Свет
Астронаути на НАСА заглавија во вселената пред половина година, нивното враќање повторно одложено

Враќањето на Земјата на двајцата астронаути на американската вселенска агенција НАСА, кои моментно се наоѓаат на Меѓународната вселенска станица, повторно е одложено, соопшти НАСА.
Сунита Вилијамс и Бери Вилмор се заглавени на Меѓународната вселенска станица од јуни поради технички проблеми со вселенското летало „Старлајнер“. Двајцата требаше да останат таму само една недела.
НАСА тогаш објави дека треба да се вратат во февруари 2025 година, но Агенцијата сега соопшти дека лансирањето на нивните замени е одложено.
„’Спејс икс кру-10′ на НАСА сега има цел да лансира вселенско летало со четири членови на екипажот до Меѓународната вселенска станица (ISS) најдоцна до крајот на март 2025 година“, се вели во соопштението на американската вселенска агенција.
„Презакажувањето им дава време на тимовите на НАСА и ‘Спејс икс’ да ги завршат сите подготовки за лансирање на новото вселенско летало ‘Драгон’ за таа мисија.
Мисијата „Кру-9“, која ги вклучува Вилијамс и Вилмор, ќе се врати по пристигнувањето на мисијата „Кру-10“.
„Познат како период на предавање, овој временски интервал му овозможува на стариот екипаж да ги сподели сите научени лекции со новопристигнатиот екипаж и подобро да го префрли научното истражување и одржување во вселенскиот комплекс“, објави НАСА.
Две летала за снабдување неодамна пристигнаа на ISS, а вселенската станица е добро опремена со сè што му треба на екипажот, вклучувајќи храна, вода, облека и кислород, според НАСА.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Белорусија испраќа рекордни количини бензин во Русија

Белорускиот железнички извоз на бензин во Русија се зголеми за четири пати во септември во однос на претходниот месец, бидејќи Москва се справува со недостиг на гориво предизвикан од украинските напади врз нејзината енергетска инфраструктура, објавија извори од индустријата синоќа, објави „Ројтерс“.
Неколку руски региони беа принудени да воведат мерки за штедење и привремено да ги замрзнат цените на горивата во последните недели. Причината е недостигот на популарни видови бензин предизвикан од напади со беспилотни летала насочени кон рафинерии и други енергетски објекти.
Како одговор, Москва, исто така, го ограничи извозот на бензин и дизел. Ова не е првпат Русија да се потпира на соседна Белорусија, таа, исто така, го зголеми увозот на гориво минатата година за да го покрие недостигот на пазарот.
Според извори, пратките на бензин со железница од белоруските рафинерии до рускиот домашен пазар минатиот месец достигнаа 49.000 метрички тони, што е еквивалентно на 14.500 барели дневно. Заедно со бензинот, испораките на дизел во септември изнесуваа 33.000 тони.
Свет
Киев бесен на Меркел: „Зборовите на поранешната канцеларка се неприфатливи“

Киев остро реагираше на тврдењата на поранешната германска канцеларка Ангела Меркел дека Полска и балтичките земји ги саботирале обидите за решавање на украинскиот конфликт во 2021 година, што, како што изјави таа, индиректно придонело за почетокот на „Новата светска војна“, објавува Политико.
Меркел во интервју изјави дека Франција и Германија потоа предложиле воспоставување нов формат за преговори со Русија, кој би ги заменил договорите од Минск, но Варшава и балтичките престолнини одбиле да ја поддржат иницијативата.
Таа проценка предизвика негодување во Киев, каде што висок украински функционер, според Политико, рекол дека зборовите на поранешната канцеларка се „неприфатливи и, искрено, одвратни“.
Во истото интервју, поранешната германска канцеларка, исто така, оцени дека обвинувањето дека унгарскиот премиер Виктор Орбан е „тројански коњ“ на рускиот претседател Владимир Путин во рамките на Европската Унија е „глупост“, посочувајќи на потребата да се запрат меѓусебните обвинувања во рамките на ЕУ и да се обнови дипломатскиот дијалог.
Фото: принтскрин
Свет
Светската здравствена организација тестира смртоносен сируп против кашлица

Светската здравствена организација (СЗО) побара информации од Индија за тоа дали сирупот против кашлица поврзан со смртни случаи кај деца во земјата е извезен во други земји, соопшти денес агенцијата.
СЗО изјави за Ројтерс дека ќе разгледа издавање глобално предупредување за медицински производ во врска со сирупот Колдриф откако ќе добие официјални информации од Њу Делхи, објави Ројтерс.
Според информациите од локалните власти, најмалку 17 деца под петгодишна возраст починале во текот на изминатиот месец откако консумирале сируп што содржел високи концентрации на токсичното соединение диетилен гликол, речиси 500 пати над законската граница.
Фото: принтскрин