Свет
Австралија и Јапонија им се придружија на земјите кои воведоа мерки кон Русија

Австралија и Јапонија денеска им се приклучија на САД, Европската Унија, Канада и Велика Британија во воведувањето санкции кон Русија, откако Москва ги призна самопрогласените републики Доњецк и Луганск во источна Украина и одобри испраќање војници во областа.
Австралија веднаш ќе почне со воведување санкции за руски поединци за кои верува дека се одговорни за дејствијата на земјата против Украина, изјави премиерот Скот Морисон на прес-конференција, пренесува „Ројтерс“.
„Австралијците секогаш се спротивставувале на сторителите, а ние ќе ѝ се спротивставиме на Русија, заедно со сите наши партнери. Очекувам дополнителни транши од санкциите, ова е само почеток на овој процес“ – изјави Морисон.
Јапонскиот премиер Фумио Кишида денеска изјави и дека Токио ѝ воведува санкции на Москва поради нејзините дејствија во Украина, кои, како што наведе, претставуваат „неприфатливо кршење на украинскиот суверенитет и меѓународното право“.
Јапонските санкции вклучуваат забрана за издавање руски обврзници во Јапонија и замрзнување на имотот на одредени руски поединци, како и ограничување на патувањето во Јапонија, рече Кишида.
„Акциите на Русија многу јасно му штетат на суверенитетот на Украина и се спротивставуваат на меѓународното право. Уште еднаш ги осудуваме ваквите потези и силно ја повикуваме Русија да се врати на дипломатските преговори“ – нагласи јапонскиот премиер.
Тој исто така рече дека Јапонија има доволно резерви на нафта и течен природен гас (LNG), така што на краток рок нема да има значително влијание врз снабдувањето со енергија.
Во 2021 година, Русија обезбеди повеќе од 12 отсто од јапонскиот јаглен и речиси една десетина од течниот природен гас, според „Ројтерс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Цистерни со нафта излетаа од шини на железничката пруга Ваљево – Косјериќ

Две цистерни полни со нафта синоќа излетаа од шините на железничката пруга Ваљево – Косјериќ, во близина на местото Ражана, пренесуваат локалните медиуми.
Според информациите, цистерните биле при крајот на товарниот воз што се движел кон Косјериќ. Засега не е познато што ја предизвикало несреќата, ниту дали имало истекување нафта од композицијата.
Локалните портали јавуваат дека екипи се на терен и се очекува официјално соопштение од надлежните органи за причините и можните последици од инцидентот.
Свет
Израелските воздухопловни сили нападнале околу 140 цели во Појасот Газа

Израелските одбранбени сили (ИДФ) денеска соопштија дека изминатиот ден израелските воздухопловни сили нападнале околу 140 цели во Појасот Газа, вклучувајќи згради што ги користат терористичките групи.
Нападите се случуваат во време кога копнените трупи од три дивизии на ИДФ продолжуваат да напредуваат во градот Газа, пренесува „Тајмс оф Израел“.
Армијата соопшти дека трупите на Голанската бригада на ИДФ во еден инцидент во Газа забележале ќелија од пет борци на палестинското милитантно движење Хамас, кои испукале ракета RPG кон зградата каде што биле стационирани израелските сили, и дека тие возвратиле на нападот.
Свет
Поради тајфунот Буалој илјадници луѓе се евакуирани во Виетнам и на југот на Кина

Виетнам денеска ги затвори аеродромите и евакуираше илјадници луѓе во областите што потенцијално би можеле да бидат погодени од сè посилниот тајфун Буалој, кој се движи кон земјата од Филипините, каде што предизвика најмалку десет смртни случаи и разорни поплави.
Се очекува тајфунот со брзина на ветер од 133 километри на час да стигне до централниот дел од Виетнам во текот на денот, соопшти Виетнамската национална метеоролошка агенција.
„Ова е брзо движечка бура, речиси двојно поголема од просечната брзина, со висок интензитет и широка област на влијание. Способна е истовремено да предизвика повеќе природни катастрофи, вклучувајќи силни ветрови, обилни дождови, поплави, лизгање на земјиштето и крајбрежни поплави“, се вели во соопштението на метеоролошката агенција.
Властите во централната покраина Ха Тин започнаа со евакуација на повеќе од 15.000 луѓе, соопшти виетнамската Влада, додавајќи дека илјадници војници се во состојба на готовност за да му пружат помош на населението. Виетнам ги прекина операциите на четири крајбрежни аеродроми, вклучувајќи го и меѓународниот аеродром Дананг, и ги прилагоди времињата на полетување на неколку авиони, соопшти Управата за цивилно воздухопловство на Виетнам. Обилните дождови веќе предизвикаа поплави во Хуе и Куанг Три, соопшти виетнамската Влада.
Кинескиот град Сања во јужната островска покраина Хајнан е исто така ставен во состојба на зголемена готовност, бидејќи тајфунот Буалој, 20-тиот тајфун оваа година, се приближува кон јужниот дел од островот, соопшти кинеската покраинска метеоролошка опсерваторија.