Двe момчиња на возраст од 12 и 13 години се пренесени во болница откако денес биле избодени со нож во средното училиште „Кингсбери“ во Брент, северен Лондон, објави Би-Би-Си.

Полицијата добила пријава за нападот околу 12:40 часот по локално време. Првичните информации укажувале дека е повреден еден 13-годишник, но подоцна било утврдено дека на истото место бил нападнат и 12-годишен ученик.

Двајцата се згрижени од службите за итна помош и пренесени во болница, а полицијата очекува дополнителни информации за нивната здравствена состојба.

Од полицијата соопштија дека осомничениот е идентификуван и дека станува збор за тинејџер, по кого интензивно се трага.

Детективот Лук Вилијамс изјави дека е свесен оти нападот ќе предизвика „значителна загриженост“ во локалната заедница.

„Сакаме да ги смириме локалните ученици, родителите и жителите. Ангажиравме значителни полициски сили во областа и правиме сè што можеме за да го пронајдеме осомничениот“, рече тој.

„Нашите мисли се со повредените момчиња и сакам да им се заблагодарам на болничарите и лекарите кои се грижат за двајцата“, додаде Вилијамс.

Британката Луси Харисон (23) од Ворингтон била застрелана во градите на 10 јануари минатата година во домот на својот татко во Проспер, Тексас, објави Би-Би-Си.

На истражното рочиште во Велика Британија било речено дека претходно истиот ден таа се скарала со него околу Доналд Трамп и неговите ставови за оружје.

Нејзиниот партнер Сем Литлер сведочел дека расправијата била „жестока“ и дека Луси била вознемирена поради ставовите на татко ѝ. Подоцна, непосредно пред да заминат кон аеродром, таткото ја одвел во својата спална соба, по што се слушнал истрел. Литлер изјавил дека ја затекнал Луси на подот, додека таткото врескал.

Полицијата во Тексас ја истражувала смртта како можно убиство од небрежност, но големата порота во округот Колин одбила да покрене обвинение против таткото, Крис Харисон.

Истрагата се очекува да заврши во вторник.

Во Италија се покренати три истраги за да се разјасни зошто срцето донирано на двегодишно момче во болницата „Моналди“ во Неапол не можело да се трансплантира, објавува локалниот портал „НаполиТудеј“.

Според информациите од обвинителството во Неапол, органот е доставен во оштетена состојба, а момчето во моментов е поврзано на машина за одржување во живот, чекајќи нов соодветен донатор.

Адвокатот на семејството, Франческо Петручи, наведува дека на родителите им било кажано дека срцето е имплантирано, што е еден од аспектите што се истражуваат.

На судско ниво, истрагите се спроведуваат во три насоки – во Неапол, во Болкано, каде што е експлантирано срцето на донорот, а се спроведува и внатрешна административна истрага во болницата „Моналди“, која привремено ги суспендираше трансплантациите на срце кај децата.

Според досегашната реконструкција, срцето донирано од четиригодишно момче кое почина во Вал Вености наводно било неправилно складирано и транспортирано.

Наместо мраз, кој традиционално се користи за одржување на температурата на органот, се користел сув мраз, контактот со цврст јаглерод диоксид го оштетил срцевото ткиво, што ја направило трансплантацијата невозможна и покрај напорите на медицинскиот тим од Неапол.

Здравствената администрација на Јужен Тирол истакнува дека процедурите за донација и трансплантација се спроведуваат според строги протоколи, а техничката и правната одговорност за зачувување и транспорт на органи главно му припаѓа на тимот на болницата што го прима органот, додека институцијата-донатор обезбедува операциони сали и логистичка поддршка.

Техничките и судските истраги ќе ја утврдат евентуалната одговорност.