Северна Кореја утрово испалила неколку балистички проектили со краток дострел кон морето на источниот брег, соопшти јужнокорејската војска. Ова е прво лансирање од мај годинава и претставува уште едно игнорирање на меѓународната забрана за развој на вакво оружје, која ја поддржуваат САД и Јужна Кореја.

Инцидентот се случува една недела пред одржувањето на самитот на АПЕК во Јужна Кореја, каде што ќе се сретнат претседателите Доналд Трамп, Ли Џе Миунг и кинескиот лидер Шји Џинпинг.

Според Здруженото командување на Јужна Кореја, проектилите биле лансирани од подрачје во близина на Пјонгјанг кон североисток. Се наведува дека Сеул ги споделува сите податоци со САД и Јапонија.

Новата јапонска премиерка Санае Такаичи изјави дека ракетното тестирање „не влијаело на безбедноста на Јапонија“ и дека Токио разменува информации во реално време со Вашингтон.

Северна Кореја последен пат лансираше балистички ракети на 8 мај, а годинава на воена парада го претстави својот нов интерконтинентален проектил, на која присуствувал и кинескиот премиер.

Американскиот потпретседател Џеј Ди Ванс изјави дека Хамас ќе биде уништен доколку не соработува во спроведувањето на мировниот план меѓу Израел и палестинската група, заснован на иницијативата на американскиот претседател Доналд Трамп.

Ванс вчера го посети новоформираниот координациски центар во Израел, заедно со пратеникот на Трамп, Стив Виткоф, и советникот Џеред Кушнер. Тој изјави дека примирјето постигнато на почетокот на октомври е „понадежно од очекуваното“, но призна дека не знае кој ќе управува со Газа во иднина.

„Мораме да ја обновиме Газа и да обезбедиме стабилност и безбедност за сите“, рече Ванс, додавајќи дека долгорочното управување ќе се решава подоцна.

Иако двете страни повторно ја потврдија својата посветеност на примирјето, Ванс предупреди дека Хамас ќе биде уништен ако не ги почитува условите. Слична порака испрати и Трамп, кој најави дека САД ќе испратат тешки сили во Газа доколку групата го прекрши договорот.

Според планот, Хамас треба да се разоружа и да се откаже од контролата врз Газа, но привремено може да остане како безбедносна сила.

Москва ја обвини Полска дека се заканува со „терористички акт против авионот на Владимир Путин“, откако полскиот министер за надворешни работи Радослав Сикорски изјави дека безбедноста на авионот на рускиот претседател не би можела да се гарантира доколку би прелетувал над Полска кон Будимпешта, на планираниот, но сега веќе откажан, состанок со Доналд Трамп.

Рускиот министер Сергеј Лавров рече дека „Полјаците сега се подготвени да извршат терористички акти“, повикувајќи се на одлука на полски суд што, според него, „го оправдува нападот на гасоводот Северен тек“.

Сикорски претходно изјави дека не може да гарантира дека независен полски суд нема да нареди принудно слетување на авионот на Путин за да биде приведен и предаден на Меѓународниот кривичен суд во Хаг.

Иако состанокот меѓу Трамп и Путин во Будимпешта е откажан, Кремљ реагираше остро. Портпаролот Дмитриј Песков изјави дека „нема потреба од брзање“ и дека ваква средба бара „сериозна подготовка“.

Односите меѓу Русија и Полска се дополнително затегнати поради полската поддршка за Украина, додека Москва сè уште не го признава налогот за апсење на Путин издаден од Хаг во 2023 година.