Комисијата за заштита на населението од Ковид-19 на предлог на Институтот за јавно здравје, денеска донесе нови мерки.

Според нив, неколку градови во Црна Гора ќе бидат во карантин, вклучувајќи ги Подгорица, Цетиње и Херцег Нови.

Како што беше соопштено, забраната ќе стапи на сила во вторник, на 2 март, а покрај мерките што продолжуваат да важат во општините Будва и Тиват, на граѓаните ќе им биде забрането да ги напуштаат и териториите на Подгорица, Цетиње, Улцињ, Херцег Нови, Никшиќ и Плужине, пренесува „Вијести“. Целосно забранета ќе биде работата на угостителските објекти.

Овие мерки ги ослободуваат оние граѓани кои го напуштаат градот поради редовни работни задачи и врз основа на потврда на работодавачот, понатаму лицата кои одат на преглед со медицинска документација или се грижат за лица кои не можат да се грижат за себе поради болест или повреда.

Ослободени се и студентите кои патуваат од своето место на живеење до седиштето на високообразовната установа, врз основа на потврда на таа институција, односно уредно пополнетиот и заверен индекс.

Агенцијата за јавно здравје на Англија објави дека е потврдено присуство на бразилскиот сој на коронавирус, кај шест пациенти во Велика Британија, пренесува „Гардијан“.

Весникот наведува дека три случаи на зараза со новиот вид биле откриени во Англија и три во Шкотска.

Повеќе од 20 милиони луѓе во Велика Британија примиле барем една доза вакцина против коронавирусот, објави денеска министерот за здравство, Мет Ханкок.

„Ова е величествено достигнување за нашата земја. Вакцината е нашиот излез. Кога ќе добиете покана, вакцинирајте се“, напиша Ханкок на „Твитер“.

Критичарот на Кремљ, Алексеј Навални пристигна во казнена колонија на околу 100 километри источно од Москва, каде ќе ја издржува затворската казна во траење од две и пол години, јави Ројтерс, цитиран од РИА Новости.

Претходно денес, сојузникот на Навални, Леонид Волков, на социјалните мрежи изјави дека семејството и адвокатите на Навални не биле официјално известени за неговата локација.