Свет
Америка и Британија одлучија кого ќе поддржат како нов шеф на НАТО
Соединетите Американски Држави и Велика Британија денеска го поддржаа холандскиот премиер во заминување Марк Руте да го наследи Јенс Столтенберг на местото генерален секретар на НАТО, ставајќи го во силна позиција да ја преземе таа функција.
Наследникот на Столтенберг, откако ќе поднесе оставка во октомври, ќе ја преземе функцијата во клучен момент со задача да ја задржи поддршката на членките на НАТО за скапата одбрана на Украина од руска инвазија, истовремено чувајќи се од каква било ескалација што директно би ја вовлекла Алијансата во војна со Москва.
„Претседателот Бајден силно ја поддржува кандидатурата на премиерот Руте за следен генерален секретар на НАТО. Премиерот Руте има длабоко разбирање за важноста на Алијансата, е природен лидер и комуникатор, а неговото водство добро би ѝ послужило на Алијансата во овој критичен момент“, изјави еден американски функционер.
Во зависност од исходот на американските претседателски избори во ноември, следниот шеф на НАТО можеби ќе треба да се справи со втор мандат на Доналд Трамп, кој неодамна уште еднаш ја доведе во прашање неговата посветеност на одбраната на сојузниците во НАТО.
Трамп привлече жестоки критики од западните официјални лица на почетокот на овој месец затоа што сугерираше дека нема да ги заштити земјите кои не ги исполнуваат целите за одбранбени трошоци на Алијансата, па дури и ќе ја охрабрат Русија да ги нападне.
Но, Руте, кој веќе се сметаше за фаворит за највисокото место во НАТО, во саботата рече дека Европа треба „да престане да се жали, кука и да приговара“ за Трамп и наместо тоа да се фокусира на она што тој може да направи за Украина.
„Мораме да соработуваме со кој и да е на подиумот“, рече Руте на конференцијата за безбедност во Минхен. Најдолговечниот холандски премиер Руте (57) неочекувано најави дека се повлекува од холандската политика во јули, но ќе остане премиер додека траат коалициските разговори по изборите на 22 ноември.
Лидерите на НАТО се назначуваат со консензус, за што е потребна поддршка или барем отсуство на противење од сите 31 членка. Двајца дипломати изјавија дека досега Руте има поддршка од околу 20 членки на НАТО.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Земјите од ЕУ повикаа на преоценување на ситуацијата во Сирија поради враќањето на мигрантите
Владите на осум земји членки на Европската Унија денеска соопштија дека е потребна преоцена на ситуацијата во Сирија за да се овозможи доброволно враќање на сириските бегалци во нивната татковина.
Во заедничката декларација официјални лица од Австрија, Чешка, Кипар, Данска, Грција, Италија, Малта и од Полска рекоа дека се согласиле за повторна процена, што ќе доведе до поефективни начини за справување со сириските бегалци, кои се обидуваат да стигнат до земјите на Европската Унија бидејќи ситуацијата во Сирија значително се промени, иако не е постигната целосна политичка стабилност, пренесува АП.
Во декларацијата се наведува дека ЕУ треба дополнително да ја зголеми својата поддршка за Либан со цел „да се намали ризикот од уште поголем прилив на мигранти од Либан во ЕУ“ откако претходно овој месец ЕУ објави пакет-помош за Либан во вредност од околу една милијарда евра со цел зајакнување на граничните контроли за да се запре приливот на баратели на азил и мигранти кон Кипар и Италија.
Свет
Санчез: Шпанија ќе ја признае Палестина само во заедничка акција со другите земји
Премиерот на Шпанија, Педро Санчез, денеска изјави дека Мадрид ќе ја признае палестинската држава само во рамките на заедничката акција со другите земји.
Во интервју за ТВ-станицата „Ла Секста“, Санчез ги негира и информациите дека Мадрид ќе ја признае Палестина на 21 мај, пренесува „Ројтерс“.
Тој претходно изјави дека очекува Мадрид да ја признае Палестина до јули и оти верува дека набргу ќе има критична маса во ЕУ, која ќе принуди неколку членки да заземат ист став.
Свет
Кина инвестира милијарди на пазарот на недвижности поради кризата во секторот
Кинеските власти воведоа нови мерки за борба против кризата во секторот на недвижности, вклучително и намалување на партиципацијата за купување имот и охрабрување на локалните власти да купуваат непродадени имоти.
Проблемите на кинескиот пазар на недвижности имаат големо влијание врз втората по големина економија во светот бидејќи индустријата во земјата до неодамна беше клучен двигател на економскиот раст.
Народната банка на Кина (PBOC) соопшти дека ќе издвои 300 милијарди јуани (41,5 милијарда долари) за поддршка на прифатливи станови.