Во слабо осветлена просторија десетина мажи во руски воени униформи и скриени лица стоеја околу војник кој читаше писмо упатено до претседателот Владимир Путин.

„Ние сè уште не сме добиле оружје и муниција до денес“, рече човекот, чија единица сега е стационирана во Донецк, во источна Украина.

„Бараме нашите момчиња да се повлечат од овој напад бидејќи ги немаат потребната обука или искуство“, рече тој.

Неговиот глас беше компјутерски изменет за да се заштити неговиот идентитет.

„Почитуван Владимир Владимирович, ве молам, решете ја оваа ситуација“, рече тој.

Апелот, кој се појави на „Телеграм“ овој месец, беше само еден од серијата нови видеа што се појавија од средината на февруари, во кои неодамнешните руски регрути се жалат дека биле испратени да се борат и да загинат на првите линии во Украина користејќи термини, како што се „криминални наредби“ и „бесмислени напади“.

Еден руски медиум, „Вјорстка“, пресмета дека во рок од еден месец регрути од најмалку 16 региони во Русија се појавиле на видеа што повикуваат на интервенција на Путин. Во нив десетици регрути се жалат дека биле принудени да упаднат на украинските позиции, без доволно обука, муниција или оружје.

Регрутите се жалат и дека им било дадено оружје и им било кажано да трчаат кон непријателските позиции и да пукаат. Во едно видео, снимено на 7 март, војниците на единицата од Иркутск, град во Сибир, се жалат дека се „испратени на колење“, а ова е нивен трет јавен апел до Путин. Една група регрути од Калининград, Мурманск и од Архангелск, кои се претставија како „Единица 41698“ на 5. моторизирана бригада, изјавија дека во нивниот прв напад во само еден ров биле убиени дури шест соборци.

„Луѓето умираат за ништо. Ние не сме месо. Подготвени сме да се бориме достоинствено“, вели еден од нив.

Друго видео, наводно снимено од 1453. полк од Перм и Свердловската област на Урал на 11 март, зборува за „неоправдани загуби“ и вели дека четворица биле убиени, а 18 ранети за време на неодамнешниот напад.

Видеата исто така го откриваат неуспехот на Москва да се справи со критичните и срамни проблеми со снабдувањето, што доведе до вооружување на војниците со оружје и униформи од Втората светска војна. Некои од тие поплаки првпат беа емитувани минатата есен преку видеа што почнаа да се појавуваат набргу откако Русија почна делумна воена обврска.

Но, како што пишува „Вашингтон пост“, руските власти не одговориле на овие видеопораки, а засега нема знаци дека претседателот Путин ќе одговори на апелите. Во ноември, за време на договорената средба со група мајки на војници, Путин реагира многу негативно на видеата од тоа време: „Не треба целосно да му верувате на интернетот бидејќи тој е полн со секакви лажни приказни, измами и лаги, рече Путин.

Но, и после тоа, мајките и ќерките на мобилизираните борци снимиле нови пораки, кои ги испратиле до руските власти. Во едно видео, објавено на 12 март, дваесетина жени апелираа до Путин и до министерот за одбрана Сергеј Шојгу да ги тргнат своите мажи од линијата на огнот.

„Нашите луѓе се испратени како месо да напаѓаат добро одбранети точки, петмина против 100 добро вооружени непријатели. Тие се подготвени да ја почитуваат својата должност кон својата земја според специјализацијата за која се обучени, а не како јуришна пешадија“, рече една жена.

Исто така, во повеќето видеа регрутите внимаваат да кажат дека се посветени на воената должност и сакаат да продолжат да се борат за својата земја. Повеќето од регрутите презедоа чекори за да го скријат својот идентитет.

Опозицијата во Косово е незадоволна од постигнатото во Охрид. Средбата меѓу Курти и Вучиќ предизвика реакции во Приштина.

Во Охрид беше постигнат договор за имплементација на договорениот прв дел од договорот за патот кон нормализирање на односите меѓу Косово и Србија. Шефот за надворешна политика на Европската Унија, Жозеп Борел, рече дека партиите се обврзале да ги почитуваат сите членки и да ги спроведат своите обврски експедитивно и со добра волја.

Приштина, меѓу другото, се обврза веднаш да почне со имплементација на членот 7, кој се однесува на самоуправување на Србите, а спроведувањето на договорот е поединечно вклучено како обврска во преговарачките поглавја за пристапување во ЕУ и за Србија и за Косово.

Албанците му скокнаа на Курти поради овој договор. Иако нема барање за референдум и избори, се најавуваат протести и се бара негова оставка. На опозицијата најмногу ѝ пречи немањето меѓусебно признавање во Охрид, а дополнително, Косово презеде обврска веднаш, како што толкуваат, да формира ЗСО.

Со ист тон и пратеничката на движењето „Самоопределување“, Фитора Пацоли, доцна синоќа изјави дека самоуправувањето не е ниту „заедница ниту здружение, а ниту самоуправа ниту автономија“.

Претседателот на Социјалдемократската партија, Дардан Молиќај, најави дека неговата партија на 25 март ќе организира протест, на кој ќе побара оставка од премиерот на Косово, Албин Курти, поради постигнатиот договор во Охрид.

Татко го принудил својот 11-годишен син да игра видео игри 17 часа без престан и без сон, откако го фатил дека игра на телефонот во креветот во 1 часот по полноќ.

Уморното момче од Кина раскажа дека татко му го присилил на тоа за да го казни оти го начекал додека играл среде ноќ во својот кревет.

Наместо да му го одземе телефонот, таткото го станал од креветот и го принудил детето да игра 17 часа, пишува „Дејли мејл“.

Снимката го прикажува момчето облечено во пижами додека изнемоштено игра на столот и се буди секојпат кога паѓа во сон.

Детето напиша: „Татко ми ме фати и ме казни да играм додека да повратам. Ме будеше неколкупати. Тоа траеше од 1 до 18 часот. Играв 17 часа“.

Таткото ја прекинал казната во моментот кога неговиот син се расплакал и се согласил на нов договор со кој се ограничува неговото време за игра.

Неговиот татко ја снимил лекцијата и ја споделил на социјалните мрежи тврдејќи дека тоа го правел само како последно средство и ги советувал другите родители да не го прават тоа.