Царините во Германија и Белгија заплениле рекордни 23 тони кокаин наменети за трговија во Холандија, пренесува Би-би-си.

Германските власти откриле 16 тони во пет транспортни контејнери што претходно месецов пристигнале во пристаништето во Хамбург од Парагвај. Веднаш била известена полицијата во Холандија, а во белгиското пристаниште Антверпен биле запленети уште 7,2 тони кокаин.

Германските власти соопштија дека уличната вредност на кокаинот се проценува на милијарди евра.

Во Антверпен, дрогата билa скриенa во контејнер исполнет со дрвени блокови од Панама.

Кокаинот пронајден во Хамбург бил скриен во конзерви кои содржеле гипс што се користи за пополнување на пукнатини во ѕидови.

Уапсен е 28-годишен маж осомничен за вмешаност во трговијата со рекордната количина кокаин, соопшти холандската полиција. Според извештаите на медиумите, станува збор за холандскиот државјанин Атиф С.

Европол денеска објави дека 38 лица се уапсени во Франција, Романија и Молдавија под сомнение дека се членови на криминална организација што шверцувала и експлоатирала работници мигранти, пренесува Ројтерс.

Во разбивањето на оваа организирана криминална група учествуваа полицајци, кои се обвинети за криумчарење мигранти, трговија со луѓе заради трудова експлоатација, измама со документи, социјални бенефиции и перење пари, се вели во соопштението на Европол.

Од 8 март Финска воведува мерка на затворање на јавниот и економски живот во период од три недели, поради зголемувањето на бројот на лица заразени со коронавирусот, објави премиерот Сана Марин.

Блокадата нема да вклучува полициски час, но рестораните ќе бидат затворени, додека учениците на возраст од 13 години и постари ќе мора да преминат на настава од далечина, се вели во соопштението.

Покрај зголемениот број на заразени, експертите предупредуваат дека во Финска се појави нова мутација на коронавирусот. Оваа варијанта е означена како „фин-796Х“ и претставува мутирана форма на претходни соеви кои се откриени во Велика Британија и Јужна Африка.

Откриено е дека овие соеви се пренесуваат полесно отколку претходните форми на коронавирусот.