Свет
Администрацијата на Трамп драстично ги намалува средствата за истражување на ракот
Водечката позиција на Соединетите Американски Држави во истражувањето на ракот е под сериозна закана. Администрацијата на Трамп драстично го намали финансирањето за клучни научни проекти, загрозувајќи не само глобалното лидерство на земјата во науката, туку и судбината на пациентите со рак, објавува „Футуризам“.
„Ние сме одлични во науката“, изјави за „Њујорк тајмс“ Харолд Вармус, поранешен директор на Националните институти за здравство (NIH) и научник, добитник на Нобелова награда. „Зошто би сакале да уништиме еден од нашите најголеми богатства?“
Во првите три месеци од неговиот втор мандат, Трамп го намали буџетот на NIH за 2,7 милијарди долари. Федералните истражувања за ракот беа особено силно погодени, што критичарите велат дека ќе го забави секој напредок во пронаоѓањето ефикасни третмани. Одлуката веќе резултираше со масовни отпуштања и суспендирање на важни научни студии што беа во тек.
Дополнително, Трамп предложи нова рунда намалувања за следната година, вклучително и намалување на буџетот на Националниот институт за рак, кој работи во рамките на NIH, од 7,2 милијарди долари на 4,5 милијарди долари.
Овие намалувања би можеле да имаат катастрофални последици. Студија објавена во Journal of Clinical Oncology покажа дека секои 326 долари инвестирани во истражувања за рак додаваат една година на очекуваниот животен век. Стапката на преживување од рак во рок од пет години се зголеми од 49 проценти во 1970-тите на 68 проценти денес, а се проценува дека на речиси 39 проценти од Американците ќе им биде дијагностициран рак во одреден момент од нивниот живот.
Притисокот за намалување на финансирањето произлегува од недовербата на некои конзервативци кон здравствениот систем, кој го сметаат за корумпиран и политизиран, особено по пандемијата на КОВИД. Иницијативите за разновидност, еднаквост и вклученост (DEI) исто така се користат како оправдување за намалувањата, при што некои апликации за грантови се погрешно означени како спорни поради употребата на зборови како „транс“.
Дополнителен удар зададе Роберт Кенеди Џуниор, секретарот на Министерството за здравство и човечки услуги на САД, откажувајќи ги ветувачките истражувања за mRNA технологијата што, според експертите, би можеле да доведат до развој на универзална вакцина против рак.
Иронично е што намалувањата се случуваат во време кога науката е на прагот на неверојатни откритија, како што се нови, целни терапии со зрачење кои предизвикуваат помала штета на околното здраво ткиво.
„Верувам дека сум една од ретките лаборатории во земјата што е специјализирана за бариери во испорака на лекови кај детски рак на мозок“, рече професорката Рејчел Сиријани од Медицинскиот факултет Чан на Универзитетот во Масачусетс, чие истражување се фокусира на медулобластом, брзорастечки рак на мозок кај децата. „Кога ме отстранувате од екосистемот, отстранувате нешто што не може да се замени.“
Поради новата ситуација, врвни научници, вклучувајќи го и добитникот на Нобелова награда Вармус, веќе размислуваат да ги напуштат САД и да ја продолжат својата работа во странство.
фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Сијарто: Европа е зафатена од воена треска, се подготвува за конфликт со Русија
Европа е зафатена од воена треска и сè поотворено се подготвува за војна, предупреди унгарскиот министер за надворешни работи, Петер Сијарто, коментирајќи ја намерата на Европската Унија да му испрати на Киев речиси 200 милијарди евра за оружје и функционирање на државата.
„Кога зборуваме за мобилизација на 60 милијарди евра европски пари за вооружување на украинската армија или за испраќање 130 милијарди евра во Украина, тешко е да се нарече тоа поинаку, освен подготовка за војна“, рече Сијарто во емисијата „Борбен час“.
Според него, наместо да придонесува за мирот, Европската Унија сè подлабоко тоне во политиката на конфронтација, што може да има далекосежни последици за безбедноста на континентот.
Сијарто истакна дека единствениот пат до стабилност е евроазискиот дијалог бидејќи без Русија, како што рече, не е можно да се создаде реална и одржлива безбедносна архитектура во Европа.
„Нереално е да се мисли дека Европа ќе биде безбедна ако Русија остане изолирана. Безбедноста е можна само преку соработка, а не преку санкции и конфронтација“, рече шефот на унгарската дипломатија.
Фото: принтскрин
Свет
Порака од Првата светска војна пронајдена на австралиска плажа
Пораки во шише напишани од двајца австралиски војници неколку дена по заминувањето со брод на фронтот во Франција за време на Првата светска војна се пронајдени повеќе од еден век подоцна на брегот на Австралија.
Шишето од брендот „Швепс“ е пронајдено веднаш над линијата на водата на плажата Вартон во близина на Есперанс во државата Западна Австралија од страна на Питер Браун, кој со ќерка си Фелисити бил на една од редовните семејни експедиции со квадбајк за чистење на плажата од ѓубре, потврди неговата сопруга Деб Браун, пренесува АП.
„Многу чистиме на нашите плажи за никогаш да не поминеме покрај парче ѓубре. Значи, ова мало шише само стоеше таму чекајќи нè да го собереме“, рече Деб Браун.
Внатре во проѕирното дебело стакло се наоѓале весели писма напишани со молив од војниците Малколм Невил (27) и Вилијам Харли (37), датирани на 15 август 1916 година. Нивниот воен брод тргнал од Аделаида, главниот град на Јужна Австралија, на 12 август истата година, на долго патување до другата страна на светот, каде што австралиските војници требало да го зајакнат 48. австралиски пешадиски баталјон на Западниот фронт во Европа. Невил бил убиен во акција една година подоцна, а Харли бил ранет двапати, но ја преживеал војната, за да умре во Аделаида во 1934 година.
Војникот Невил го замолил оној што ќе го најде шишето да го достави писмото до мајка му Робертина Невил во Вилкават, сега практично град на духови во Јужна Австралија, а Харли, чија мајка починала до 1916 година, напишал дека ќе биде среќен ако оној што ќе го најде шишето ја зачува неговата порака.
Внуката на Харли, Ен Тарнер, рекла дека нејзиното семејство било апсолутно вџашено кога ја пронашле пораката на дедо ѝ во шише. „Едноставно, не можеме да веруваме. Навистина изгледа како чудо и навистина се чувствуваме како дедо да ни се обратил од гробот“, изјави Тарнер за Австралиската радиодифузна корпорација.
Праправкукот на Невил, Херби Невил, рече дека неговото семејство било обединето од неверојатното откритие. „Звучи како да бил доста среќен што отишол во војна. Толку е тажно што се случило. Толку е тажно што го загуби животот. Каков човек беше“, рече Невил.
Фото: принтскрин
Свет
Израел по новите напади врз Газа: Повторно ќе го почитуваме примирјето
Израелската војска соопшти дека повторно ќе го почитува примирјето во Појасот Газа откако во текот на ноќта извршила воздушни напади како одговор на напад врз нејзини војници.
Според соопштението, израелската армија бомбардирала десетици цели, при што биле убиени повеќе од 30 вооружени лица што имале командни позиции во палестинските вооружени групи.
Палестински медицински извори пренесуваат дека во нападите загинале најмалку 104 лица, јави „Ројтерс“. Ако бројките се потврдат, тоа би бил најголем број жртви од почетокот на примирјето на 10 октомври.
Израел ја обвини организацијата Хамас за заседа во Рафа, во која загинал израелски војник, но Хамас го негира тоа.
Американскиот претседател Доналд Трамп изјави дека, и покрај новите инциденти, примирјето останува во сила и дека ништо нема да го загрози додавајќи дека Хамас вети дека ќе го почитува договорот.

