Свет
Украина одгледува свои саботери на руска територија

Киев одгледува свои саботери на територијата на Русија, чија задача е да организираат напади со беспилотни летала, тврди Си-ен-ен повикувајќи се на извори блиски до американските разузнавачки служби.
Американските извори сметаат дека за нападот на Кремљ со беспилотни летала се одговорни и проукраинските агенти од рускоа почва, односно тврдат дека беспилотните летала не пристигнале преку граница, туку дека, всушност, биле лансирани од руска територија.
Американците веруваат дека Украина развила диверзантски ќелии во Русија, кои се состојат од проукраински симпатизери и оперативци добро обучени за овој тип војување. Се верува дека тие биле снабдени со дронови од украинско производство од Киев, а двајца американски претставници велат дека нема докази оти во нападите биле користени дронови испорачани од САД.
Не е јасно како непријателските дронови пристигнале во Русија, но извори на Си-ен-ен уверуваат дека Украина воспоставила доброорганизрани канали за шверцување, кои би можеле да се користат за нивно пренесување.
Еден европски разузнавач потсетува дека поради должината на руско-украинската граница, тешко е да се контролира што се шверцува преку неа.
„Треба да земете предвид и дека ова е периферна област на Русија. Опстанокот е проблем на сите, па готовината прави чуда“, вели американскиот извор.
Соговорниците на Си-ен-ен не знаат кој точно ги контролира овие операции, но сметаат дека во сѐ се вмешани елементи од украинската разузнавачка заедница. Зеленски наводно поставил општа рамка за тоа што им е дозволено на неговите подредени, но тој лично не го одобрува секое од овие дејства.
Прашан за коментар, портпаролот на шефот на Украинската служба за безбедност рекол дека мистериозните експлозии и напади со дронови во Русија ќе продолжат цитирајќи го шефот на Службата за безбедност, Васил Маљук.
Бројот на напади на територијата на Русија е зголемен во последните неколку недели, а соговорниците на американските медиуми тврдат дека тоа е кулминација на неколкумесечните напори на Украинците да воспостават инфраструктура за вакви саботажи.
Со месеци се врши постојан притисок од лица во Украина, Киев да биде поагресивен, а меѓу оние што предлагаат операции е и шефот на воената разузнавачка служба на Украина, Кирило Буданов.
Обелоденетите доверливи документи на Пентагон открија дека ЦИА му наложила на Буданов да ги одложи нападите врз Русија планирани за годишнината од почетокот на специјалната воена операција.
Иако Буданов начелно се согласил, само неколку дена по тој датум, беа забележани дронови во близина на Москва.
Во друг извештај на американските разузнавачки служби објавен од Си-ен-ен се наведува дека на крајот од февруари Зеленски предложил напад со дронови врз руски локации во регионот Ростов бидејќи Украина наводно нема оружје со долг дострел способно да досигне толку далеку.
Не е јасно дали тоа се реализирало, но летала во текот на изминатата година нафтените постројки во Ростовската област беа запалени по напад од наводно украински беспилотни летала.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Се уште трае потрагата по хрватските планинари заробени од лавина на словенечките Алпи

Потрагата по двајцата исчезнати хрватски планинари во Јулиските Алпи продолжи утрово кратко по 7 часот, потврди Словенечката планинска служба за спасување за хрватски Индекс.
Вчера наутро, под врвот Тошќ во Јулиските Алпи беше предизвикана снежна лавина, при што беа затрупани тројца хрватски планинари.
За време на тешкото пребарување и спасување, еден планинар беше пронајден без знаци на живот, додека двајцата мажи сè уште се бараат.
Во потрагата денес е вклучен и хеликоптер.
Екипите веќе тргнаа кон локацијата, но точниот број на вклучени спасувачи сè уште не е познат.
Службата додава дека денешното време дозволува распоредување на хеликоптер, но условите во планините се сè уште нестабилни и постои ризик од нови лавини. Идентитетите на загинатиот планинар и двајцата исчезнати сè уште не се официјално потврдени, но неофицијално хрватските медоуми објавија дека двајцата мажи по кои се трага се браќа.
Шеф на спасувачката служба: Ситуацијата е сложена и опасна
Заменик-шефот на Словенечката планинска спасувачка служба, Клемен Белхар, изјави за ХРТ дека во областа има околу половина метар снег, што не звучи како многу, но создава висок ризик од лавини. Тој додаде дека во планините сè уште има групи алпинисти кои ќе бидат спасени денес и утре.
„Ситуацијата е доста сложена и опасна“, рече Белхар. На прашањето дали има надеж дека преостанатите двајца Хрвати по кои сè уште се трага се сè уште живи, тој одговори: „Секако ќе се однесуваме како да се живи, но колку надеж има, никој не знае“.
Свет
Захарова ја исмеа изјавата на Мерц за руските дронови над Германија

Портпаролката на руското Министерство за надворешни работи, Марија Захарова, одговори со карактеристично остар тон на сугестијата на германскиот канцелар Фридрих Мерц дека Русија би можела да стои зад серијата инциденти со беспилотни летала над Германија, објави рускиот весник „Комерсант“, пренесува „Европска правда“.
Мерц претходно изјави дека верува оти Русија е многу веројатно одговорна за летовите на бројни беспилотни летала забележани над германска територија.
Коментирајќи ја изјавата, Захарова рече дека Германија веројатно ќе ја заврши својата истрага за инцидентите со беспилотни летала во следниот век.
Таа направи паралела со истрагата за експлозиите на гасоводот „Северен тек“, истакнувајќи дека Берлин сè уште не утврдил кој е одговорен, сугерирајќи дека истрагата за беспилотните летала ќе трае исто толку долго.
Изјавите доаѓаат по неодамнешните настани што ги зголемија тензиите. За потсетување, доцна навечер на 2 октомври, аеродромот во Минхен привремено ги прекина операциите поради присуството на едно или повеќе неидентификувани беспилотни летала во негова близина. И покрај инцидентите, германскиот министер за одбрана, Борис Писториус, апелираше до јавноста за смиреност.
Фото: ЕПА
Свет
Меркел: Дали Путин ќе ја нападнеше Украина ако не се случеше пандемијата на коронавирус?

Поранешната германска канцеларка, Ангела Меркел, даде интервју за унгарскиот медиум „Партизан“. Меѓу другото, таа зборуваше за конфликтот во Украина.
„Во јуни 2021 година, почувствував дека Путин повеќе не го сфаќа сериозно Минскиот договор и затоа сакав нов формат, тогаш заедно со претседателот Макрон, каде што ќе разговараме директно со Путин како Европска Унија“, рече Меркел.
Сепак, таа тврди дека наишла на отпор. „Некои луѓе не го поддржаа. Тоа беа првенствено балтичките држави, но и Полска беше против него. Овие четири земји се плашеа дека нема да имаме заедничка политика кон Русија“, рече таа.
„Во секој случај, новиот формат не се материјализираше. Јас ја напуштив функцијата, а потоа започна агресијата на Путин“, додаде таа.
Во интервјуто, Ангела Меркел постојано нагласуваше колку е важно, според неа, да се одржува дијалогот, дури и меѓу спротивставените табори.
Таа, исто така, постојано нагласуваше дека избувнувањето на пандемијата на коронавирусот предизвика прекин на многу комуникациски канали и затегнати меѓународни односи. Видеоконференциите, рече таа, не се замена за разговорите лице в лице.
„Дали Путин ќе ја нападнеше Украина ако не се случеше пандемијата на коронавирус? Никој не може да каже. Коронавирусот ја промени светската политика затоа што повеќе не можевме да се среќаваме“, тврди таа.
Меркел истакна дека самиот Путин не учествувал на самитот на Г20 во 2021 година „од страв од пандемијата на коронавирус“.
„Ако не можете да се среќавате и да ги решавате разликите во мислењата, тогаш повеќе не можете да најдете нови компромиси. Видеоконференциите не се доволни во таква ситуација“, смета Меркел, која беше канцелар од ноември 2005 до декември 2021 година.
Фото: ЕПА