Германската канцеларка Ангела Меркел изрази голема загриженост денеска во врска со здравствената состојба на рускиот опозициски политичар Алексеј Навални.

„Германската влада, заедно со другите, врши притисок да му се обезбеди соодветна медицинска нега“, рече Меркел пред Парламентарното собрание на Советот на Европа.

Таа исто така го оцени како многу алармантно групирањето на руски трупи на границата со Украина.

Меркел рече дека е важно да се задржи дијалог на таа тема.

Само 10 проценти од новозаразените со коронавирус во Австрија се на возраст над 65 години, што укажува на тоа дека кампањата за вакцинација во таа земја почнува да функционира.

Од 17.135 новозаразени минатата недела, 10,2 проценти, или 1.743, биле на возраст над 65 години, што укажува на тоа дека вакцината почнува да дејствува.

Меѓу граѓаните постари од 85 години, 71 процент од мажите и 65 проценти од жените ја примиле барем првата доза на вакцината.

Во возрасната група помеѓу 75 и 84 години, вакцинирани се 69 проценти од мажите и 67 проценти од жените, а во возрасната група од 65 до 75 години, 44 проценти од мажите и 42 проценти од жените биле вакцинирани.

Во Австрија, 1,76 милиони граѓани, односно 23,36 проценти од населението, ја примиле првата доза на вакцината досега. Дадени се две дози на 718.314 лица – 9,54 проценти од населението.

Учеството на млади под 25 години меѓу новите случаи сега е 30,7 проценти.

Просечната возраст на нови случаи во Австрија минатата недела беше 37,6 години, а до пред една година 56,7 години.

Чешката влада објави дека го исклучува рускиот „Росатом“ од тендерот за нуклеарна централа вредна повеќе милијарди евра и се откажа од набавка на руската вакцина „спутник В“, во услови на дипломатски конфликт со Москва.

Одлуката е донесена по неколку меѓусебни протерувања на дипломати, откако Прага ги обвини руските тајни служби за смртоносната експлозија во Врбетице во 2014 година, во која загинаа две лица.

„Нема да бараме документи за проценка на безбедноста од ‘Росатом’“, им рече на новинарите чешкиот министер за индустрија и трговија, Карел Хавличек.

По одлуката за исклучување, договорoт за изградба на нова единица во нуклеарната централа „Дуковани“ на југот од Чешка до 2036 година, можеби ќе биде склопен со францускиот ЕДФ, јужнокорејскиот КХНП и американскиот „Вестингхаус“.

Чешкиот министер за надворешни работи, Јан Хамачек, објави и дека неговата земја сега веќе нема намера да ја набави руската вакцина против Ковид-19, „спутник В“.

„Ќе се потпреме на вакцините одобрени од Европската агенција за лекови, ЕМА“, додаде тој.

Употребата на „спутник В“ предизвика превирања на чешката политичка сцена.

Пред една недела, чешкото претседателство објави смена на министерот за надворешни работи, Томаш Петричек, кој беше против употребата на таа вакцината без одобрение во Европа.