Свет
Аналитичар: Нетанјаху има брутален план, само еден човек може да го спречи
Израел насилно ја бомбардира Газа, мобилните и интернет-врските се прекинати. Авионите продолжија да ги уништуваат позициите на Хамас, а борби се водат и во подземните тунели што го поврзуваат појасот Газа. Се зголемува бројот на цивилни жртви, пренесуваат медиумите во регионот.
„Јасно е дека овде беше употребена несразмерна сила како одговор и дека цивилите беа убиени во број што го шокира светот и нема сомнеж дека тоа се работи што ќе треба да ги реши Меѓународниот кривичен суд“, рече надворешнополитичкиот аналитичар Денис Авдагиќ додавајќи дека бројките на загинатите се застрашувачки и дека според извештајот на УНИЦЕФ секој ден умираат по 400 деца.
„Да, Хамас изгради тунели покрај цивилни објекти, но тоа не им дава право на Израелците да гаѓаат и да убиваат цивили. Професионална армија, сериозна армија како израелската, ја има таа одговорност и мора да биде свесна за таа одговорност. Хамас е терористичка организација и свесно направија сè што правеа и дали треба да се постапи со нив, на кој начин и дали цивилите треба да бидат жртви, има само еден одговор – не“, рече Авдагиќ.
Воениот аналитичар Роберт Бариќ додаде дека цивилите секогаш се жртви во овој тип на конфликти.
„Во 2017 година Американците им дадоа воздушна поддршка на ирачките сили, кои го окупираа Мосул, тоа беше повеќемесечна кампања против борците на Исламската држава, кои копаат таму. Тие направија сè по книга и сите анализи го покажуваат тоа.
Сепак, резултатот беше 8.200 загинати ирачки војници. Конзервативните процени велат дека загинале 10.000 цивили. А Мосул беше буквално срамнет со земјата – уништени се 40.000 станбени единици. Хамас не е заинтересиран за човечки жртви, тие сакаат да се прикажуваат како жртви“, рече Бариќ
На прашањето дали Израел ја губи меѓународната поддршка, Авдагиќ рече дека поддршката за Палестинците расте.
„Во целиот свет има поделеност и тоа е многу изразено. Најчесто земјите, владите каде што имате конзервативни премиери и шефови, се поповолни за Израел, а каде што се либерални, тие се поволни за Палестинците“, рече тој.
Исто така, посочи дека прашањето за Израел во Европа е емотивно прашање по Втората светска војна.
„Во Германија ова се третира многу сериозно, како клучно политичко прашање, без оглед на изминатите години. Од друга страна, сè попристапната медиумска слика, доаѓањето на социјалните мрежи, па дури и сега ова исклучување на интернетот во Појасот Газа има двојна цел – да не дојдат тие слики што ја менуваат перцепцијата“, рече Авдагиќ.
Тој се осврна и на поддршката за Хамас во Појасот Газа.
„Разговарав со многу луѓе од Појасот Газа за нивниот однос со Хамас. Многу од нив зборуваат за стравот. Тие се моќни. Тие држеле сè, тие се вистинската елита која ги има придобивките од нормалниот западен живот за разлика од мнозинството жители во Газа. Тоа е вооружената елита, армија, држава, партија, религија, администрација… Сè во едно.
Бариќ се осврна и на израелскиот премиер Бенјамин Нетанјаху.
„Нетанјаху е политички готов, без разлика како ќе заврши ова. Некој мора да плати за оваа разузнавачка грешка. Се надевам дека со неговото заминување ќе заврши овој период на израелската политика. Тој направи сè за да го уништи тоа решение за две држави.
„Ова не е само војна меѓу Израел и Хамас, ова е најголемата политичка битка на Нетанјаху за неговиот политички опстанок“, додаде Авдагиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Путин го смени министерот за одбрана
Рускиот претседател Владимир Путин предложи смена на министерот за одбрана и долгогодишен сојузник Сергеј Шојгу по повеќе од две години војна во Украина, објави Горниот дом на парламентот.
Путин го назначи Шојгу за секретар на рускиот Совет за безбедност, изјави портпаролот на Путин, Дмитриј Песков.
Шојгу беше на чело на руското Министерство за одбрана повеќе од 11 години. Путин го предложи Андреј Белоусов – поранешен вицепремиер, за нов министер за одбрана.
Путин, исто така, предложи Сергеј Лавров да остане министер за надворешни работи.
Шојгу беше критикуван за лошо управување со војната во Украина. Тој беше остро критикуван и јавно прозван од Евгениј Пригожин, шефот на Вагнер, кој се пожали дека руската армија не ги снабдувала неговите платеници со доволно оружје за војната.
Регион
(Видео) „Немаме претензии кон Грција“ – Рама на собир со дијаспората во Атина откако доби дозвола од Мицотакис
Албанскиот премиер Еди Рама е во Грција, каде на собир одржан во Атина рече дека односите меѓу двете земји не можат „да се удават во лажица вода што ја носи секојдневната политика“, и дека Албанија нема претензии кон Грција.
Рама претходно доби дозвола од грчките власти за да одржи собир со албанските граѓани. Грчката опозиција се спротивстави на посетата на албанскиот премиер, но Рама на крајот доби дозвола од премиерот Киријакос Мицотакис кој искоментира дека посетата е непотребна, пишува „Еуроњуз“.
„Мислам дека темата доби малку повеќе публицитет отколку што навистина заслужува. Ако ме прашувате дали времето на оваа посета, неколку недели пред европските избори и со отворените прашања за грчкото национално малцинство во Албанија, е вистинскиот, ќе ви кажам дека не е баш најсоодветното време. Но, како и да е, да не му даваме и поголема важност“, рече Мицотакис.
Рама на средбата со Албанците во Атина истакна дека тие станале гордост на Албанија во тој дел од Европа.
„Вие сте најголемиот, најсилниот, најубавиот доказ за оваа поврзаност со милиони нераскинливи нишки на два народа“, рече Рама.
Тој изјави дека на грчките граѓани во Албанија не им е ускратено правото да гласаат поради нивното етничко потекло.
„Ниту еден ваш проблем не се разликува од било кој проблем на граѓаните на Албанија. Во ниту еден случај албанската држава на етничките Грци не им го ускрати правото на вера, јазик или имот. Никогаш не им беше ускратено правото на глас поради нивното потекло“, продолжи тој.
Рама истакна дека политиката мора да знае дека судбините на Албанија и Грција се неразделни. Тој ги повика Грците да дојдат во Албанија не само на одмор, туку и да инвестираат.
„Грците беа, се и ќе бидат добредојдени во Албанија не само да се одморат туку и да работат, да отвораат продавници, да основаат фирми, да отвораат инвестициски линии за да имаат корист од многу помал даночен режим отколку во Грција. Албанија е толку добредојдена за Грците што не им прави никакви проблеми“, рече Рама.
Тој додаде дека Албанија нема претензии кон Грција.
„Албанија нема претензии кон Грција, освен меѓусебно почитување, взаемна грижа за сонародниците кои живеат во нашите две земји, меѓусебни односи на пријателство и добрососедство. И не само тоа, Албанија ја гледа Грција како природен стратешки партнер, било за прашања кои треба да се решат меѓу нас или за големите предизвици на оваа нова ера, можности, но и закани за Балканот, Европа и демократскиот свет. Ги гледаме како причина да се зближиме и подобро да се запознаеме“, рече Рама и најави дека ќе се формира Албанско-грчка стопанска комора.
Свет
САД: Израел нема убедлив план за заштита на цивилите во Рафа
Американскиот државен секретар, Ентони Блинкен, денеска ја бранеше одлуката за одложување на испораката на 3.500 бомби на Израел поради загриженоста дека тие ќе бидат користени во напад врз градот Рафа во јужна Газа, велејќи дека Израел нема убедлив план за заштита на 1,4 милиони цивили кои се засолниле таму.
Зборувајќи за „Еј-би-си њуз“, Блинкен рече дека Џо Бајден останува посветен да му помогне на Израел да се одбрани и дека испораката на 3.500 бомби со тежина од 900 и 230 килограми е единствениот американски пакет со оружје што е задржан.
„Бајден јасно стави до знаење дека ако Израел „покрене голема операција во Рафа, тогаш постојат одредени системи што нема да ги поддржиме и да ги снабдуваме за таа операција“, рече Блинкен.
„Навистина сме загрижени за начинот на кој тие се користат“, продолжи тој. Израел мора да „има јасен, убедлив план за заштита на цивилите, што сè уште не сме го виделе“.
1,4 милиони Палестинци се засолниле во Рафа, од кои многумина беа раселени од другите делови на Газа каде што побегнаа од борбите и израелските бомбардирања, поради големиот недостиг на храна и вода.
Најмалку 35.000 Палестинци се убиени во израелската воена операција во Газа, според Министерството за здравство на енклавата.
Војната почна со напад на Хамас врз јужен Израел на 7 октомври, во кој според израелските податоци загинаа околу 1.200 луѓе, а 250 беа киднапирани. Израел тврди дека во борбите загинале 620 војници.