Свет
Американец што го преживеал масакрот во Вегас убиен при пукањето во калифорнискиот ноќен клуб
Млад човек, кој минатата година го преживеа масакрот во Лас Вегас, е еден од убиените при пукањето во ноќниот клуб во Калифорнија, објави Би-би-си.
Минатогодишниот масакр во Лас Вегас се смета за најлошо масовно убиство во современата историја на САД. Во тој напад загинаа 58 лица.
Еден од луѓето што успеаја да го преживеат ова пукање, 27-годишниот Телемакус Орфанос, беше убиен во масакрот што неодамна се случи во калифорниски ноќен клуб, северозападно од Лос Анџелес.
Пукањето во Лас Вегас се случи на 1 октомври минатата година на фестивал за кантри-музика, а иста таква музика се пуштала и во клубот во Калифорнија.
Мајката на Телемакус Орфанос во интервју за американската телевизија Еј-би-си рече дека нејзиниот син во 2017 година бил во Лас Вегас со многу пријатели и неповреден се вратил дома.
„Синоќа не се врати дома“, додала таа.
„Не сакам молитви, не сакам позитивни мисли, сакам да се воведе контрола на оружјето“, истакнала мајката на Орфанос.
„Иронично е тоа што, откако го преживеа најстрашното масовно убиство во современата историја, беше убиен во родниот град“, рекол татко му.
Убиецот од ноќниот клуб во Калифорнија полицијата го идентификува како 28-годишниот Јан Дејвид Лонг, поранешен маринец, кој служел во Авганистан и, најверојатно, страдал од посттрауматски синдром.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Бакингемската палата ја објави здравствената состојба на кралот Чарлс: познато кога ќе се врати на должностите
Кралот Чарлс ќе продолжи со јавните ангажмани следната недела откако е постигнат охрабрувачки напредок во лекувањето на ракот, објави Бакингемската палата.
За кралот тоа нема да биде целосно враќање на официјалните ангажмани, но палатата испраќа позитивни сигнали, јавува Би-Би-Си.
Следниот вторник кралот ќе започне со симболично патување во центар за лекување рак, пренесува медиумот.
Неговите летни планови вклучуваат државна посета, каде што ќе биде домаќин на императорот и царицата на Јапонија.
Во наредните недели, соопштија од палатата, тој ќе преземе неколку надворешни ангажмани.
Свет
Стари книги обложени со отров отстранети од Француската национална библиотека
Властите отстранија четири книги од Француската национална библиотека поради можноста нивните корици да содржат отровен арсен. Имено, некои книги од 19 век, печатени во Британија, имаат смарагдно зелени корици. Арсенот често се користел за боење книги во тоа време.
Научниците од Универзитетот во Делавер во САД ги класифицираа отстранетите томови како потенцијално опасни, но библиотеката вели дека ракувањето со овие книги би предизвикало само мала штета на здравјето. „Ги ставивме во карантин овие дела. Ќе ги анализираме во лабораторија за да можеме да процениме колку арсен е присутен во секој том“, рече портпаролот на Француската национална библиотека, а пренесе Би-би-си.
Списокот на потенцијално опасни книги е составен од „Poison Book Proect“ , иницијатива покрената од научници од Универзитетот во Делавер во соработка со музејот Винтертур во Делавер. Од 2019 година, тимот тестираше стотици корици книги за тешки метали и состави листа на наслови кои се потенцијално опасни.
Издавачите од викторијанската ера користеле арсен за да ги обојат кориците. Светската здравствена организација (СЗО) предупреди на долгорочна изложеност на арсен во водата за пиење и храната, велејќи дека супстанцијата е многу токсична. Сепак, таа не дала никакви упатства за ракување со предмети што го содржат овој отров.
Во 2022 година, библиотекарите во Лидс, Англија открија ретка книга со арсен. Библиотекар ја открил потенцијално отровната книга додека ја споредувал збирката на библиотеката со базата на податоци на проектот „Poison Book“.
Свет
Мигранти плаќале 18.000 евра за превоз преку Ла Манш, биле сексуално експлоатирани
Виетнамска криминална мрежа беше пресечена со акција на полициите на Франција и Англија, со поддршка на Европол.
Оваа група шверцувала мигранти преку Ла Манш и организирала нивна сексуална и трудова експлоатација како и перење пари.
Главниот организатор, идентификуван како десна рака на водачот на оваа банда, го организирал шверцот, додека друг нивни соучесник бил задолжен за собирање пари и организирање на транспортот на мигрантите, кои плаќале од 15.000 до 18.000 евра за превоз преку каналот , соопшти Европол.
На пат од Полска за Франција, некои од мигрантите шверцувале метамфетамин во парискиот регион, снабдувајќи ги азиските групи за шверц на дрога со седиште во областа во замена за намалена цена на патувањето.
Уапсени се 16 членови на оваа група и одземени се разновидна луксузна стока, 100.000 евра во кеш и уште 298.000 евра на банкарски сметки.