Свет
Авганистанец планирал терористички напад во САД на денот на изборите, имал посебна виза

27-годишен Авганистанец кој живее во Оклахома е уапсен под сомнение дека планирал терористички напад во име на Исламската држава на американска територија на денот на претседателските избори, 5 ноември, објавија американските правосудни власти.
Насир Ахмад Тавхеди го планирал нападот во име на Исламската држава, според обвинението. Инаку, тој живеел во Оклахома со сопругата и едногодишното дете откако влегол во САД во 2021 година со специјална имигрантска виза.
Тој беше корисник на специјална програма за имигрантска виза, која прима до 50 луѓе годишно, и е достапна за луѓе кои работеле со вооружените сили на САД или под раководство на шефот на мисијата како преведувачи во Ирак или Авганистан. .
Во обвинението не е наведено дали Тавхеди работел како преведувач во Авганистан. Според судските документи, американската федерална полиција со пристап до сметката на Гугл на Насир Ахмад Тавхеди забележала дека тој редовно се консултира со пропагандата на Исламската држава (ИД).
Тој бил во контакт преку пораки на Телеграма со лице идентификувано од федералната полиција како регрут на ИД. Со ова лице разговарал за неговите планови да набави оружје и да го врати своето семејство во Авганистан.
Тој беше уапсен во понеделникот со наводен соучесник, малолетниот брат на неговата сопруга, за време на таен состанок со федералните агенти за купување автомати и муниција, соопштија американските правосудни власти.
„Министерството за правда го попречи планот на обвинетиот да добие полуавтоматско оружје за да изврши насилен напад во име на ИСИС на американско тло на денот на изборите“, рече секретарот Мерик Гарланд во соопштението.
Тој е обвинет за обид да обезбеди материјална поддршка на ИСИС и набавка на огнено оружје за да изврши федерално злосторство или тероризам, по две точки кои носат максимална казна од 20 години и 15 години затвор, соопшти Министерството за правда.
Милитантната организација Исламска држава уби и егзекутира илјадници луѓе во име на своето екстремно религиозно толкување пред да биде територијално поразена во Ирак во 2017 година и Сирија во 2019 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп за жестокиот напад на Киев: Владимире, престани!

Американскиот претседател Доналд Трамп денеска ги осуди најновите руски напади врз Киев на платформата Truth Social и го повика рускиот претседател Владимир Путин да ги запре.
„Не сум задоволен од руските напади врз Киев. Тие не се потребни и доаѓаат во многу лошо време. Владимире, престани! 5.000 војници умираат неделно. Ајде да го завршиме мировниот договор!“, напиша Трамп.
Реакцијата доаѓа откако руските сили го извршија најтешкиот напад врз главниот град на Украина од летото минатата година. Киев синоќа беше цел на комбинирани напади со беспилотни летала и проектили, при што загинаа најмалку девет лица, а беа повредени повеќе од 70, меѓу кои шест деца. Нападите предизвикаа пожари и урнаа згради во пет градски кварта, а спасувачките тимови сè уште трагаат по преживеани под урнатините.
Украинскиот претседател Володимир Зеленски ја прекина официјалната посета на Јужна Африка и најави враќање во својата татковина. За време на состанокот со јужноафриканскиот претседател Кирил Рамафоса, Зеленски повтори дека Украина нема да се согласи на мировен договор кој вклучува територијални отстапки, вклучувајќи го и Крим.
Свет
Истанбул погоден од 300 последователни потреси, сеизмолозите очекуваат уште еден силен земјотрес

Серија земјотреси го погодија Истанбул и денеска, а турската агенција за катастрофи АФАД извести за речиси 300 последователни потреси, од кои еден бил со јачина од 4,6 степени.
Од вчерашниот силен земјотрес, кој беше со јачина од 6,2 степени според Рихтеровата скала, АФАД забележа уште стотици земјотреси по должината на тектонските раседи во Мраморното Море.
Министерот за здравство Кемал Мемишоглу изјави дека 236 лица се повредени, од кои 173 во Истанбул. Петнаесет од нив морало да бидат хоспитализирани, а некои се повредени панично скокајќи од зградите.
Канцеларијата на гувернерот на Истанбул соопшти дека нема извештаи за урнати згради. Министерот за урбан развој Мурат Курум објави дека 12 згради се евакуирани како мерка на претпазливост.
Сеизмолозите и геолозите цитирани во турските медиуми, генерално, се согласуваат дека сè уште се очекува голем земјотрес. Иако не е познато кога би можело да се случи, експертите предвидуваат дека би можел да достигне магнитуда 7,4, а некои дури проценуваат и потенцијална магнитуда од 7,7.
Турција се наоѓа во еден од сеизмички најактивните региони во светот.
Локалните медиуми објавуваат дека жителите ја поминале ноќта во паркови и на отворени простори поставувајќи шатори наместо да се вратат во своите домови. АФАД ги повика луѓето да избегнуваат потенцијално небезбедни згради предупредувајќи дека последователните потреси би можеле да траат некое време.
Свет
Шведски новинар се соочува со 12 години затвор поради навреда на Ердоган

Шведскиот новинар Јоаким Медин може да биде осуден на 12 години затвор во Турција под обвинение за навреда на претседателот Реџеп Таип Ердоган и наводна поврзаност со терористичка организација, објави шведскиот весник „Дагенс ЕТЦ“ за кој работи Медин.
Медин беше уапсен минатиот месец по пристигнувањето во Турција, каде што требаше да известува за протестите што избувнаа по приведувањето на градоначалникот на Истанбул, Екрем Имамоглу, водечки опозициски политичар и ривал на Ердоган, објави бриселски „Политико“.
Обвинителството го товари за навреда на претседателот, што предвидува максимална казна затвор од три години во Турција, како и за членство во Курдистанската работничка партија (ПКК), која Анкара ја смета за терористичка организација, што е казниво со затвор до девет години.
„Тој само си ја вршеше работата. Јоаким не е криминалец, а камоли терорист“, изјави главниот уредник на весникот, Андреас Густавсон.
Тој посочи дека обвинувањата се политички мотивирани и дека е обид да се прикаже новинарската работа како тероризам.
Шефицата на шведската дипломатија Марија Малмер Стенергард рече дека разговарала за случајот со својот турски колега и побарала на Медин да му се дозволи да се врати во Шведска.
Односите меѓу Шведска и Турција веќе беа затегнати, особено во контекст на турското противење на шведското членство во НАТО, делумно поради шведската политика кон курдските групи.
Медин и претходно бил уапсен поради известување – во 2015 година поминал една недела во притвор во Сирија по што со посредство на курдски функционери бил ослободен.
Судењето на Медин е закажано за 30 април.