Свет
Американски командант предупредува: САД и НАТО мора да бидат подготвени, Русија подготвува војска поголема од кога било

Генералот Кристофер Каволи планира да упати остро предупредување до Конгресот. Како што вели, сите знаци укажуваат дека Русија ќе продолжи да ги загрозува безбедносните и економските интереси на САД во иднина, а САД и НАТО мора да се подготват да се соочат со оваа закана.
Највисокиот американски командант во Европа и НАТО, генералот Кристофер Г. Каволи, кој ја предводи Европската команда (EUCOM) и воедно е врховен командант на НАТО на континентот, треба да сведочи пред Комитетот за вооружени сили на Претставничкиот дом на сослушувањето на 8 април. Тој ќе се појави заедно со Кетрин Томпсон, која моментално работи како помошник секретар за одбрана за меѓународна безбедност, пренесуваат светските медиуми.
Генералот Каволи, според анализите, ќе ги презентира аргументите за руската закана со истакнување на војната на Москва во Украина, кампањата за дестабилизација против Западот, социјалната мобилизација за војна и растечките стратегиски партнерства со американските противници, како што се Иран, Кина и КДРК – сите заедно „се обидуваат да ги поткопаат предностите на САД и нејзините сојузници и да ги предизвикаат нашите витални интереси во странство“.
Во своите подготвени забелешки, генералот, исто така, ќе им ги претстави на пратениците напорите на ЕУКОМ да помогне во подготовката на Алијансата преку зголемување на европската сопственост на европската безбедност, давајќи им приоритет на воените операции и градење подготвеност за извршување на одбранбените планови.
Сето ова, според него, бара американско лидерство, континуирано инвестирање во напредни капацитети и одржлива транзиција кон одбрана предводена од сојузниците во Европа.
„Глобалните закани со кои се соочуваме денес се значајни, можеби никогаш не поголеми отколку на крајот на Студената војна“, тврди генералот.
Што се однесува до војната на Русија во Украина, Каволи планира да прикаже јасна слика за размерите на насилството на боиштата во Доњецк, Курск и Бахмут, што според него ја покажува подготвеноста на Русија да користи брутални средства за да ги постигне своите цели.
Врховниот командант, исто така, според написите, ќе ги предупреди пратениците дека Русија ги врати големите загуби на бојното поле во Украина, побрзо од очекуваното.
„Всушност, руската армија, која го носеше најголемиот дел од битката, денес е поголема отколку што беше на почетокот на војната – и покрај тоа што претрпе околу 790.000 жртви“, ќе рече тој.
Во својата подготвена изјава, Каволи предупредува и дека Русија не само што постојано регрутира нов воен персонал, туку и ги заменува борбените возила и муницијата со невидена брзина. Руските копнени сили во Украина изгубија околу 3.000 тенкови, 9.000 оклопни возила, 13.000 артилериски системи и над 400 системи за воздушна одбрана во изминатата година – но работат на нивнА замена.
„Русија го прошири своето индустриско производство, отвори нови производствени капацитети и ги претвори комерцијалните производни линии во воени цели“, забележува Каволи, објавуваат медиумите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелски војници забележани во градот Газа

Палестински очевидци тврдат дека во градот Газа забележани се израелски војници.
Според нив израелските војници биле забележани во населбата Сабра, во близина на зграда во која порано се наоѓало училиште.
Израелските војници наводно се заблежани во градот Газа откако израелскиот премиер Бенјамин Нетанјаху одобри план за преземање на градот, во кој живеат околу еден милион луѓе.
Израелската армија не ги коментираше палестинските наводи, истакнувајќи оти не ги открива позициите на своите војници.
Претходно Израел соопшти дека планира да евакуира околу еден милион жители од градот пред офанзивата, која се очекува да почне најрано во септември.
Свет
Зеленски вели дека постои вистинска можност да заврши војната во Украина

Претседателот на Украина, Володимир Зеленски синоќа најави дека следните денови ќе бидат готови безбедносните гаранции за неговата земја.
Тој, по телефонскиот разговор со премиерот на Холандија, Дик Шуф, на платформата Икс објави дека „во моментот тимови на Украина, САД и европските партнери работат на решение“.
Според Зеленски постои „вистинска можност да се заврши оваа војна“, додавајќи дека Украина е „подготвена за конструктивни чекори што можат да доведат до вистинскиот мир“.
– Русија од своја страна не покажува намера за мир и продолжува да ги гранатира нашите градови. Сите сигнали што доаѓаат од Москва овие денови ги толкуваме на ист начин. Ни треба притисок за промена на нивниот став, како и состанок на највисоко ниво за да се разговара за сите прашања, посочи Зеленски.
Свет
Северна Кореја тестираше нови ракети

Северна Кореја вчера истрела два нови противвоздушни проектили за уништување на различни воздушни цели, меѓу кои дронови и крстосувачки ракети. Тестирањето на новото оружје го надгледуваше севернокорејскиот лидер Ким Џонг-ун.
Како што јави Корејската централна новинска агенција (КЦНА) новото оружје има „супериорна борбена способност“ и користи „единствена технологија“.
Тестирањето на ново оружје се одвива во време на зголемени тензии со Јужна Кореја. Официјален Сеул вчера соопшти дека на 19 август јужнокорејски војници отвориле предупредувачки оган кон припадници на севернокорејската армија, кои накратко навлегле во Демилитаризираната зона.
Исто така во регионот се одржува заедничка воена вежба помеѓу Јужна Кореја и САД, а за утре е предвидена средба на американскиот претседател Доналд Трамп со новоизбраниот јужнокорејски претседател Ли Џае-мунг.