Свет
Холандија: Висок ризик од големи прекини на електричната енергија по 2030 година

Холандија се соочува со висок ризик од големи прекини на електричната енергија по 2030 година доколку енергетските компании не добијат средства за одржување на гасните електрани во функција, според извештајот објавен денес од меѓународната консултантска компанија Kompas leksekon за здружението Energi Nederland.
Според анализата, во следните пет години снабдувањето со електрична енергија во Холандија ќе биде доволно дури и во периоди без сонце и ветер, но по тој период ситуацијата би можела одеднаш да се влоши, објавува „НЛ тајмс“.
Холандија планира да ги затвори последните три термоелектрани на јаглен до 2029 година, а електраните на гас стануваат сè помалку профитабилни поради проширувањето на капацитетот на ветерните фарми и сончевите панели.
Во исто време, потрошувачката на електрична енергија бргу расте, а бројот на топлински пумпи и електрични возила се зголемува.
Процените покажуваат дека Холандија веќе би можела да се соочи со 15 до 18 часа годишен недостиг на електрична енергија до 2033 година, што е четирипати повеќе од прифатливиот максимум од четири часа.
Ова би предизвикало неконтролирани прекини во снабдувањето и екстремно високи цени на електричната енергија.
Во овој момент сигурноста на системот е 99,99 проценти.
Операторите го одложуваат големото одржување на гасните електрани бидејќи тоа повеќе не е профитабилно за нив поради брзото зголемување на употребата на ветерна и сончева енергија, предупредува претседателката на „Енерџи Холанд“, Кора ван Нивенхаузен, и додава дека извештајот претставува сериозно предупредување.
Kompas lexekon предлага воведување пазарен механизам што би обезбедил плаќања на операторите за работа во периоди кога обновливите извори не може да ја задоволат побарувачката и би стимулирал нови инвестиции во електрани и системи за складирање енергија од батерии (BESS).
Се проценува дека социјалната корист од споменатите мерки изнесува од 2,5 до 3 милијарди евра годишно преку пониски цени и намалување на ризикот од прекини на електричната енергија.
Истражувачите заклучуваат дека превенцијата е подобра од лекувањето, односно дека е поповолно да се реагира и да се инвестираат ресурси сега бидејќи евентуалното санирање на последиците би можело да биде многу поскапо.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Германија: Илјадници лица го променија полот во првата година од новиот закон

Во изминатата година, откако стапи во сила новиот закон за самоопределување, илјадници граѓани во Германија го променија својот пол и идентитет, јавува Католичката новинска агенција (KNA).
Само во Берлин над 2.500 лица поднеле барање за промена на пол и идентитет, а во Лајпциг и Келн бројот изнесува околу илјада, односно седумстотини. Најмногу барања биле поднесени веднаш по стапувањето на законот на сила на 1 ноември минатата година.
Според законот, секој граѓанин може со едноставно барање до матичарот да ја смени ознаката за пол во документите — во машки, женски, „разно“ или без наведување.
До донесувањето на овој закон, за промена на пол биле потребни две психијатриски вештачења и судска одлука.
Христијанско-демократската унија (CDU/CSU) која сега е на власт, најави дека ќе го преиспита законот до крајот на 2026 година.
Законот предизвика меѓународно внимание по случајот на неонацистот Свен Либих, кој пред да оди во затвор формално го смени полот за да биде сместен во женски оддел, но потоа не се појавил во затворот, поради што е распишана потерница.
Свет
Русин со УСБ полно со податоци избегал во Франција, пронајден во тешка состојба

Рускиот дезертер и поранешен воен лекар Алексеј Жилјаев, кој на новинари им предал база на податоци од Главната воено-медицинска управа на руското Министерство за одбрана, е хоспитализиран во Франција во тешка состојба, јави Радио Москва.
Според извор запознаен со случајот, Жилјаев не може да оди и го загубил помнењето, а неговите пријатели и познаници го барале со месеци, откако му се загубила секоја трага. Причината за неговата состојба сè уште не е позната, но лекарите ја исклучиле можноста за труење.
Пред исчезнувањето, Жилјаев активно истапувал во медиумите. Раскажал дека кон крајот на 2023 година доброволно заминал во војната откако на железничка станица во Санкт Петербург видел група воени инвалиди. Како студент по медицина, почувствувал дека мора да ги искористи своите знаења на фронтот, иако тврдеше дека „секогаш бил против режимот“ и учествувал на протестите на Навални.
Во август 2024 година добил неофицијално отсуство и повеќе не се вратил во единицата. Се поврзал со претставници на организацијата „Идите шумом“, кои му помогнале да избега во Франција, каде што побарал азил.
Портпаролот на организацијата, Иван Чувиљаев, потврдил дека тие му помогнале при бегството: „Не би рекол дека приказната беше нешто посебна — повеќе типична. Имаше долгови, кредити, му било непријатно отворено да зборува за тоа. Потоа беше пратен во евакуациска група, таму се нагледал ужаси, разви јасен посттрауматски стрес. Нашите психолози работеа со него“, изјавил Чувиљаев.
Жилјаев од Русија изнесол УСБ со база на податоци од Главната воено-медицинска управа, која содржи информации за 166.000 пациенти што поминале низ воените болници во Русија и на анектираниот Крим.
Како што објаснил, податоците се пренесуваат преку затворен систем за размена, наречен ЗСПД, кој користи стандарден електронски протокол (SMTP и POP3). Новинарите на Радио Слободна Европа ја потврдиле автентичноста на базата.
Засега нема докази дека Жилјаев бил нападнат.
Свет
Специјалци вежбале, па по грешка упаднале во училиште и ги исплашиле децата: „Мислеа дека се статисти кои добро глумат“

Полициска вежба во чешкиот град Варнсдорф заврши како вистински фијаско, откако специјалците влегоа во погрешно училиште, предизвикувајќи паника меѓу учениците и професорите.
Според чешките медиуми, полицијата организирала симулација на апсење на вооружен напаѓач во областа Дечин. Планот бил акцијата да се одвива во зградата на поранешно основно училиште, но полицајците грешка влегле во соседната гимназија.
Во таа гимназија никој не бил известен за вежбата – ниту вработените, ниту учениците, пренесува порталот Novinky.
„Полицајците ѕвонеле на вратата, а кога домарот им отворил, едноставно влетале внатре. Професорите и учениците беа шокирани, не знаеја што се случува. Полицајците, пак, мислеа дека се работи за статисти кои добро глумат. Дури по неколку минути сфатија дека нешто не е во ред, а потоа командирите им јавија дека влегле во погрешна зграда“, изјавил градоначалникот на Варнсдорф, Јан Шимек.
Откако сфатиле дека се во грешно училиште, специјалците ја напуштиле гимназијата и преминале во објектот каде што првично требало да се одржи вежбата.
Заменик-градоначалникот Јири Сухарда објаснил дека во истиот комплекс се наоѓаат повеќе образовни институции – гимназија, градинка и поранешно основно училиште.
„Првата единица едноставно ги помешала објектите. Сè се разјасни брзо, полицијата реагираше коректно и веднаш се извини. Не е пријатно, но има и полоши ситуации“, изјавил Сухарда.
Инцидентот го потврдила и чешката полиција, наведувајќи дека се работи за човечка грешка.
„За време на вежбата, екипата влезе во зграда која не беше дел од сценариото. Директорот на полициската управа во Дечин веднаш стапи во контакт со раководството на училиштето и се извини за непријатноста што можела да ја предизвика ситуацијата,“ изјавил портпаролот Камил Марек.