Тинејџерот од Висконсин, Никита Касап (17) е во притвор откако полицијата соопшти дека ги убил своите родители како дел од поголем заговор за убиство на американскиот претседател, Доналд Трамп.

Седумнаесетгодишниот Никита Касап од Висконсин е во притвор. Полицијата соопшти дека ги убил мајка му и очувот како дел од поголем план кој вклучувал атентат на американскиот претседател Доналд Трамп и насилно соборување на американската влада.

Како што пренесуваат некои американски медиуми, истражителите пронашле пораки и документи во кои Касап повикува на атентат врз Трамп, револуција и спасување на белата раса од политичарите контролирани од Евреите.

На неговиот телефон биле откриени материјали поврзани со неонацистичка група, како и фотографии и упатства за правење бомби и извршување терористички напади.

ФБИ пронашле документ од три страници во кој Касап го детализирал планот за атентат. Се вели дека убиството на неговите родители било начин да се обезбедат пари и независност за да се спроведе тој план.

Во документацијата се најдоа и слики од Адолф Хитлер со натписи „Да живее Хитлер, да живее белата раса, да живее победата“.

Телото на неговата мајка Татјана Касап и очувот Доналд Мајер беа пронајдени на 11 февруари во нивниот дом со прострелни рани.

Никита Касап се соочува со девет обвиненија за кривично дело, вклучувајќи две обвиненија за убиство од прв степен и две точки за прикривање тело.

Додека Очите на Европа и на Запад главно се насочени кон војната во Украина, тензиите на Западен Балкан растат се повеќе и повеќе. Врвот на британската власт го нарекува регионот „уште едно жариште“ и предупредува дека рускиот претседател Владимир Путин го користи моментот за да ги дестабилизира поранешните југословенски земји, да ја поттикне поделбата и да го турка регионот подалеку од ЕУ и Западот и поблиску до Москва и Пекинг, пишува Политико.

Британскиот министер за надворешни работи Дејвид Лами го посети регионот минатата недела за да ја потврди британската поддршка за проширувањето на Европската унија во сите шест земји од Западен Балкан – Албанија, Босна и Херцеговина, Црна Гора, Косово, Северна Македонија и Србија.

„Со војната во Европа и долгата рака на руското учество и овде, би било крајно неодговорно да се игнорира Западен Балкан“, изјави Лами за Политико.

Според Лами, целта на Путин не е помирување, туку постојана нестабилност и немири. „Во негов интерес е да го држи регионот на работ, да ги одржува општествата немирни и да ги одржува конфликтите поттикнати од сајбер и хибридната војна“, рече тој.

Многу западни дипломати веруваат дека Кремљ би можел да ги искористи длабоко вкоренетите етнички и верски тензии за да поттикне нови конфликти и да го зајакне своето влијание во дворот на Европската унија.

Британски функционер предупреди дека Балканот мора брзо да оди напред, бидејќи Брисел наскоро би можел да биде преокупиран со влезот на Украина во ЕУ. „Прозорецот на можности е многу тесен. Балканот повеќе не може да седи на две столчиња“, рече тој.

Србија: меѓу ЕУ и „мрачната визија“
Иако Србија преговара за влез во ЕУ од 2009 година, британскиот министер признава дека постојат две визии за иднината на земјата – едната ориентирана кон Европа, а другата поавторитарна, со поголема контрола, корупција и блискост со Русија. На белградските улици јасно се гледаат овие поделби.

Бранот масовни студентски протести, кои траат од ноември минатата година кога 16 лица загинаа при уривање на настрешницата на станицата во Нови Сад, секојдневно ги блокираат патиштата. Протестите се проширија и на противењето на планираниот луксузен комплекс на Џаред Кушнер, зет на американскиот претседател Доналд Трамп, на местото на поранешното Министерство за одбрана, кое беше бомбардирана од НАТО во 1999 година.

Знамињата на ЕУ не се веат на протестите, а многу студенти сметаат дека Брисел е соучесник на корупцијата против која се борат. Паралелно со Вучиќ се преговара за членство и се прават обиди да му се приближат поради српскиот литиум“, велат организаторите, истакнувајќи го лицемерието на европската политика.

Србија не ја признава независноста на Косово, одбива да воведе санкции кон Русија и продолжува да ги продлабочува воените и економските односи со Москва и Пекинг. „Парадоксот живее овде“, рече Лами, кој вели дека Путин го сака Западен Балкан како „следното игралиште“.

БиХ: Додик како нарушувачки фактор
Во Босна и Херцеговина, претседателот на Република Српска, Милорад Додик, се соочува со правосилна пресуда за непочитување на одлуките на меѓународниот висок претставник. Наместо да биде уапсен, Додик слободно се движи, неодамна беше во Белград со Вучиќ, а потоа во Москва со Путин.

Иако САД и Велика Британија веќе воведоа санкции против него, британската политичарка Арминка Хелиќ бара построги мерки. „Ова не е брз рез, туку бавна инфекција“, вели Хелиќ, која и самата избегала од Босна и Херцеговина за време на војната.

Предупредува дека Западот е премногу пасивен кон ширењето на влијанието на Русија на Балканот, кое се спроведува преку црквата, медиумите, дезинформациите и политичките сојузи.

Хелена Иванов од британскиот тинк-тенк Henry Jackson Society смета дека Западот може повторно да задоцни, како што задоцни во 1990-тите. „Не е во прашање војна, но тие би можеле да се разбудат во време кога руските и кинеските влијанија се веќе длабоко вкоренети и тогаш ќе биде предоцна“, рече таа.

Заедничкиот заклучок на британските претставници, како и политичките аналитичари е јасен: доколку ЕУ и пошироката меѓународна заедница не дејствуваат брзо и решително, Путин би можел да го претвори Балканот во нова зона на конфликт и нестабилност, исто како што направи во Украина.

Европската унија ќе ја зголеми финансиската поддршка за палестинската управа со тригодишен пакет вреден околу 1,6 милијарди евра, изјави во интервју за Ројтерс европскиот комесар одговорен за Блискиот Исток.

Дубравка Шуица, комесарката на Европската комисија за Медитеранот, рече дека финансиската поддршка ќе оди рака под рака со реформите на палестинската управа, која критичарите ја обвинуваат за корупција и лошо управување.

„Сакаме да се реформираат бидејќи без реформи нема да бидат доволно силни и кредибилни за да бидат соговорник, не само за нас, туку и за Израел“, рече Шуица.

Изјавата на комесарот дојде пред првиот политички дијалог на високо ниво меѓу министрите за надворешни работи на ЕУ и високи палестински претставници, вклучително и премиерот Мохамад Мустафа, денеска во Луксембург.

ЕУ е најголемиот донатор за Палестинците, а претставниците на ЕУ се надеваат дека и палестинската управа, која управува со Западниот Брег, еден ден ќе ја преземе одговорноста за Газа по завршувањето на војната меѓу Израел и милитантите на Хамас.

Владата на израелскиот премиер Бенјамин Нетанјаху, сепак, досега ја отфрли идејата за предавање на Газа на палестинската управа и ја избегнуваше пошироката цел на ЕУ за решение со две држави, кое би вклучило формирање на палестинска држава.

Шуица рече дека 620 милиони евра ќе одат за финансиска поддршка и реформи, 576 милиони евра за отпорност и закрепнување на Западниот Брег и Газа, а 400 милиони евра ќе дојдат во форма на заеми од Европската инвестициска банка, под услов да биде одобрено од нејзиното раководно тело. Таа рече дека просечната поддршка од ЕУ за палестинската управа изнесува околу 400 милиони евра во изминатите 12 години.