Свет
Аналитичарите: Трамп се доближува до Бајден

Популарноста на американскиот претседател Џо Бајден е во благ пад откога информациите за тајните документи пронајдени во неговите канцеларии станаа јавни, а неговиот претходник Доналд Трамп малку ја зголемува предноста пред потенцијалниот републикански предизвикувач.
Иако Бајден долго време го поддржуваат помалку од половина од американските граѓани, пред две недели актуелниот претседател го постигна својот најдобар резултат од 2021 година – анкетите му дадоа поддршка од речиси 48 проценти.
Тоа го укинаа резултатите од конгресните избори и кавгата на републиканците за идеалниот противник на Бајден на следните претседателски избори. Поранешниот претседател Трамп е во центарот на вниманието на медиумите поради истрагата што е поведе против него вклучувајќи го и откривањето стотици доверливи документи во неговото одморалиште Мар-а-Лаго на Флорида, кои ги зел со себе по напуштањето на Белата куќа.
Фокусирањето на Трамп помогна дел од американската јавност да се сети зошто воопшто гласаа за Бајден, но бидејќи во медиумите се појавија информации дека кај Бајден се пронајдени тајни документи од времето кога тој беше потпретседател на Барак Обама, Трамп падна во заднина, а многу неопределени гласачи го доведуваа во прашање интегритетот на Бајден.
Аналитичарите посочуваат дека двата случаја не се споредливи ниту по обемот на документите ниту по начинот на кој се решени. Додека помошниците на Бајден веднаш го известиле Националниот архив за откривањето на документите, а потоа ги предале, Трамп и неговите адвокати првин одбиле да ги вратат документите за кои се знаело дека се во негова сопственост, а потоа тврделе дека ги вратиле сите. Претресот на ФБИ пронајде уште неколку кутии со доверливи документи во одморалиштето на Трамп.
Според најновата анкета на Си-ен-ен и ССРС, Бајден сега ужива поддршка од речиси 46 отсто меѓу регистрираните гласачи, а претходната анкета на Правниот факултет на Универзитетот „Маркет“ покажа дека неговата поддршка се намали од 47 отсто на 44 отсто.
Си-ен-ен истакнува дека тоа не е голем пад, но сепак е значаен. Прашање е колку самото обелоденување на документите влијаело на тој пад – во исто време се зголеми и цената на горивото на американските пумпи, на што американските гласачи се исклучително чувствителни.
Трамп, од друга страна, почна да ја враќа предноста пред гувернерот на Флорида, Рон де Сантис, кој многумина од десницата го поздравија како нова ѕвезда на Конзервативната партија по изборите.
Пред изборите Трамп водеше со дури 30 поени пред Де Сантис кај републиканците, но кога резултатите на нивната партија сериозно пропаднаа, освен на Флорида на Де Сантис, водството на Трамп беше намалено на само десет поени.
Последните анкети покажуваат дека оваа предност повторно почнала да расте и сега изнесува околу дваесет процентни поени во корист на Трамп, што значи дека поранешниот претседател во моментот е најверојатниот победник на прелиминарните избори за републиканскиот претседателски кандидат.
Анкетата спроведена од колеџот „Емерсон“ покажува дека 55 отсто од републиканските гласачи би го избрале Трамп, а околу 29 отсто би го избрале Де Сантис.
Доколку Бајден и Трамп повторно се судрат на претседателските избори, резултатот би бил многу понеизвесен – и двата би биле избрани од речиси 40 отсто од гласачите во овој момент, пренесе „Денес.рс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Шпанските винари: Тарифите на Трамп се сериозен удар за винарниците, но и за Американците

Шпанската федерација на винарите ја оцени одлуката на американскиот претседател Доналд Трамп за воведување царини од 20 отсто за производите од Европската Унија како сериозен удар за шпанските винарници имајќи предвид дека САД се втори по големина извозен пазар за шпанските вина.
„Овие царини, барем во случајот со виното, се целосно неоправдани бидејќи разликата меѓу постојните царини во ЕУ и САД е минимална“, рече Хозе Луис Бенитез, извршен директор на ФЕВ.
Бенитез предупреди дека оваа мерка ќе им наштети не само на шпанските винари туку и на американските потрошувачи, кои пијат повеќе вино отколку што произведуваат.
Тој особено посочи дека новите царини најмногу ќе ги погодат малите и средните производители, кои сочинуваат 99 отсто од шпанските винарници бидејќи имаат помалку можности за диверзификација на извозот и се силно зависни од главните извозни пазари.
Американскиот пазар учествува со речиси 13 отсто од вкупниот извоз на шпанско вино. Во 2024 година Шпанија извезла 97 милиони литри вино во САД во вредност од приближно 390 милиони евра.
Свет
Трамп не воведе царини за Русија и за Северна Кореја

Во пакетoт нови царински мерки што ги воведе американскиот претседател Доналд Трамп неколку земји не се на списокот, а меѓу нив Русија и Северна Кореја.
За разлика од Кина, Европската Унија или Индија, кои се соочени со драстично зголемување на царините, Москва и Пјонгјанг останаа надвор од опсегот на овој тарифен бран. Причината не е политичка попустливост, туку комбинација од постојни санкции, минимална трговија и геополитички калкулации. Така барем тврди Белата куќа.
Портпаролката на Белата куќа, Каролин Левит, изјави за „Аксиос“ дека Русија не е покриена со царините бидејќи американските санкции веќе спречуваат каква било значајна трговија.
„Сепак, САД сè уште тргуваат повеќе со Русија отколку со земји како Маврициус или Брунеи, кои беа на списокот на Трамп за царини, дури и со оддалечените островски области како Токелау (1.500 жители) во Тихиот океан и Свалбард (2.500 жители) во Арктичкиот круг.
Левит нагласи дека Куба, Белорусија и Северна Кореја исто така се изоставени бидејќи веќе имаат екстремно високи постојни царини и санкции.
Двете земји со години се предмет на опсежни американски санкции. Поради инвазијата на Украина, Русија е под влијание на санкции што влијаат на финансискиот сектор, енергетиката и воената индустрија. Трговијата со САД опадна од 36 милијарди долари во 2021 година на 3,5 милијарди долари во 2024 година, што го прави воведувањето дополнителни царини економски бесмислено.
Северна Кореја е уште поизолирана – американските и меѓународните санкции речиси целосно ја забрануваат трговијата, освен во хуманитарни случаи. Како што коментира аналитичарот Саурав Гош, „нелегалните канали се доминантни, а тарифите нема да имаат никаков реален ефект“.
Во вкупната структура на американската трговска размена Русија и Северна Кореја учествуваат со помалку од 0,1 отсто. Од друга страна, Кина оствари трговски суфицит од речиси 300 милијарди долари со САД во 2024 година поради што е погодена со царинска стапка од дури 34 проценти.
Исклучувањето на Москва и Пјонгјанг може да има и дипломатска заднина. Администрацијата на Доналд Трамп можеби ќе сака да задржи простор за можни преговори – со Русија за Украина и со Северна Кореја за нуклеарната програма.
Европа
Унгарија се повлекува од Меѓународниот кривичен суд

Владата на Унгарија објави дека се повлекува од Меѓународниот кривичен суд, објави „Ројтерс“.
Гергели Гуљас, висок функционер во владата на премиерот Виктор Орбан, го објави потегот неколку часа откако израелскиот премиер Бенјамин Нетанјаху – по кого Меѓународниот кривичен суд издаде налог за апсење – пристигна во земјата во официјална посета.
Орбан му се јави на израелскиот лидер штом беше издадена наредбата минатиот ноември велејќи дека одлуката нема ефект во Унгарија.
Во ноември судиите на Меѓународниот кривичен суд рекоа дека има разумни основи да се верува дека Нетанјаху има кривична одговорност за наводните воени злосторства и злосторствата против човештвото за време на војната меѓу Израел и Хамас.
Нетанјаху ја осуди одлуката на Меѓународниот кривичен суд како антисемитска.
Унгарија е еден од основачите на Меѓународниот кривичен суд, кој има 125 земји членки. САД, Русија, Кина и Израел не ја признаваат неговата јурисдикција, како и некои други држави.
Меѓународниот кривичен суд има овластување да гони поединци обвинети за геноцид, злосторства против човештвото и воени злосторства на територијата на државите потписнички на Римскиот статут, неговиот основачки договор.