не бил послаб. Ова е можност за иранскиот народ да се спротивстави на режимот“, рече Нетанјаху во вечерашното обраќање.
Тој директно им се обрати и на граѓаните на Иран: „Јас сум со вас, израелскиот народ е со вас“, рече тој.
Министерот за одбрана на Израел, Израел Кац изјави дека Иран „ја преминал црвената линија со лансирање ракети кон израелските цивилни области“ и најави: „Техеран ќе плати висока цена“.
Оваа иранска одмазда следеше по израелските воздушни напади на иранска територија, при што беа погодени нуклеарни постројки и беа убиени високи команданти и научници.