Свет
Антимигрантски протести на границата меѓу САД и Мексико
Тихуана, каде што еден од мигрантските каравани стигна до границата со САД, не може да се справи со лавината луѓе, вели градоначалникот на мексиканскиот град, Хуан Мануел Гастелум, проценувајќи дека мигрантите ќе останат таму најмалку шест месеци додека чекаат да поднесат барања за азил.
Откако речиси 3.000 мигранти од Централна Америка пропатуваа низ Мексико во обид да стигнат до САД и го преплавија мексиканскиот граничен град Тихуана, стотици локални жители излегоа на улиците за да протестираат поради доаѓањето на караванот мавтајќи со мексикански знамиња и извикуваа „Надвор!“ и „Не ги сакаме во Тихуана“, нарекувајќи го караванот инвазија.
Една од демонстрантите, Хуана Родригез, вели дека владата треба да спроведе проверки на барателите на азил за да осигури дека немаат криминални досиеја, додека друга демонстрантка, Палома, ги осуди мигрантите за кои вели дека пристигнале во Мексико по бенефиции.
„Нивната влада нека се грижи за нив”, изјави Палома.
Корисниците на социјалните мрежи споделуваа фотографии и видеа од местото на протестите. Во твит во неделата, американскиот претседател Доналд Трамп го цитираше градоначалникот на Тихуана, Хуан Мануел Гастелум, кој рече дека градот е „лошо подготвен” за приливот на мигранти. Гастелум исто така изјави дека 2.700 имигранти досега во градот пристигнале, но мексиканската федерална влада проценува дека бројот на крајот би можел да достигне 10.000.
Во очекување на неколку каравани со илјадници мигранти, главно од Ел Салвадор, Хондурас и од Гватемала, администрацијата на Трамп нареди околу 5.800 војници да бидат распоредени на границата со Мексико за да спречи „инвазијата”. Трамп во неколку наврати истакна дека караваните вклучуваат членови на банди кои претставуваат закана за националната безбедност на САД.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Почина бебето кое беше извадено од утробата на мртвата мајка во Газа
Почина бебето кое во неделата со царски рез во Газа беше спасено од утробата на мртвата мајка, пишува Би-Би-Си.
Бебето е родено по итен царски рез извршен врз трудница која била убиена во израелски напад врз градот Рафа во Газа.
Освен мајката на Сабрин Ал Сакани, меѓу загинатите се и таткото на новороденото девојче и нејзината тригодишна сестра Малак.
Бебето при раѓањето тежело 1,4 килограми, а се родило во триесеттата недела од бременоста на мајката. Веднаш по царскиот рез беше сместено во инкубатор во болницата во Рафа заедно со уште едно бебе.
Но, девојчето после неколку дена почнало да има сериозни здравствени проблеми. Лекарите го реанимирале, но сепак починало вчера.
16 деца биле убиени за време на два воздушни напади на Рафа минатиот викенд, при бомбардирање на комплекс од станбени згради.
Израелските одбранбени сили (ИДФ) соопштија дека цел биле борците и инфраструктурата на Хамас и воените комплекси.
Свет
Британските разузнавачи: Русите се’ побрзо напредуваат во Украина
По заземањето на источноукраинскиот град Авдијевка, руските трупи напредуваат побрзо во областа, објави денеска британското Министерство за одбрана во своето секојдневно известување.
„Руските копнени сили навлегоа и создадоа тесен коридор на украинска територија со цел да влезат во градот Очеретин, приближно 15 километри северно од центарот на Авдијивка“, пишува на профилот на Министерството за одбрана.
Оцеретин во областа Доњецк имал околу 3.500 жители пред почетокот на војната.
И по заземањето на Авдијивка во средината на февруари, Русите се уште сметаат дека освојувањето на таа област е една од клучните операции, оценува британското Министерство за одбрана.
„Иако претрпуваат големи загуби, многу е веројатно дека руските копнени сили се во позиција континуирано да ги гаѓаат украинските позиции во областа и дека презеле контрола врз неколку помали населби“, додаваат тие.
Украина се брани од руската инвазија повеќе од две години. Британското Министерство за одбрана редовно објавува информации за напредокот на војната. Москва го обвинува Лондон за ширење дезинформации.
Европа
16-годишно момче избодено во училиште во Германија
16-годишно момче е тешко повредено кога утрово околу 8 часот било избодено од тинејџер (17) во училиште во Нојкирхен-Влуин.
На нападот наводно му претходела вербална расправија.
Постариот ученик наеднаш извадил нож и го ранил 16-годишникот во горниот дел од телото.
Момчето итно било пренесено во болница, а лекарите велат дека неговата состојба е стабилна.
По прободувањето напаѓачот побегнал од училиштето, но полицијата брзо го лоцирала и го уапсила.
Според инспекторот, немало опасност по безбедноста на другите деца во училиштето.