Околу 49 отсто Американци го одобруваат указот на претседателот Доналд Трамп за заострување имиграциската политика, покажуваат резултатите од истражувањето на јавното мнение објавено во вторникот, спроведено од меѓународниот социолошки институт Ipsos во соработката со агенцијата Reuters, но укажуваат и на остра поделеност по партиска основа на американското опшество.

Според резултатите, 49 отсто од испитаниците силно или делумно ја поддржуваат одлуката на Трамп, додека, пак, 41 отсто одлучно или до извесен степен не се согласуваат со нив. Десет проценти одговориле дека сé уште немаат изградено сопствено мислење за ова прашање.

Притоа, мерките утврдени со одлуката на претседателот, целосно го одобриле 51 отсто од испитаниците кои се декларирале како републиканци. Кај оние кои се определиле спротивно, 53 се изјасниле како демократски гласачи.

Генерално, 31 отсто од испитаниците изјавиле дека по стапувањето на сила на рестриктивните мерки на границите се чувствуваат „побезбедни“, 26 проценти, пак се чувствуваат помалку заштитени. Околу 38 отсто сметаат дека САД им дале „добар пример“ на другите држави за справувањето со терористичката закана, а 41 отсто сметаат дека администрацијата Трамп во овој случај не најдобар пример за поддршка.

Мислењата, исто така, радикално се поделени околу ставот на Трамп дека на христијаните од Сирија треба да им се овозможи правото да влезат на територијата на САД како бегалци, како приоритет. Околу 56 отсто од испитаниците во анкетата не се согласуваат со тоа дека Вашингтон треба „да ги прифаќа само бегалците христијани, но не и муслиманите“.

Анкетата била спроведена на 30-ти и 31-ви јануари во сите 50 сојузни држави на САД и во неа учествувал 1.201 испитаник, од кои 453 се изјасниле како поддржувачи на Демократската партија, а 478 приврзаници на Републиканската партија. Маргината на можната грешка е 3-5 отсто.

Минатиот петок Трамп го потпиша указот „За заштита на земјата од влез на странски терористи“, со кој во рок од 90 дена се суспендира издавање визи за државјаните на седум муслимански држави: Иран, Ирак, Јемен, Либија, Сирија, Сомалија и Судан. Указот, исто така, и им наложува на Стејт департментот и на Министерството за национална безбедност да го суспендираат распоредувањето на бегалците по сојузните држави на 120 дена, како и на неодреден рок се суспендира прифаќањето бегалци од Сирија.

Исто така, значително е намалена квотата за прифаќање на барателите на азил во САД во фискалната 2017 година, која таму започнува во октомври 2016 година, на не повеќе од 50.000, од претходно планираните 110.000.

Одлуката на Трамп предизвика бран негодувања и во САД и во странство, вклучително и меѓу некои од западните сојузници. Таа одлука предизвика хаоси на граничните влезови и царините, а службениците на бирото за имиграција тешко ја спроведуваа поради протестите на активисти на најголемите американски аеродроми. Подигнати се неколку тужби за блокирање на делови од указот, кој жестоко го критикуваа опозициските демократи, организации за човекови права и некои западни сојузнички на САД.

Членовите на Сенатот од Демократската партија најавија дека имаат намера да предложат нацрт-закон кој ќе овозможи да се укине дејствието на указот.

Јавниот обвинител на сојузната држава Вашингтон, Боб Фергусон, објави дека ќе поднесе тужба со цел да се укинат одредбите од указот на претседателот за заострената контрола на имиграцијата. Според неговата изјава, тој ќе ја добие поддршката и од голем број технолошки компании, како „Amazon“ и „Expedia“. Според телевизијата CNN, слични чекори се преземени и во сојузните држави Њујорк, Масачусетс и Калифорнија.

Јавниот обвинител на сојузната држава Вирџинија, Марк Херинг, во вторникот, исто така, се приклучи на тужбите против указот на претседателот Доналд Трамп, според соопштението на неговата официјална интернет страница.

„Денеска доставив во судот тужба од името на Задницата на Вирџинија против претседателот Доналд Трамп и неговата администрација за неуставниот и незаконски указ од 27-ми јануари 2017 година“, се вели во изјавата на обвинителот Херинг./крај/мф/сн