Свет
Аналитичар: Проблемот на Блискиот Исток не се терористичките групи, туку Нетанјаху

Аналитичарот за надворешна политика и поранешен хрватски амбасадор во Москва, Божо Ковачевиќ, за ХРТ ја коментира ситуацијата на Блискиот Исток, велејќи дека главниот проблем е војната во Газа.
Проиранските групи кои дејствуваат на територијата на Ирак најавија дека ќе ги одложат своите акции против американски цели, но Хутите не беа погодени од американските напади врз Јемен.
„Клучниот проблем е војната во Газа и додека не се прекинат воените операции таму, нема да има вистинска деескалација на конфликтот“, рече Ковачевиќ.
Тој смета дека на Американците им е важно конфликтот да не ескалира бидејќи овој регион повеќе не е предмет на американските интереси, но вели дека се уште е предмет на интензивна конкуренција меѓу големите сили.
Тој додава дека Израел на секој начин се обидува да предизвика војна меѓу САД и Иран.
„Во моментов главниот проблем на Блискиот Исток не се терористичките и исламистичките групи, туку главниот проблем е Бенјамин Нетанјаху. Тој со својата непослушност ја отежнува позицијата на Џо Бајден и неговата администрација пред изборите“, посочи Ковачевиќ.
Што се однесува до проблемите во Црвеното Море, Европската унија не е способна да ја проектира својата моќ на глобално ниво, смета Ковачевиќ. Тој додава дека Унијата не е способна ниту за превентивно дејствување за да избегне конфликти на европско тло.
„ЕУ не е убедлив субјект на меѓународните односи“, рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп го нападна Зеленски за минералите: Доцнат три недели

Доналд Трамп изјави дека работата на мировниот договор меѓу Русија и Украина „тече непречено“.
Во објава на неговата платформа „Truth Social“, актуелниот американски претседател исто така рече дека Украина сè уште не потпишала договор за ретки земјини минерали со САД и изрази надеж дека тоа ќе го стори веднаш.
„Украина, предводена од Володимир Зеленски, сè уште не ги потпишала конечните документи за многу важен договор за ретки минерали со САД“, напиша Трамп.
„Доцнат најмалку три недели. Се надевам дека договорот ќе биде потпишан СЕГА.“ Тој додаде: „Работата на сеопфатен мировен договор меѓу Русија и Украина напредува непречено. УСПЕХОТ се чини дека е на повидок.“
Изјавите на Трамп доаѓаат откако неговиот претставник Стив Виткоф се сретна со рускиот претседател Владимир Путин во Москва, а Кремљ по состанокот соопшти дека Русија и САД се „поблиску“ до договор за „голем број меѓународни прашања“. Од друга страна, од Украина доаѓаат гласини дека Киев би бил подготвен привремено да отстапи територија на Русија, иако претседателот Зеленски рече дека „нема дискусија“ за Крим или кој било дел од Украина.
Европа
Ковчегот на папата Франциско затворен, погребот в сабота наутро

Од средата наутро, кога телото на покојниот папа Франциско беше пренесено во базиликата „Свети Петар“, низ неа поминаа 150.000 луѓе од целиот свет. Ковчегот на папата беше затворен вечерва, а погребот ќе се одржи в сабота наутро.
Пред церемонијата на запечатување, во ковчегот на папата беа поставени 12 монети, по една за секоја година од неговиот понтификат, како и краток запис и извештај за неговото папство. Церемонијата ја водеше кардиналот Кевин Фарел, камерлегно на Светата Римска црква.
Реки верници доаѓаат во Рим за да присуствуваат на утрешниот погреб на папата Франциско, а се очекува и пристигнување на бројни делегации од целиот свет.
Во Рим се воведени строги безбедносни мерки, со илјадници волонтери и полицајци, систем против дронови, снајперисти на покривите и борбени авиони подготвени за полетување.
Европа
Жена во Шпанија ја продала новородената ќерка за 2.000 евра на двојка која не можела да има деца

Шпанската полиција уапси 37-годишна жена која ја продала својата новородена ќерка на пар кој се лекува од неплодност, јавува АФП.
Полицијата соопшти дека жената била уапсена минатиот месец во Мостолес, јужно предградие на Мадрид. Брачен пар осомничен за купување дете и двајца нивни роднини беа уапсени во јужниот град Кордоба.
Според прелиминарната истрага, жената се согласила да им ја предаде својата новородена ќерка на двојката за 2.000 евра. Сепак, по породувањето, таа се предомислила и побарала да ѝ го вратат детето.
Двојката, според АФП, одбила да го врати бебето освен ако жената не им го врати платениот износ, плус дополнителни 1.000 евра за покривање на трошоците што тврделе дека ги направиле во текот на месецот што го поминале со неа во Кордоба пред да се роди детето.
Полицијата започна истрага откако една жена поднесе жалба тврдејќи дека семејство во Кордоба го „киднапирало“ нејзиното новородено бебе. Детето е предадено во центар за заштита на деца во Кордоба. Полицијата, исто така, објави дека властите ѝ одзеле уште шест деца на жената во 2022 година поради занемарување.