Свет
Американка се изјаснила за виновна: го оставила бебето само и заминала на одмор

Жена од Охајо (32) вчера се изјаснила за виновна за убиство на дете откога ја оставила својата 16-месечна ќерка сама дома на 10 дена за да оди на одмор. „На 6 јуни 2023 година Кристел Канделарио ја остави својата ќерка Џејлин Канделарио сама и без надзор. Таа се врати дома дури на 16 јуни“, рече окружниот обвинител Мајкл К.
Кога Канделарио се вратила во својот дом во Кливленд по патувањето во Детроит и Порторико, видела дека ќерка ѝ не реагира и повикала полиција. Надлежните велат дека околината на детето била полна со валкани прекривки натопени со урина и измет. Кога брзата помош пристигнала на местото, констатирале дека бебето починало. „Беше екстремно дехидрирана“, соопшти полицијата.
Канделарио се изјасни за виновна за тешко убиство. Таа ќе биде осудена во март. Засега не е познато зошто Канделарио не побарала некој да ѝ го чува детето додека била на пат.
Семеен пријател за „Њуз 5“ минатата година изјави дека ова не е првпат Канделарио да ја остави ќерка си сама дома: „Постојано и велевме да не ја остава сама. Не само јас, туку и мојата пријателка, која живее од другата страна на улицата“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Земјотрес со јачина од 6,2 степени го погоди Истанбул

Силен земјотрес со јачина од 6,2 степени според Рихтеровата скала го погоди денеска Истанбул, соопшти турската агенција АФАД.
Засега нема извештаи за големината на штетата, но жителите на најголемиот турски град се евакуирани од зградите.
Епицентарот на земјотресот, кој се случи во 12.49 часот по локално време, бил во областа Силиври, област што се наоѓа на 80-ина километри западно од Истанбул. Земјотресот се случи на длабочина од 6,92 километри, соопшти АФАД.
Турската телевизија ТГРТ јавува дека едно лице е повредено кога скокнало од балкон за време на земјотресот.
АФАД ги предупреди жителите на регионот да не влегуваат во оштетените згради.
Свет
Венс: САД понудија експлицитен предлог за прекин на војната, време е страните да се согласат

Потпретседателот на Соединетите Американски Држави, Џеј-Ди Венс, изјави дека САД понудиле многу експлицитен предлог до Русија и Украина на патот кон мировен договор и истакна дека е време тие или да кажат „да“ или САД да се повлечат од процесот, објави денес „Блумберг“. „Мислам дека ќе се повлечат нови линии на конфликт онаму каде што се моментно постојните или во непосредна близина“, рече Венс за време на обраќањето пред новинарите во Индија откога ја заврши својата обиколка на Таџ Махал.
Тој додаде дека ова значи дека и Украина и Русија ќе мора да се откажат од дел од териториите што моменлно ги контролира една од страните.
„Ќе мора да има размена на територии“, рече Венс додавајќи дека двете страни „мора да го положат оружјето, да го замрзнат конфликтот и да продолжат да градат подобра Русија и подобра Украина“.
Тој истакна дека е оптимист во врска со преговорите додавајќи дека гледа оти сите страни досега преговарале со добра волја. „Блумберг“ наведува дека замрзнувањето на конфликтот по постојната линија на фронтот би било многу поголема загуба за Украина, чија намера беше да ги врати сите територии на исток и на југ од земјата, што Русија ги зазеде во периодот од 2011 година, вклучувајќи го и Крим. Претходно, американските претставници изјавија дека САД се подготвени да ја признаат руската контрола врз Крим и да ги ублажат санкциите кон Москва како дел од потенцијален мировен договор, но украинскиот претседател Володимир Зеленски изјави дека неговата земја не може де јуре да го признае Крим бидејќи тоа е спротивно на украинскиот Устав, пренесува „Танјуг“.
Разговорите планирани за денес во Лондон меѓу највисоките претставници на САД, Украина и големите европски сили беа сведени на средби на техничко ниво откога американскиот државен секретар Марко Рубио ја одложи посетата.
Свет
Кина и Русија планираат изградба на нуклеарен реактор на Месечината

Прелиминарните планови за Меѓународната лунарна истражувачка станица (ILRS), која заеднички ја развиваат Кина и Русија, вклучуваат изградба на нуклеарен реактор на површината на Месечината, според презентацијата на кинески вселенски службеник.
Презентацијата ја одржа Пеи Жаоју, главниот инженер на кинеската мисија „Чанг’е-8“, планирана за 2028 година, а таа покажа дека енергетскиот систем на идната база, покрај нуклеарната енергија, би можел да се потпира и на големи соларни панели што ќе бидат инсталирани на површината на Месечината.
Мисијата „Чанг’е-8“ претставува клучен чекор во амбициозниот план на Кина за изградба на постојана човечка база на Месечината. Кина, втората најголема економија во светот, планира да стане водечка сила во истражувањето на вселената до 2030 година и да испрати астронаути на Месечината.
Временскиот период за изградба на станица на јужниот пол на Месечината од страна на Кина се совпаѓа со американската програма „Артемис“, предводена од НАСА, која има цел да ги врати американските астронаути на Месечината до декември 2025 година.
Академик Ву Веирен од Кинеската академија за инженерство и главен дизајнер на кинеската лунарна програма минатата година изјави дека основниот модел на станицата ILRS, со јужниот пол на Месечината како центар, треба да биде завршен до 2035 година. Лансирањето на лунарната сонда „Чанг’е-8“ ќе го означи почетокот на изградбата на овој основен модел.
Во следните фази Кина планира да го лансира таканаречениот „Проект 555“, кој ќе покани 50 земји, 500 меѓународни научноистражувачки институции и 5.000 странски научници да ѝ се приклучат на иницијативата ILRS.
Овие планови дополнително ги зајакнуваат амбициите на Кина во трката за доминација во вселената, особено во контекст на стратешката конкуренција со САД, која станува сè поизразена и на Земјата и пошироко, пренесува „Ројтерс“.