Европа
Целосно заклучување во Италија за време на велигденските празници
Италија ќе биде во општ карантин за време на велигденскиот викенд, покажува нацрт-декрет во кој агенцијата „Ројтерс“ имала увид денеска.
Владата во Рим се бори против забрзаното ширење на коронавирусот низ целата земја, па продавниците кои не продаваат неопходни производи ќе бидат затворени од 3 до 5 април.
Тие денови на Италијанците ќе им биде дозволено да ги напуштат своите домови само за работа, здравствена нега или некои други итни случаи.
Во нацрт-декретот, што треба да биде усвоен во текот на денот, се наведува дека од понеделник ограничувањата ќе бидат засилени и во жолтите региони, оние каде ризикот од инфекција е мал. И во нив движењето меѓу градовите ќе биде строго ограничено, а кафулињата и рестораните ќе бидат затворени.
Покрај ограничувања на национално ниво, Италија применува мерки и во одделни региони, засновани врз систем од четири бои за нивно обележување, кои се ревидираат секоја недела – бела, жолта, портокалова и црвена.
Од вкупно 20 региони, три на југот се црвени, 10 се портокалови, шест се жолти, а само Сардинија е бела, покажува мапата на интернет-страницата на италијанската влада.
Според податоците на Европскиот центар за превенција и контрола на болести (ECDC) од четвртокот, во последните две недели Италија има просечно 433 новозаразени на 100.000 жители.
На истата листа, Чешка е најлоша со 1.572 новозаразени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Видео) Украински дронови уништија два руски топа 25 километри зад линијата на фронтот
Борците на 100. посебна украинска механизирана бригада успеаја да употребат беспилотни летала за да уништат две руски самоодни „хаубици“ длабоко зад линијата на фронтот.
Видео прикажува беспилотни летала како уништуваат два топа 2S7 Pion, кои се сметаат за еден од најсилните во светот.
Како што е соопштено, овие артилериски системи биле распоредени на околу 25 километри зад линијата на фронтот, во близина на украинскиот град Хорливка.
Овој украински град е под руска контрола.
Украинската војска соопшти дека овие топови биле уништени од дронови „Немесис“.
Европа
Атентат во Австрија: ловец со пушка го уби градоначалникот
Градоначалникот на Кирхберг, Франц Хофер, е убиен во денешниот напад во Австрија поради што полицијата почнала голема операција.
Како што е потврдено за „Кроне“, напаѓачот е во бегство.
Веднаш по страшното откритие, на местото се испратени сите полициски единици. Исто така, алармирани се и специјалните единици, а на местото на злосторството пристигна и блиндиран автомобил „кобра“.
Ловецот, кој бил на нива или во шума, по пукањето, се упатил во непознат правец.
Нападот се случил околу 9.15 часот.
Канцеларијата на гувернерот на државата, Томас Стелцер, потврди за „Кроне“ во 9.45 часот дека е убиен градоначалникот на Кирхберг.
Европа
Голем експеримент на Исланд: воведоа четиридневна работна недела, објавени резултатите
Економијата на Исланд расте побрзо од повеќето европски земји по воведувањето на пократка работна недела без намалување на платите, покажаа резултатите од истражувањето објавени во петокот. Според Си-ен-ен, помеѓу 2020 и 2022 година, 51% од работниците во земјата се согласиле да учествуваат во експеримент во кој работеле четири дена во неделата за иста плата.
Минатата година Исланд забележа побрз економски раст од повеќето европски земји, а стапката на невработеност е една од најниските во Европа, објавија Autonomy институтот со седиште во Велика Британија и Асоцијацијата за одржливост и демократија на Исланд (Алда). „Ова истражување покажува вистински пример за успех: пократкото работно време стана норма во Исланд, а економијата е силна според голем број индикатори“, вели Гудмундур Д. Харалдсон, истражувач во Алда.
Во двата претходни големи експерименти спроведени помеѓу 2015 и 2019 година, вработените во јавниот сектор во Исланд работеа 35-36 часа неделно, без намалување на платата. Многумина од нив работеа 40 часа неделно пред тоа.
Експериментите вклучија 2.500 луѓе – повеќе од 1% од работоспособното население на Исланд во тоа време – и беа насочени кон одржување или зголемување на продуктивноста, а истовремено подобрување на рамнотежата помеѓу работата и животот. Истражувачите откриле дека продуктивноста останала иста или подобрена на повеќето работни места, додека благосостојбата на работниците значително се зголемила во различни аспекти, вклучително и намалување на стресот и подобрување на здравјето и рамнотежата помеѓу работата и животот.
По експериментите, исландските синдикати преговараа за намалување на работното време за десетици илјади нивни членови низ целата земја.
Во 2023 година, економијата на Исланд порасна за 5%, што ја прави втора највисока стапка на раст меѓу богатите европски економии. Ова е значително повисока од просечната стапка на раст на земјата од речиси 2% во периодот помеѓу 2006 и 2015 година.
Сепак, ММФ предвидува значително побавен раст на Исланд оваа и следната година. „Се предвидува забавување на растот во 2024 година поради натамошното намалување на домашната побарувачка и забавување на растот на потрошувачката на туризмот“, наведува ММФ.
Ниската стапка на невработеност на Исланд е силен показател за економската виталност, додаваат од Институтот и Алда. Имаше бројни експерименти со четиридневната работна недела ширум светот, вклучително и успешен експеримент во 2022 година во 33 компании, главно од Соединетите Американски Држави и Ирска.