Американскиот државен секретар, Мајк Помпео, денеска изјави дека, иако Иран несомнено е одговорен за минатонеделните напади врз два танкери на нафта, САД не сакаат војна со Техеран.

„Претседателот Трамп направи сè за да избегне војна. Ние не сакаме војна“, изјави Помпео во интервју за телевизијата „Фокс“.

Тензиите меѓу САД и Иран го достигнаа врвот откако администрацијата на Доналд Трамп го обвини Техеран дека во четвртокот изврши напад врз два танкери за нафта во Оманскиот залив. Иран отфрла одговорност за нападот.

Помпео додаде дека не сака да зборува за идните потези на Вашингтон.

Запрашан дали САД ќе испратат повеќе војници и оружје во регионот, тој рече дека Иран има за цел да нема нуклеарно оружје.

Европската унија (ЕУ) треба да преземе конкретни мерки против Турција, ако таа земја продолжи со нелегалното однесување во источниот Медитеран, рече грчкиот премиер Алексис Ципрас.

„Клучниот столб на нашата позиција е почитување на меѓународното право и секој што не го почитува треба да се соочи со последиците“, рече Ципрас на самитот на јужните земји од ЕУ што се одржува во Малта.

Говорејќи пред лидерите на Кипар, Франција, Италија, Малта, Португалија и Шпанија, рече дека инсистирањето на Турција за истражување на природниот гас на кипарското крајбрежје не претставува билатерално прашање на Кипар и Турција, ниту на Грција и Турција, туку дека тоа е прашање на ЕУ.

„Грција изрази целосна поддршка на кипарскиот претседател Никос Анастасиадис“, рече Ципрас.

Сопругата на премиерот на Израел, Бенјамин Нетанјаху, Сара Нетанјаху, е казнета со 15.000 долари за злоупотреба на државни фондови.

Судот во Ерусалим ја прифати спогодбата што Сара ја постигнала со обвинителството откако признала дека злоупотребила 100.000 долари државни пари за скапа храна во ресторани.

Канцеларијата на државниот обвинител сопшти дека сопругата на премиерот ќе плати дополнителна казна за да се затвори случајот во кој е обвинета дека нарачувала храна од луксузен ресторан иако во резиденцијата имало вработено готвач.

Нетанјаху, пак, е соочен со можни обвиненија за одвоени случаи на корупција.