Свет
„Фејсбук“ ја најави својата нова виртуелна валута либра
Гигантот „Фејсбук“ објави дека лансира дигитална валута наречена либра; новата криптовалута се очекува да им помогне на милијарди корисници на социјалните мрежи во спроведувањето на меѓународните трансакции, пренесува „Спутник“.
Како и кај повеќето криптовалути, либра ќе биде управувана и обезбедена од страна на кој било учесник што има пристап до компјутер.
Со оглед на тоа дека „Фејсбук“ го користат околу 2 милијарди луѓе, неговата планирана криптовалута либра може да стане значајна златна кокошка за социјалните мрежи и потенцијално да го измени својот конвенционален финансиски модел.
Во меѓувреме, потегот на „Фејсбук“ да се вклучи во финансискиот сектор ги натера британските и американските власти да ја искажат својата загриженост. Минатиот месец Комитетот за банкарство, домување и урбани прашања на американскиот Сенат му се обрати на главниот извршен директор на „Фејсбук“, Марк Цукерберг, во писмо со кое бара одговор за регулацијата на приватноста и финансиите на социјалните мрежи.
„Важно е да се разбере како големите социјални платформи ги прават достапни податоците што може да се користат на начин што има големи последици врз финансискиот живот на потрошувачите. Исто така, важно е да се разбере како големите социјални платформи ги користат финансиските податоци за профилот и целните потрошувачи“, се вели во писмото.
Најавата на „Фејсбук“ доаѓа откако потпретседателот на американската фирма за Европа, Никола Менделсон, претходно месецов изјави дека компанијата ќе отвори уште 500 нови работни места во Лондон.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Украинската амбасада: Нема планови за посетата на Зеленски на САД
Украинската амбасада во Вашингтон соопшти за „Kyiv Independent“ дека засега нема планови за посета на украинскиот претседател Володимир Зеленски на САД, но дека ниту една опција не е исклучена.
Одговорот следи по извештаите во американските медиуми дека Зеленски би можел да отпатува во САД оваа недела за разговори со американскиот претседател Доналд Трамп за мировните напори.
Според наведените извештаи, Зеленски и Трамп требало да разговараат за чувствителните делови од мировниот план поддржан од САД, кој предизвика негативни реакции поради условите што се смета дека ѝ одат во прилог на Русија.
Првичниот документ од 28 точки е намален на 19 точки по вчерашните консултации меѓу украинските и американските претставници во Женева.
Регион
Бугарија ја продолжи забраната за извоз на клучни лекови
Бугарија ја продолжи забраната за извоз на инсулини, инсулински аналози и група антибиотици до 23 јануари наредната година, според налог на министерот за здравство Силвио Кирилов. Министерството соопшти дека забраната повторно се продолжува поради проблеми со снабдувањето, пријавени недостатоци и одбивања од веледрогерии.
Како причини се наведуваат неправилности и доцнења во испораките, како и намалени количини нарачани лекови. Забраната ги опфаќа инсулините и нивните аналози, SGLT2-инхибиторите и лековите на база семаглутид, како и антибиотиците на база азитромицин. Забранет е и извозот на месалазин.
Забраната за извоз на инсулини првпат беше воведена во ноември 2023, а потоа повеќепати продолжувана.
Свет
Пакистан: Тројца бомбаши-самоубијци го нападнаа седиштето на паравоените сили
Тројца бомбаши-самоубијци денес го нападнаа седиштето на паравоените сили во Пешавар, при што загинаа три припадници, а најмалку петмина беа ранети, пренесе „Ројтерс“. Напаѓачите прво отвориле оган на влезот, а потоа се разнеле во кругот на комплексот на граничната полиција.
Полицијата соопшти дека напаѓачите се пробиле во објектот по првичната престрелка. Областа е блокирана од армијата и полицијата, а според локални извори се сомнева дека во комплексот можеби има уште напаѓачи. Ранетите, меѓу кои и двајца припадници на паравоените сили, се пренесени во болница.
Нападот се случува во време на зголемена активност на исламистички милитанти во регионот, по смртоносните погранични судири меѓу Пакистан и Авганистан минатиот месец. Досега ниту една група не презеде одговорност.

