Свет
Америка ја повика ЕУ да се приклучи на 100-процентните царини на руската нафта

САД се надеваат дека нивните европски сојузници ќе им се придружат во воведувањето на таканаречените секундарни царини на Русија, изјави американскиот министер за финансии Скот Бесент во интервју за „Си-ен-би-си“.
„Руска нафта ќе биде подложна на секундарни царини до 100 отсто“, рече Бесент. „Ги повикувам нашите европски сојузници, кои досега само вербално се залагаа за остри мерки, да нè следат ако ги воведеме овие царини.“
Изјавите на Бесент уследија по најавата на американскиот претседател Доналд Трамп пред неколку дена за воведување тешки царини кон Русија доколку не се постигне договор за завршување на војната во Украина во рок од 50 дена.
„Ние ги нарекуваме секундарни царини“, рече Трамп на заедничка прес-конференција со генералниот секретар на НАТО, Марк Руте, во Белата куќа. „Царини од околу 100 проценти.“
Секундарните царини претставуваат казнени мерки што се применуваат на држави или компании кои продолжуваат да тргуваат со санкционирана земја – им се наплатува дополнителен износ за пристап до американскиот пазар или финансискиот систем.
На пример, ако некоја трета земја како Кина продолжи да купува руска нафта, нејзиниот извоз во САД би можел да биде оптоварен со дополнителна царина од 100 проценти, што значително би ги зголемило цените за американските потрошувачи и дополнително би ги притискало кинеските извозници.
Трамп, кој во кампањата вети дека ќе постигне мировен договор во рок од 24 часа од преземањето на функцијата, е сѐ повеќе фрустриран од она што го опишува како руски одолговлекувања во мировните преговори.
Американската стратегија има за цел да ги намали приходите на Русија од извозот на нафта, кои изнесуваат околу една третина од државниот буџет и се клучен извор на финансирање на војната против Украина.
На трамповата закана од 15 јули реагираше портпаролот на Кремљ Дмитриј Песков, истакнувајќи дека таа е „сериозна“, но дека на Москва и треба време да ја анализира пораката од Вашингтон.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Хаос во еквадорски затвор: Затвореници со бомба, мртви и бегство низ ѕид

Најмалку 13 затвореници и еден чувар загинаа, а 14 лица се повредени во жесток судир меѓу ривалски банди во затворот во градот Мачала, на југозападот на Еквадор.
Според полицијата, судирот почнал кога затворениците упаднале во едно одделение, земале чувари како заложници и убиле еден од нив. Потоа членовите на бандата „Лос Лобос Бокс“ (Los Lobos Box) нападнале ривалска група. По експлозија поставена внатре, дел од затворениците успеале да избегаат низ отвор во ѕидот, но 13 биле повторно уапсени.
За смирување на ситуацијата биле распоредени 200 полицајци и војници.
Властите го обвинија криминалниот клан „Лос Лобос Бокс“, познат по соработката со мексиканските наркокартели за шверц на кокаин преку еквадорските пристаништа кон САД и Европа. Затворите во Еквадор одамна се под контрола на банди кои ги водат своите операции дури и од внатрешноста на ќелиите.
Градот Мачала долго време бара преместување на затворот, кој се наоѓа во центарот на градот.
Поради наглиот пораст на насилство, Еквадор од една од најбезбедните држави во Латинска Америка стана една од најопасните. Овој месец САД ги прогласија бандите Los Lobos и Los Choneros за терористички организации, наведувајќи дека преку терор и брутално насилство сакаат да ги контролираат шверцерските рути.
Свет
Минатото лето повеќе од 62.700 смртни случаи во Европа поради топлината

Топлината предизвика повеќе од 62.700 смртни случаи во Европа минатата година, кои се поврзани со невообичаено високите температури и влажност, што е зголемување од речиси 25 проценти во споредба со 2023 година, покажуваат резултатите од студијата на Институтот за глобално здравје во Барселона (ISGlobal), објавени денес во списанието „Нејтр медицин“.
„Повеќе од 181.000 смртни случаи поврзани со топлината се регистрирани во Европа од летото 2022 до летото 2024 година“, изјави Џоан Балестер Кларамунт, главен автор на студијата.
Исто како и во 2022 и 2023 година, Италија беше убедливо најпогодена од непријатната летна топлина минатата година. Според проценките на експертите, помеѓу 1 јуни и 30 септември 2024 година, во таа земја починале 19.000 луѓе како резултат на летната жештина.
Шпанија е втора со повеќе од 6.700 смртни случаи, по што следи Германија со околу 6.300 смртни случаи. Според податоците, по неа следуваат Грција со нешто помалку од 6.000 смртни случаи и Романија со повеќе од 4.900 жители кои подлегнале на последиците од жештината. Постарите лица се најмногу изложени на ризик.
Рангирањето се менува кога проценетиот број на смртни случаи поврзани со жештината се споредува со населението на дадена земја. Податоците од студијата покажуваат дека во овој случај Грција е на прво место со 574 смртни случаи предизвикани од жештина на милион жители, по што следуваат Бугарија со 530 и Србија со 379. Во 15 од 32 проучувани земји, летото 2024 година беше најсмртоносно во последните неколку години. Во некои земји, како што се Германија, Шпанија и Франција, летото 2022 година беше уште полошо. Генерално, истражувачите забележале дека во Европа во 2022 година имало малку повеќе смртни случаи поврзани со топлина отколку во 2024 година. Фактори како што се регионалните разлики во температурата и влажноста играат важна улога во ваквите варијации. Истражувачите истакнаа дека постарите лица се особено изложени на ризик.
Свет
Две болници во Газа затворени поради израелската офанзива

Министерството за здравство во Појасот Газа соопшти дека две болници во градот Газа – детската „ал-Рантиси“ и болницата „Eye“ – престанале со работа поради штетите од израелското бомбардирање и напредувањето на копнената офанзива.
Според властите, здравствениот систем е намерно цел на нападите, што го прави речиси невозможно пациентите и ранетите безбедно да стигнат до болнички објекти. Израел сè уште не се огласил по обвинувањата.
Израелската армија, која тврди дека Хамас го користи градот Газа како последно упориште, продолжува со копнените операции и уништување на стамбени блокови. Локалните власти велат дека само во понеделник најмалку 25 лица биле убиени во нападите, додека во речиси двегодишната офанзива бројот на жртви во Газа надминал 65.000.